ភ្នំពេញ៖ ក្នុងឆ្នាំ ២០២១កន្លងទៅនេះ ធនាគារជាតិនៃកម្ពុជា បានធ្វើអន្តរាគមន៍ទៅលើទីផ្សារប្តូរប្រាក់ដោយបញ្ចេញថវិកាប្រមាណ ៥០០លានដុល្លារអាមេរិក ដើម្បីរក្សាស្ថិរភាពអត្រាប្តូរប្រាក់ផ្អែកតាមមូលដ្ឋាននៃការប្រែប្រួលសេដ្ឋកិច្ច។ នេះបើតាមរបាយការណ៍ស្តីពីវឌ្ឍនភាពម៉ាក្រូសេដ្ឋកិច្ច និងវិស័យធនាគារឆ្នាំ ២០២១ និងទស្សនវិស័យឆ្នាំ ២០២២ របស់ធនាគារជាតិនៃកម្ពុជា។

របាយការណ៍ដដែលនេះបញ្ជាក់ថា ការបញ្ចេញប្រាក់ដុល្លារអាមេរិកនេះ បានជួយរក្សាអត្រាប្តូរប្រាក់ទីផ្សារឲ្យមានស្ថិរភាព ក្នុងរង្វង់ ៤០៩៩រៀលក្នុងមួយដុល្លារអាមេរិក ដែលបានថយថ្លៃប្រមាណ១% បើធៀបនឹងឆ្នាំ២០១៩។ 

របាយការណ៍បន្តថា ការបង្កើនចំណាយសាធារណៈ គួបផ្សំនឹងការថយចុះតម្រូវការប្រាក់រៀល បានដាក់សម្ពាធលើប្រាក់រៀលឱ្យថយថ្លៃ ជាពិសេសក្នុងបរិការណ៍ដែលកម្ពុជា មានកម្រិតដុល្លារូបនីយកម្មខ្ពស់។ ដើម្បីរក្សាស្ថិរភាពតម្លៃប្រាក់រៀល ដែលរួមចំណែកការពារអំណាចទិញរបស់ប្រជាជន ធនាគារជាតិនៃកម្ពុជា បានធ្វើអន្តរាគមន៍ស្រូបយកប្រាក់រៀលពីទីផ្សារជាបន្តបន្ទាប់ ប្រមាណជាង ៥០០លានដុល្លារអាមេរិក និងបានរក្សាអត្រាប្តូរប្រាក់ទីផ្សារឱ្យ មានស្ថិរភាពក្នុងរង្វង់ ៤០៩៩រៀលក្នុងមួយដុល្លារអាមេរិក ដោយបានថយថ្លៃប្រមាណ ១%ធៀបនឹងឆ្នាំ២០១៩។

ស្ថិរភាពអត្រាប្តូរប្រាក់ និងការគ្រប់គ្រងបរិមាណសាច់ប្រាក់ ក្នុងសេដ្ឋកិច្ចសមស្រប បានរួមចំណែកយ៉ាងសំខាន់ ក្នុងការរក្សាស្ថិរភាពថ្លៃ ដោយអត្រាអតិផរណាមានកម្រិតទាប ២,៩%។ អតិផរណានៅឆ្នាំ២០២១ រួមចំណែកដោយការងើបឡើងវិញនៃថ្លៃទំនិញ និងសេវាពាក់ព័ន្ធនឹងប្រេងឥន្ធនៈ ខណៈដែលថ្លៃម្ហូបអាហារ និងអតិផរណាស្នូលបានថយល្បឿនមកវិញ។ 

ផ្អែកលើទស្សនវិស័យខាងលើនេះ សេដ្ឋកិច្ចកម្ពុជាត្រូវបានរំពឹងដោយសុទិដ្ឋិនិយមថា បន្តងើបឡើងបន្ថែមទៀត ក្នុងអត្រាប្រមាណ ៥% នៅឆ្នាំ ២០២២។ អតិផរណារួមសម្រាប់ឆ្នាំ ២០២២ ត្រូវបានធនាគារជាតិនៃកម្ពុជាព្យាករថា នឹងមានអត្រា ២,៦ភាគរយ ដោយសារកំណើនទាប នៃក្រុមម្ហូបអាហារ ដែលជំរុញដោយភាពប្រសើរឡើងនៃការផ្គត់ផ្គង់ និងការថមថយកំណើនថ្លៃទំនិញ និងសេវាពាក់ព័ន្ធនឹងប្រេងឥន្ធនៈ ហើយអត្រាប្តូរប្រាក់ផ្លូវការបន្តមានស្ថិរភាព ក្នុងរង្វង់ ៤០៧៥រៀលក្នុងមួយដុល្លារអាមេរិក។

ធនាគារជាតិនៃកម្ពុជា នឹងបន្តដាក់ចេញគោលនយោបាយគាំទ្រនានា សំដៅបន្តពង្រឹងការចូលរួមរបស់ប្រព័ន្ធធនាគារក្នុងការគាំទ្រការងើបឡើងវិញនៃសេដ្ឋកិច្ច ព្រមទាំងរក្សាស្ថិរភាពថ្លៃ និងហិរញ្ញវត្ថុ៕