វៀតណាម៖ ប្រទេសវៀតណាម បាននាំចេញបង្គាក្នុងតម្លៃទឹកប្រាក់ជាង ៣,៨ពាន់លានដុល្លារ ទៅកាន់ទីផ្សារក្រៅប្រទេស នៅក្នុងឆ្នាំ ២០២១ ជាមួយកំណើន ៣ភាគរយ បើធៀបនឹងឆ្នាំ ២០២០។ តួលេខនៃតម្លៃនាំចេញនេះ ស្មើនឹង ៤៥ភាគរយ នៃប្រាក់ចំណូលរបស់ប្រទេសវៀតណាមបានមកពីការនាំចេញផលិតផលនេសាទសរុបរបស់ខ្លួន។ នេះបើយោងតាមសមាគមអ្នកនាំចេញ និងផលិតអាហារសមុទ្រវៀតណាម (VASEP)។

ទិន្នន័យពី VASEP បង្ហាញថា វៀតណាមកំពុងចិញ្ចឹមបង្គាលើផ្ទៃដីសរុបជាង ៧៤ម៉ឺនហិកតា ជាមួយនឹងទិន្នផលប្រចាំឆ្នាំជាមធ្យមជាង ៩០ម៉ឺនតោន។ វៀតណាមគឺជាប្រទេសផលិតបង្គាខ្លាធំជាងគេលើពិភពលោក (ហៅម្យ៉ាងទៀតថាបង្គាខ្លាខ្មៅ) ជាមួយនឹងទិន្នផលលើសពី ២៥ម៉ឺនតោនក្នុងមួយឆ្នាំ។ 

ផលិតភាពនៃការចិញ្ចឹមបង្គាបានប្រសើរឡើងឥតឈប់ឈរពីឆ្នាំ ២០១៦-២០២១ នៅក្នុងកំណើនប្រចាំឆ្នាំ ១០ភាគរយនៃទិន្នផល ទោះបីជាតំបន់កសិកម្មបានពង្រីកត្រឹមតែ ១,៥ភាគរយក្នុងមួយឆ្នាំក៏ដោយ។ VASEP បានព្យាករណ៍ថា ទិន្នផលបង្គានឹងកើនឡើងប្រហែល ៩ ភាគរយជារៀងរាល់ឆ្នាំនៅចន្លោះឆ្នាំ ២០២២ ដល់ឆ្នាំ ២០២៥ ហើយនៅឆ្នាំ ២០២៥ ការនាំចេញបង្គាអាចឈានដល់ ៥,៦ពាន់លានដុល្លារ៕