ភ្នំពេញ៖ ទិន្នផលស្រូវរបស់ប្រទេសកម្ពុជា បានកើនឡើងដល់ ១២,២០លានតោន ក្នុងឆ្នាំ ២០២១ កើនឡើង ១១,៦៣ភាគរយ បើធៀបនឹងឆ្នាំ ២០២០ ដែលមានបរិមាណចំនួន ១០,៩៣លានតោន។ នេះបើយោងតាមរបាយការណ៍បឋមរបស់ក្រសួងកសិកម្ម រុក្ខាប្រមាញ់ និងនេសាទ។
ការកើនឡើងនៃទិន្នផលស្រូវឆ្នាំ ២០២១ មានកត្តាសំខាន់ៗមួយចំនួន ក្នុងនោះរួមមាន ការកើនឡើងនៃផ្ទៃដីដាំដុះ, ការបង្កបង្កើនផលរបស់ប្រជាកសិករបានលឿនជាងមុន និងមានបច្ចេកទេសដាំដុះដែលទទួលបានទិន្នផលខ្ពស់ជាងមុនជាមួយការប្រើប្រាស់គ្រឿងចក្រកសិកម្ម និងគួបផ្សំឆ្នាំកន្លងទៅនេះ មានភាពអំណោយផលអាកាសធាតុ ជាពិសេសមានភ្លៀងជោគជំរហូតដល់ចុងរដូវវស្សា។
កំណើនបរិមាណផលស្រូវប្រមូលបាននៅឆ្នាំ ២០២១កន្លងទៅ បានជំរុញដល់ឧស្សាហកម្មនាំចេញស្រូវទៅកាន់ក្រៅប្រទេស ជាពិសេសប្រទេសវៀតណាម មានកំណើនយ៉ាងគំហុក បើទោះតួលេខការនាំចេញអង្ករបានធ្លាក់ចុះគួរឲ្យកត់សម្គាល់ក៏ដោយក្តី។ យោងតាមរបាយការណ៍ពីក្រសួងកសិកម្ម បានឲ្យដឹងទៀតថា ការនាំចេញអង្កររបស់ប្រទេសកម្ពុជា នៅឆ្នាំ ២០២១ សម្រេចបានក្នុងបរិមាណសរុប ៦១ម៉ឺនតោន បានធ្លាក់ចុះ ១០,៦៨ភាគរយ បើធៀបនឹងឆ្នាំ ២០២០។ ជាមួយគ្នានេះ តម្លៃនៃការនាំចេញអង្ករសរុបបានធ្លាក់ចុះ ២ភាគរយ មកនៅត្រឹម ៥២៧លានដុល្លារ។
ចំណែកការនាំចេញស្រូវនៅឆ្នំា ២០២១ មានកំណើន ៦១,១៦ភាគរយ ពោលគឺកើនដល់ ៣,៥២លានតោន ខណៈតម្លៃនាំចេញសរុបប្រមាណ ៦៣១លានដុល្លារ ធ្លាក់ចុះ ១៣,៥៦ភាគរយ បើធៀបនឹងឆ្នាំ ២០២០៕
