អ្នកទាំងអស់គ្នាធ្លាប់ឆ្ងល់ទេថា ហេតុអ្វីបានជាតារាល្បីៗ មានភាពរឹងមាំខ្លាំង ព្រោះនៅក្នុងជីវិតរបស់ពួកគេតែងតែជួបនូវរឿងលំបាកជាច្រើន ដូចជាការបាក់ទឹកចិត្ត ការបដិសេធ ឬការវាយប្រហារពីអ្នករិះគន់ជាដើម។ ដូច្នេះ មកស្តាប់ពីជីវិតរបស់ Taylor Swift ទាំងអស់គ្នាថា តើជីវិតរបស់នាងធ្លាប់ឆ្លងកាត់ឧបសគ្គយ៉ាងណាខ្លះ រហូតដល់នាងមានភាពល្បីល្បាញខ្លាំងបែបនេះ?
Taylor Swift តែងតែចូលចិត្តតន្ត្រីតាំងពីនៅក្មេង ហើយនៅពេលនាងមានអាយុ 10 ឆ្នាំ នាងបានច្រៀងនៅក្នុងកម្មវិធីក្នុងស្រុកជាច្រើនរួចទៅហើយ។ ប៉ុន្តែជីវិតកុមារភាពរបស់នាងមិនមានភាពស្រស់ស្អាតទាំងអស់នោះទេ ព្រោះនាងមិនសូវមានប្រជាប្រិយភាពនៅសាលា ហើយថែមទាំងតែងតែត្រូវបានក្មេងៗដទៃទៀតធ្វើបាបផងដែរ។ ពួកគេតែងតែមើលឃើញនាងជាក្មេងចម្លែកម្នាក់ ដែលចូលចិត្តតន្ត្រីប្រភេទ Country ខុសពីក្មេងៗផ្សេងទៀតនៅក្នុងសាលា ដូច្នេះគេលេងសើចនឹងនាង។ Taylor ពិតជាពិបាកចិត្តខ្លាំងណាស់ ព្រោះនាងមិនមានមិត្តភក្តិលេងជាមួយដូចគេនោះទេ។
"មានវិធីពីរយ៉ាងដែលអ្នកដោះស្រាយជាមួយការឈឺចាប់ គឺអ្នកបណ្តោយឲ្យវាបំផ្លាញអ្នក ឬអ្នកអាចប្រើវាជាថាមពលបន្ថែម ដើម្បីជំរុញអ្នកឲ្យបន្តទៅមុខ។"
ដូច្នេះ នៅអាយុ 11 ឆ្នាំ នាងបានចាប់ផ្ដើមនិពន្ធបទចម្រៀងផ្ទាល់ខ្លួន ដែលមានការបំផុសគំនិតដោយអារម្មណ៍របស់នាងផ្ទាល់។ នាងក៏ធ្លាប់ធ្វើដំណើរទៅទីក្រុងញូវយ៉ក ដើម្បីរៀនច្រៀងនិងសម្តែងព្រមទាំងបានទទួលការសម្តែងក្នុងកម្មវិធីជាច្រើន ក្នុងអំឡុងពេលចុងសប្តាហ៍ផងដែរ។ នាងក៏ធ្លាប់បានចូលរួមប្រកួតក្នុងកម្មវិធីទេពកោសល្យផ្សេងៗជាច្រើនកន្លងមក ប៉ុន្តែមិនដែលបានទទួលលទ្ធផលល្អនោះទេ។ តាំងពីក្មេងមក Taylor បានដឹងខ្លួនឯងច្បាស់ថា នាងត្រូវការកិច្ចព្រមព្រៀងថតសម្លេងមួយ ដូច្នេះហើយទើបនាងបានផ្ញើខ្សែអាត់សម្លេងរបស់នាងទៅកាន់ក្រុមហ៊ុនថតសម្លេងជាច្រើនហើយពួកគេសុទ្ធតែនិយាយថា ទេ ពីព្រោះតែពួកគេមិនបានឃើញអ្វីពិសេសនៅក្នុងខ្លួននាងឡើយ ហើយក៏មានយុវជនជាច្រើនដែលធ្វើរឿងដូចគ្នានេះដែរ។ នាងមានការខកចិត្តជាខ្លាំង ប៉ុន្តែនាងមិនឈប់ ឬបោះបង់នោះទេ។
"កុំជឿនរណាម្នាក់ដែលប្រាប់អ្នកថា អ្នកមិនសមនឹងទទួលបានអ្វីដែលអ្នកចង់បាន"
