AP-

កូរ៉េខាងជើងបានបាញ់កាំជ្រួចដែលគេសង្ស័យថា ជាបាលីស្ទីលមីស៊ីលចូលទៅក្នុងសមុទ្ទកាលពីថ្ងៃពុធ, យោធាកូរ៉េខាងត្បូងនិងជប៉ុនបាននិយាយ, វាជាការបាញ់ជាសាធារណៈក្នុងរយៈពេលប្រហែលជា២ខែ និងជាសញ្ញាដែលថាទីក្រុងព្យុងយ៉ាងមិនចាប់អារម្មណ៍ក្នុងការចូលរួមឡើងវិញ ក្នុងការជជែកពីការដែលគ្មានការរីកសាយភាយអាវុធនុយគ្លេអ៊ែរក្នុងពេលណាមួយឆាប់ៗខាងមុខនេះទេ ដែលបែរជាផ្តោតទៅលើការប្រឹងពង្រីកឃ្លាំងអាវុធរបស់ខ្លួន។

ការបាញ់ជាចុងក្រោយនេះបានលេចចេញមក បន្ទាប់ពីមេដឹកនាំកូរ៉េខាងជើង Kim Jung Un បានប្តេជ្ញាចិត្តថានឹងពង្រីកនូវសមត្ថភាពរបស់កងទ័ពខ្លួនបន្ថែមទៀត នៅក្នុងកិច្ចប្រជុំដ៏ធំក្នុងមហាសន្និបាតរបស់បក្សកាលពីសប្តាហ៍មុនជាមួយមន្ត្រីជាន់ខ្ពស់នៅក្នុងបក្ស ដោយមិនបានបញ្ចេញឲ្យដឹងពីគោលនយោបាយទៅកាន់សហរដ្ឋអាមេរិកឬកូរ៉េខាងត្បូង។ សេនាធិការរួមកូរ៉េខាងត្បូងបាននិយាយនៅក្នុងសេចក្តីថ្លែងការណ៍មួយថា កូរ៉េខាងជើងបានបាញ់កាំជ្រួចដែលគេសង្ស័យថាជាបាលីស្ទីកមីស៊ីល ឆ្ពោះទៅកាន់ដែនទឹកភាគខាងកើតកាលពីព្រឹកថ្ងៃពុធ ព្រមទាំងបាននិយាយថា អាជ្ញាធរផ្នែកចារកម្មសហរដ្ឋអាមេរិក និងកូរ៉េខាងត្បូង កំពុងតែព្យាយាមវិភាគព័ត៌មានបន្ថែមទៀតអំពីការបាញ់នេះ។

ក្រសួងការពារប្រទេសជប៉ុនក៏បានស៊ើបអង្កេតផងដែរអំពីការបាញ់របស់កូរ៉េខាងជើង ដោយបាននិយាយថាប្រទេសនេះបានបាញ់មីស៊ីល។ "យើងប្រាកដជាបានឃើញ និងគួរឲ្យសោកស្តាយដែលកូរ៉េខាងជើងបានបន្តបាញ់មីស៊ីលទៀតបន្ទាប់ពីឆ្នាំមុន" នាយករដ្ឋមន្ត្រីជប៉ុន Fumo Kishida បានប្រាប់អ្នកយកព័ត៌មាន។ Kishida បាននិយាយទៀតថា ការលំអិតអំពីការបាញ់របស់កូរ៉េខាងជើងមិនអាចធ្វើបានភ្លាមៗក្នុងពេលនេះទេ រួមបញ្ចូលទាំង តើមីស៊ីលនោះបានធ្លាក់ចំកន្លែងណា និងថាតើមានការខូចខាតដែរឬទេ?។ លោកនិយាយថា លោកបានបញ្ជាមន្ត្រីឲ្យបញ្ជាក់ពីសុវត្តិភាពនៃនាវា និងយន្តហោះនៅក្នុងកន្លែងដែលមីស៊ីលបានហោះនិងធ្លាក់ចុះ។

រដ្ឋការលោក Biden បាននិយាយហើយនិយាយទៀតថា នឹងបើកចំហរដើម្បីបន្តនូវការជជែកជាមួយកូរ៉េខាងជើងអំពីគោលនយោបាយនុយគ្លេអ៊ែរនៅកន្លែងណាមួយ និងក្នុងពេលណាមួយដោយគា្មនលក្ខ័ណទុកជាមុន។ រហូតមកទល់ពេលនេះកូរ៉េខាងជើងនៅតែច្រានចោលនូវការបើកចំហរនេះ ដោយនិយាយថាអរិភាពរបស់សហរដ្ឋអាមេរិកនៅតែឥតផ្លាស់ប្តូរ។ ប្រធានាធិបតីដែលនឹងចេញពីតំណែង Moon Jae-in បាននិយាយនៅក្នុងការថ្លែងសុន្ទរកថា ឆ្នាំថ្មីរបស់លោកកាលពីថ្ងៃអង្គារ៍ថា លោកនឹងបន្តនូវការស្វែងរកមធ្យោបាយ ដើម្បីធ្វើឲ្យមានឡើងវិញនូវចំណងទាក់ទងជាមួយកូរ៉េខាងជើង និងជំរុញឲ្យមានសន្តិភាពនៅលើឧបទ្វីបកូរ៉េរហូតដល់ចប់អាណត្តិរបស់លោកក្នុងខែឧសភា៕