កោះកុង៖ សមត្ថកិច្ចនគរបាលបានចុះអន្តរាគមន៍ឃាត់ខ្លួនបុរសម្នាក់ បន្ទាប់ពីប្រើអំពើហិង្សាដោយចេតនា បណ្តាលឲ្យបុរសម្នាក់រងរបួសឆ្អឹងជំនរ។ ករណីនេះកើតឡើងនៅចំណុចផែទិញផលនេសាទ ស្ថិតក្នុងភូមិនាងកុក ឃុំប៉ាក់ខ្លង ស្រុកមណ្ឌលសីមា ខេត្តកោះកុង វេលាម៉ោង២០និង១០នាទី ថ្ងៃទី០៤ ខែមករា ឆ្នាំ២០២២ ដោយសាររឿងគំនុំ។

ជនបង្កឈ្មោះ ផុង ឌៀប ភេទប្រុស អាយុ៣៧ឆ្នាំ មុខរបរកម្មករទូក ស្នាក់នៅលើទូកនេសាទ បានយកដែកឆាបទៅចាក់ឈ្មោះ អែម សុខគឹមនី ហៅ ពិន ដន ភេទប្រុស អាយុ៣០ឆ្នាំ កម្មករទូកដូចគ្នា ស្នាក់នៅផ្ទះជួល ភូមិ១ ប៉ាក់ខ្លង រងរបួសឆ្អឹងជំនីរខាងស្ដាំ។ ចំណែកឈ្មោះ អែម សុខគឹមនី បានយកប៉ែលចូកត្រី ទៅវាយឈ្មោះ ផុង ឌៀប ត្រូវរបួសដៃ និងក្បាលវិញផងដែរ។ 

ក្រោយកើតហេតុកម្លាំងនគរបាលចុះអន្តរាគមន៍បញ្ជូនជនរងគ្រោះទៅព្យាបាលនៅមន្ទីរពេទ្យខេត្ត និងឃាត់ខ្លួន ឈ្មោះ ផុង ខៀប ដើម្បីបំពេញសំណុំរឿងទៅការិយាល័យជំនាញខេត្ត ចាត់ការបន្ត៕