Changpeng Zhao គឺជានាយកប្រតិបត្តិ និងជាស្ថាបនិកនៃវេទិកាប្តូរប្រាក់គ្រីបតូ (Crypto) ដ៏ពេញនិយម។ ស្ថាបនិក Binance, លោក Changpeng "CZ" Zhao ដែលក្រុមហ៊ុនរបស់គាត់ គឺជាវេទិកាផ្លាស់ប្តូររូបិយប័ណ្ណគ្រីបតូ ដែលដំណើរការបរិមាណជួញដូរប្រចាំថ្ងៃដ៏ធំបំផុតនៃកាក់គ្រីបតូ បានក្លាយជាមហាសេដ្ឋីលំដាប់កំពូលរបស់ពិភពលោក បន្ទាប់ពីទ្រព្យសម្បត្តិរបស់គាត់បានកើនឡើងដល់ 96 ពាន់លានដុល្លារអាមេរិក នេះបើយោងតាមរបាយការណ៍ថ្មីកាលពីថ្ងៃចន្ទ។

យោងតាមទស្សនាវដ្តី Forbes, ក្រុមហ៊ុន Binance បានឈានដល់ទំហំពាណិជ្ជកម្មសរុបចំនួន 2 ពាន់ពាន់លានដុល្លារ ($2 trillion) ក្នុងឆ្នាំ 2020 ។
ការកើនឡើងនៃទ្រព្យសម្បត្តិចុងក្រោយបំផុតរបស់លោក Zhao បានធ្វើឱ្យគាត់ស្ថិតក្នុងលំដាប់ទាបជាងស្ថាបនិក Oracle លោក Larry Ellison (ដែលទ្រព្យសម្បត្តិសរុបចំនួន $ 109 ពាន់លានដុល្លារ) និង លោក Steve Ballmer ដែលជាម្ចាស់ក្លឹបបាល់បោះ Los Angeles Clippers និងជាអតីតនាយកប្រតិបត្តិរបស់ Microsoft ដែលទ្រព្យសម្បត្តិសរុប $ 112 ពាន់លានដុល្លារ។

គេហៈទំព័រ Bloomberg បានកត់សម្គាល់ថា ទ្រព្យសម្បត្តិសរុបពិតរបស់លោក Zhao អាចមានទំហំធំជាងការរំពឹងទុក ដោយសារប្រាក់ចំណូលលើការវិនិយោគ និង ការកាន់កាប់គ្រីបតូរបស់គាត់ ដែលមិនត្រូវបានគេយកមកពិចារណានោះទេ។ ទោះបីជាលោក Zhao បានបង្កើតក្រុមហ៊ុន Binance នៅក្នុងប្រទេសចិនក៏ដោយ ប៉ុន្តែបច្ចុប្បន្នវាត្រូវបានហាមឃាត់នៅទីនោះ ដោយសារតែបទប្បញ្ញត្តិប្រឆាំងនឹងការជីកយករ៉ែគ្រីបតូ និងការជួញដូរនៅក្នុងប្រទេស។
Binance បាននិយាយនៅក្នុងសេចក្តីថ្លែងការណ៍មួយទៅកាន់ Bloomberg ទាក់ទងនឹងការប៉ាន់ប្រមាណតម្លៃសរុបរបស់លោក Zhao និងការវាយតម្លៃរបស់ក្រុមហ៊ុនថា "គ្រីបតូ  នៅតែស្ថិតក្នុងដំណាក់កាលលូតលាស់របស់វានៅឡើយ" ។ “វាងាយនឹងមានការប្រែប្រួលកម្រិតខ្ពស់។ ចំនួនណាមួយដែលអ្នកឮនៅថ្ងៃណាមួយ នឹងខុសពីចំនួនដែលអ្នកឮនៅថ្ងៃបន្ទាប់។”

លោក Zhao បាននិយាយកាលពីខែកក្កដាឆ្នាំមុននៅក្នុងបទសម្ភាសន៍ជាមួយកាសែត The New York Times ថា “ខ្ញុំមិនដែលចាត់ទុកនរណាម្នាក់ថាជាការប្រកួតប្រជែងនោះទេ។ ប្រសិនបើខ្ញុំមានផ្នត់គំនិតនោះ អ្នកគ្រប់គ្នាគឺជាសត្រូវសម្រាប់ខ្ញុំ សូម្បីតែអាជីវកម្មផ្សេងគ្នាក៏ដោយ ប៉ុន្តែខ្ញុំមានចិត្តគំនិតដ៏សម្បូរបែបមួយ។ ខ្ញុំ គិត ថា  របស់ ភាគ ច្រើន នៅ លើ ពិភពលោក នេះ  គឺមិន មាន ធនធានណាដែល មាន កម្រិតនោះ ទេ។ មិនមែនលុយ, មិនមែនឱកាសអាជីវកម្ម, ហើយ ក៏មិនមែនឧស្សាហ កម្ម គ្រីបតូ  ដែរ»។ ទោះបីជា Binance មិនបង្ហាញជាសាធារណៈនូវប្រាក់ចំណូល ឬហិរញ្ញវត្ថុរបស់ខ្លួនក៏ដោយ វាត្រូវបានប៉ាន់ប្រមាណថា វេទិកាប្តូរប្រាក់ដំណើរការប្រហែល $170 ពាន់លានដុល្លារក្នុងការជួញដូរក្នុងមួយថ្ងៃ។

អត្ថបទដកស្រង់ពី Emily Rella
បកប្រែនិងកែសម្រួលដោយ Mr. Blue