ភ្នំពេញ៖ ក្រុមអ្នកតវ៉ា និងក្រុមហ៊ុនណាហ្គាវើល នៅពុំទាន់រកដំណោះស្រាយឃើញនៅឡើយទេ ទោះបីពួកគេបានជួបប្រជុំក្រោមការសម្របសម្រួលដោយក្រសួងការងារ និងបណ្តុះបណ្ដាលវិជ្ជាជីវៈ ជាច្រើនលើកក៏ដោយ។

យោងតាមសេចក្ដីប្រកាសព័ត៌មាន របស់ក្រសួងការងារ និងបណ្តុះបណ្ដាលវិជ្ជាជីវៈ បានឲ្យដឹងថា កិច្ចប្រជុំកាលពីរសៀលថ្ងៃទី២៣ ខែធ្នូ ឆ្នាំ២០២១ គឺភាគីទាំងពីរនៅពុំទាន់យល់ព្រមបញ្ចប់វិវាទគ្នានៅឡើយទេ ដោយសារទី១-តំណាងក្រុមហ៊ុន នឹងពិចារណាលើរូបមន្តក្នុងការគណនាប្រាក់បំណាច់បញ្ចប់កិច្ចសន្យាការងារជូន កម្មករនិយោជិតចំនួន ៨៥នាក់ ដែលបានឯកភាពទទួលយកការទូទាត់ប្រាក់បំណាច់បញ្ចប់កិច្ចសន្យាការងារស្របតាមច្បាប់ ក្រោមការសម្របសម្រួលរបស់ក្រសួង ប៉ុន្តែក្រុមហ៊ុនមិនព្រមទទួលយកកម្មករនិយោជិត ដែលកំពុងតវ៉ាផ្សេងទៀតឱ្យចូល ធ្វើការវិញទេ។

ទី២-តំណាងកម្មករនិយោជិតទាមទារឱ្យដោះស្រាយជាកញ្ចប់ ដោយតម្រូវឱ្យក្រុមហ៊ុនទទួលយកកម្មករនិយោជិត ដែលកំពុងតវ៉ាឱ្យចូលធ្វើការជាមុន ទើបកម្មករនិយោជិតចំនួន ៨៥នាក់ផ្សេងទៀត ព្រមទទួលយកការទូទាត់ប្រាក់បំណាច់បញ្ចប់កិច្ចសន្យាការងារស្របតាមច្បាប់។

សូមមបញ្ជាក់ថា ការតវ៉ារបស់បុគ្គលិកក្រុមហ៊ុនណាហ្គាវើល បានកើតឡើងក្រោយពីក្រុមហ៊ុនបានកាត់បុគ្គលិក ចំនួន៣៦៥នាក់ ចេញពីការងារនៅអំឡុងដើមឆ្នាំ និងពាក់កណ្តាលឆ្នាំ២០២១កន្លងទៅ។ ពួកគេបានទាមទារឱ្យក្រុមហ៊ុនទទួលយកបុគ្គលិកទាំង៣៦៥នាក់ ចូលធ្វើការវិញ និងទាមទារលក្ខខណ្ខការងារមួយចំនួនផងដែរ ។

ក្រុមហ៊ុនណាហ្គាវើល ធ្លាប់បានបញ្ជាក់ថា ការកាត់បន្ថយ និងបញ្ឈប់បុគ្គលិកមួយចំនួន គឺបន្ទាប់ពីក្រុមហ៊ុនជួបវិបត្តិដោយសារការរាតត្បាតជំងឺកូវីដ-១៩។

អាជ្ញាធររាជធានីភ្នំពេញ បានជំរុញដល់អ្នកតវ៉ា និងអ្នកពាក់ព័ន្ឋទាំងអស់ ត្រូវរកដំណោះស្រាយជាមួយក្រសួងការងារ និងបណ្ដុះបណ្ដាលវិជ្ជាជីវៈ និងក្រុមប្រឹក្សាអាជ្ញាកណ្ដាល និងបានចាត់ទុកការធ្វើបាតុកម្ម និងកូដកម្ម របស់បុគ្គលិកក្រុមហ៊ុនណាហ្គាវើលថា ជារឿងខុសច្បាប់ ៕

អត្ថបទ ៖ លាង ឡា