ភ្នំពេញ៖ ទេសាភិបាលធនាគារជាតិនៃកម្ពុជា បានអះអាងថា នៅឆ្នាំ ២០២២នេះ ធនាគារជាតិនៃកម្ពុជា នឹងបន្តធ្វើអន្តរាគមន៍លើទីផ្សារប្តូរប្រាក់ដើម្បីរក្សាស្ថិរភាពអត្រាប្តូរប្រាក់ ដែលនឹងរួមចំណែកយ៉ាងសំខាន់ដល់ការរក្សាស្ថិរភាពថ្លៃ និងការពារអំណាចទិញនៃប្រាក់រៀល ក៏ដូចជាចំណូលរបស់ប្រជាពលរដ្ឋ។
លោក ជា ចាន់តូ ទេសាភិបាលធនាគារជាតិនៃកម្ពុជា ក្នុងឱកាសបិទសន្និបាតបូកសរុបលទ្ធផលការងារប្រចាំឆ្នាំ ២០២១ និងទិសដៅការងារឆ្នាំ ២០២២ របស់ធនាគារជាតិនៃកម្ពុជាកាលពីម្សិលមិញនេះ អត្រាប្តូរប្រាក់នៅឆ្នាំ ២០២២នេះ នឹងអាចបន្តរងសម្ពាធធ្លាក់ថ្លៃ ដោយសារការអនុវត្តវិធានការគាំទ្រដែលបញ្ចេញប្រាក់ទៅលើទីផ្សារ គួបផ្សំនឹងនិន្នាការឡើងថ្លៃនៃប្រាក់ដុល្លារអាមេរិក ជាពិសេសបណ្តាលមកពីការរំពឹងទុកលើការធ្វើប្រក្រតីកម្មនយោបាយរូបិយវត្ថុរបស់ធនាគារកណ្តាលសហរដ្ឋអាមេរិក នាពេលខាងមុខ។
លោកបញ្ជាក់ថា ក្នុងស្ថានភាពនេះ ធនាគារជាតិនៃកម្ពុជានឹងបន្តធ្វើអន្តរាគមន៍នៅលើទីផ្សារប្តូរប្រាក់ ដើម្បីរក្សាអត្រាប្តូរប្រាក់រៀលធៀបនឹងដុល្លារអាមេរិកឱ្យមានស្ថិរភាពក្នុងកម្រិតសមស្រប តាមស្ថានភាពសេដ្ឋកិច្ច។
លោកទេសាភិបាលបានលើកឡើងទៀតថា ការលើកកម្ពស់ការប្រើប្រាស់ប្រាក់រៀល វិបត្តិកូវីដ-១៩ បានបង្ហាញយ៉ាងច្បាស់ពីតួនាទីមិនពេញលេញនៃនយោបាយរូបិយវត្ថុ ក្នុងការជួយគាំទ្រសេដ្ឋកិច្ច ដូចជា លទ្ធភាពបន្ថយអត្រាការប្រាក់ដើម្បីជំរុញការវិនិយោគ ឬការប្រើប្រាស់ ដោយសារតែកម្រិតខ្ពស់នៃដុល្លារូបនីយកម្ម។ ដូច្នេះការលើកកម្ពស់ការប្រើប្រាស់ប្រាក់រៀលនៅតែបន្តជាការងារអាទិភាពចម្បង ក្នុងការពង្រឹងប្រសិទ្ធភាព អធិបតេយ្យ និងឯករាជ្យនៃនយោបាយរូបិយវត្ថុ សំដៅគាំទ្រកាន់តែសកម្មក្នុងដំណើរការស្តារ និងពង្រឹងភាពធន់នៃសេដ្ឋកិច្ច។ ក្នុងទិសដៅនេះ ធនាគារជាតិនៃកម្ពុជាបាន និងកំពុងចូលរួមគាំទ្រការបោះផ្សាយមូលបត្ររដ្ឋជាប្រាក់រៀល ដែលមិនត្រឹមតែជាប្រភពហិរញ្ញប្បទានរយៈពេលវែងសម្រាប់ការវិនិយោគសាធារណៈប៉ុណ្ណោះទេ តែថែមទាំងជាកម្លាំងចលករដ៏សំខាន់ក្នុងការជំរុញការប្រើប្រាស់ប្រាក់រៀល ក៏ដូចជា ការបង្កើតឧបករណ៍នយោបាយរូបិយវត្ថុថ្មីផ្អែកលើយន្តការទីផ្សារផងដែរ។
កាលពីឆ្នាំ ២០២១កន្លងទៅនេះ ធនាគារជាតិនៃកម្ពុជាបានធ្វើអន្តរាគមន៍លើទីផ្សារប្តូរប្រាក់ តាមរយៈការលក់ប្រាក់ដុល្លារអាមេរិកជាង ៥០០លាន ដើម្បីស្រូបយកប្រាក់រៀលពីសេដ្ឋកិច្ច និងរក្សាអត្រាប្តូរប្រាក់ទីផ្សារឱ្យមានស្ថិរភាពក្នុងរង្វង់ ៤.០៩៩រៀលក្នុងមួយដុល្លារអាមេរិក។ បើធៀបនឹងឆ្នាំ២០១៩ អត្រាប្តូរប្រាក់បានប្រែប្រួលប្រមាណ ១%។ នេះបើតាមលោក ជា ចាន់តូ ទេសាភិបាលធនាគារជាតិនៃកម្ពុជា៕
អត្ថបទ៖ ថូ សិរីវឌ្ឍន៍