បន្ទាប់ពីត្រូវបានគេបដិសេធជាច្រើនដង នាងបានតាំងចិត្តថានឹងធ្វើឱ្យខ្លួននាង ជាមនុស្សដែលមិនអាចជំនួសបាន និងមានលក្ខណៈពិសេសផ្ទាល់ខ្លួន។
"គ្រប់ពេលដែលនរណាម្នាក់ប្រាប់ខ្ញុំថា ខ្ញុំមិនអាចធ្វើអ្វីមួយបាន ខ្ញុំចង់ធ្វើវាកាន់តែខ្លាំង"
ដូច្នេះនៅអាយុ 12 ឆ្នាំ នាងបានរៀនលេងហ្គីតា ហើយចាប់ផ្តើមបង្កើតតន្ត្រីផ្ទាល់ខ្លួន។ Taylor Swift បានទទួលយកលក្ខណៈពិសេសរបស់នាង ហើយទីបំផុតនាងទទួលបានកិច្ចព្រមព្រៀងថតសម្លេងមួយ។ ចាប់តាំងពីពេលនោះមក នាងទទួលបានភាពជោគជ័យជាបន្តបន្ទាប់។ នាងបានឈ្នះពានរង្វាន់ Grammys ចំនួន 11 ហើយនាងថែមទាំងបានបំបែកកំណត់ត្រាពិភពលោក Guinness ជាច្រើនផងដែរ។ Taylor បានលក់អាល់ប៊ុមបានច្រើនជាង ១០០ លានអាល់ប៊ុម ហើយបានក្លាយជា Best Selling Musicians នៅក្នុងពិភពលោក។ ហើយនាងត្រូវបានគេស្រលាញ់ និងសរសើរពីអ្នកគាំទ្រជាច្រើន ប៉ុន្តែនាងក៏ជាជនរងគ្រោះនៃការអាម៉ាស់មុខជាសាធារណៈផងដែរ។ នាងត្រូវបានគេរិះគន់ឥតឈប់ឈរអំពីជីវិតឯកជនរបស់នាង។ ជាច្រើនឆ្នាំមកនេះ នាងបានទទួលការនិយាយអវិជ្ជមានលើរាងកាយរបស់នាង ជីវិតស្នេហារបស់នាង និងអ្វីៗផ្សេងៗជាច្រើនទៀត។ នាងថែមទាំងត្រូវបានគេហៅថាជាពស់ទៀតផង។ ហេតុនេះហើយ ទើបនាងធ្លាប់បានបង្អត់អាហារខ្លួនឯង និងធ្វើលំហាត់ប្រាណឥតឈប់ឈរ ដើម្បីកុំឲ្យមនុស្សទាំងនោះមានរឿងនិយាយអវិជ្ជមានណាមួយអំពីរូបរាងកាយរបស់នាង។ ប៉ុន្តែគួរឲ្យសោកស្ដាយ ការធ្វើបែបនេះបានបណ្ដាលឲ្យនាងមានជំងឺការញ៉ាំភាពមិនប្រក្រតី ។ ខណៈពេលដែលនាងកំពុងទទួលបានពានរង្វាន់សម្រាប់ Best Female Video មានតារាចម្រៀងម្នាក់ទៀតបានយកមីក្រូហ្វូនពីដៃរបស់នាង ហើយនិយាយថា នាងមិនសាកសមនឹងទទួលបានពានរង្វាន់នោះទេ។ វាបានវាយប្រហារផ្លូវចិត្តរបស់នាងយ៉ាងខ្លាំង ហើយអ្វីៗគ្រប់យ៉ាងត្រូវបានផ្លាស់ប្តូរ ព្រោះនាងធ្លាប់ជាមនុស្សរឹងមាំ ប្រែក្លាយជាមនុស្សទន់ខ្សោយចាប់ពីនោះមក ដូច្នេះហើយទើបនាងមានអារម្មណ៍ថា ដល់ពេលដែលនាងត្រូវសម្រាកពីអ្វីៗទាំងអស់ហើយ។
“គ្មាននរណាបានឃើញខ្ញុំនៅខាងក្រៅពេញមួយឆ្នាំ។ ខ្ញុំគិតថា នេះគឺជាអ្វីដែលពួកគេចង់បាន"។
នាងបានចំណាយពេលគិតឡើងវិញថា នាងមិនដែលសប្បាយចិត្តអស់រយៈពេលជាច្រើនឆ្នាំមកនេះ ដោយសារតែនាងត្រូវការការអាណិតស្រលាញ់ពីមនុស្សជុំវិញខ្លួនរបស់នាងខ្លាំងពេក។
“ខ្ញុំបានក្លាយជាមនុស្សម្នាក់ដែលគ្រប់គ្នាចង់បានហើយ” ។
នាងបានភ្លេចអ្វីដែលជារបស់ខ្លួននាងនៅពេលនោះ "នៅពេលដែលអ្នកត្រូវការការយល់ព្រមពីអ្នកដទៃ ដើម្បីធ្វើអ្វីមួយក្នុងជីវិតរបស់អ្នក រឿងអាក្រក់មួយកើតឡើង អាចធ្វើឱ្យអ្វីៗគ្រប់យ៉ាងទាំងអស់ដួលរលំនៅក្នុងជីវិតរបស់អ្នក" ។
ប៉ុន្តែដល់ពេលនាងត្រឡប់មកវិញ នាងលែងត្រូវការការយល់ព្រមពីអ្នកណាទៀតឡើយ។ នាងស្គាល់អ្វីជារបស់ខ្លួននាងច្បាស់ជាងមុន ហើយឈប់ខ្វល់ពីអ្វីដែលអ្នកដទៃគិតទៀតហើយ។ នាងបានផ្ដោតលើការធ្វើអ្វីមួយដែលនាងធ្វើបានល្អបំផុត គឺការបង្កើតតន្ត្រី ហើយនាងមិនដែលមានពេលណាសប្បាយចិត្តជាងនេះនោះទេ។ យើងទាំងអស់គ្នាបានដឹងយ៉ាងច្បាស់ថា វាជារឿងធម្មជាតិនោះទេ ដែលមនុស្សម្នាក់ៗចង់ត្រូវការការអាណិតស្រលាញពីមនុស្សជុំវិញខ្លួនរបស់ពួកគេ ដូច្នេះហើយ ទើបយើងរស់នៅក្នុងភាពភ័យខ្លាចនៃការមិនពេញចិត្តរបស់អ្នកដទៃ។ យើងព្យាយាមបំភ្លេចពីក្តីសុបិន និងគំនិតរបស់យើង ហើយទីបញ្ចប់យើងបានបាត់បង់ខ្លួនឯងនៅក្នុងទីដ៏ងងឹតមួយ ដែលមិនដឹងដើរទៅផ្លូវណា។ អញ្ចឹង ពួកយើងចង់ប្រាប់អ្នកថា អ្នកនឹងមិនអាចបញ្ឈប់មនុស្សពីការវិនិច្ឆ័យអ្នកបានទេ ហើយនោះជាការពិត។ ប៉ុន្តែអ្នកអាចបញ្ឈប់វាមិនឱ្យមានឥទ្ធិពលដល់អ្នកបាន ព្រោះមិនមាននរណាម្នាក់ពិសេស ហើយល្អឥតខ្ចោះនោះទេ។ ជារៀងរាល់ថ្ងៃ យើងតែងតែបារម្ភថា មានអ្នកដ៏ទៃអាចវិនិច្ឆ័យយើង ប៉ុន្តែការពិត គឺនៅក្នុងជីវិតដ៏មមាញឹកនាពេលបច្ចុប្បន្ននេះ គ្មាននរណាម្នាក់មានពេលគិតដល់យើងលើសពី 5 វិនាទីនោះទេ។ នៅពេលពួកគេចូលគេង ពួកគេមិនមានពេលគិតពីអ្នកនោះទេ ព្រោះពួកគេត្រូវការគិតអំពីបញ្ហារបស់ពួកគេផងដែរ ដូច្នេះកុំព្យាយាមយកការគិតច្រើនរបស់អ្នកលាយលំជាមួយជីវិតពិតនោះ។ ត្រូវជឿជាក់លើខ្លួនឯង ហើយឈប់ខ្វល់ពីអ្វីដែលអ្នកដទៃគិត។ អ្នកមានជីវិតតែមួយគត់ដើម្បីរស់នៅ សូមព្យាយាមធ្វើវាឲ្យមានន័យបំផុតសម្រាប់អ្នក។ មនុស្សនឹងនៅតែវិនិច្ឆ័យអ្នកដដែល ហេតុអ្វីអ្នកត្រូវខ្លាចក្នុងការធ្វើអ្វីដែលអ្នកចង់បាន។ តែត្រូវចាំថា ធ្វើអ្វីដែលអ្នកស្រលាញ់ ចង់បាន ដើម្បីសម្រេចបំណងរបស់អ្នក ប៉ុន្តែកុំឲ្យប៉ះពាល់ដល់ជីវិតប្រចាំថ្ងៃរបស់អ្នកដទៃ៕
