ភ្នំពេញ៖ សម្តេច ក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានសម្តែងក្តីបារម្ភចំពោះសកម្មភាពលួចនាំចូលសារធាតុសំយោគផលិតគ្រឿងញៀន និងទាមទារឱ្យអាជ្ញាធរ និងសាធារណជន រួមគ្នាទប់ស្កាត់ការជួញដូរគ្រឿងញៀន។

មានប្រសាសន៍ក្នុងពិធីសម្ពោធអគារមណ្ឌលទទួលពលករកំរៀង នៅក្នុងខេត្តបាត់ដំបង នាព្រឹកថ្ងៃទី២០ ខែធ្នូ ឆ្នាំ២០២១នេះ សម្តេច ក្រឡាហោម ស ខេង រដ្ឋមន្រ្តីក្រសួងមហាផ្ទៃ បានលើកឡើងថា គ្រឿងញៀនសំយោគ ដែលផ្សំឡើងដោយសារធាតុគីមី ត្រូវបានគេនាំចូល ដែលពិបាកក្នុងការត្រួតពិនិត្យ ព្រោះក្រុមឈ្មួញបាននាំចូលម្ដងមួយមុខៗ ក្រោមរូបភាពជាសារធាតុផលិតជី ឬជាប្រយោជន៍ផ្សេងៗ ជាហេតុធ្វើឱ្យខូចមុខមាត់ និងកិត្តិនាមប្រទេសជាតិ។

រដ្ឋមន្រ្តីក្រសួងមហាផ្ទៃ បានមានប្រសាសន៍ដែរថា មេជួញដូរគ្រឿងញៀន ភាគច្រើន មានវត្តមាននៅក្រៅប្រទេស និងខ្លះនៅក្នុងប្រទេស ប៉ុន្តែសមត្ថកិច្ចបានខិតខំប្រែងបង្រ្កាប ចាប់ខ្លួនជាបន្តបន្ទាប់ ។ សម្តេច ក្រឡាហោម បានជំរុញដល់អាជ្ញាធរពាក់ព័ន្ឋទាំងអស់ត្រូវខិតខំប្រឹងប្រែងដើម្បីទប់ស្កាត់បញ្ហាគ្រឿងញៀន។

សូមរម្លឹកថា នាពេលថ្មីៗនេះ សមត្ថកិច្ចបានបង្ក្រាបករណីគ្រឿងញៀនដ៏ធំមួយ នៅក្នុងរោងចក្រផលិតដំណាំស្វាយមួយកន្លែង ឈ្មោះ ហ្វាមអេស៊ាង.ក ស្ថិតនៅភូមិដំបងវេញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ ដោយឃាត់ខ្លួនជនពាក់ព័ន្ឋជាច្រើននាក់ និងរឹបអូសវត្ថុតាង មានដូចជា ម្សៅស សង្ស័យ កេតាមីន(KE- TAMIN) ចំនួន៧៤ការ៉ុង ក្នុង១ការ៉ុង ២០កញ្ចប់ធំ ស្មើប្រមាណ ១៤៨០គីឡូក្រាម ទាំងសំបក និងសារធាតុគីមី និងឧបករណ៍កែច្នៃគ្រឿងញៀនមួយចំនួនធំទៀត។

ជុំវិញករណីនេះ លោកឧត្តមសេនីយ៍ ម៉ក់ ជីតូ អគ្គស្នងការរង នគរបាលជាតិ ធ្លាប់មានប្រសាសន៍ប្រាប់អ្នកសារព័ត៌មាននាពេលថ្មីៗនេះថា ករណីនេះ មិនទាន់បិទបញ្ចប់នៅឡើយទេ ដោយត្រូវតាមដានបន្តទៀត។ លោកបានបញ្ជាក់ថា កម្ពុជា គឺជាប្រទេសមួយដែលរងគ្រោះដោយសារគ្រឿងញៀនក្នុងកម្រិតមួយស្រាលជាងគេ បើប្រៀបធៀបជាមួយនឹងប្រទេសជិតខាង ។

លោកឧត្តមសេនីយ៍ បញ្ជាក់ថា ករណីគ្រឿងញៀន នៅស្រុកឱរ៉ាល់ ខេត្តកំពង់ស្ពឺ គឺជាករណីធំជាងគេប្រចាំឆ្នាំ២០២១ ហើយការកែច្នៃសារធាតុញៀននេះ គឺដើម្បីនាំចេញទៅក្រៅប្រទេស ។

អគ្គស្នងការរង នគរបាលជាតិ បានគូសបញ្ជាក់ថា រយៈពេលជាង១១ខែ នៃឆ្នាំ២០២១នេះ កម្ពុជាធ្វើប្រតិបត្តិការបង្ក្រាបគ្រឿងញៀន បានជាង៥០០០ករណី និងឃាត់ខ្លួនបានជនសង្ស័យជាង១ម៉ឺននាក់ ព្រមទាំងរឹបអូសគ្រឿងញៀនបានជាង៣តោន៕

អត្ថបទ៖ លាង ឡា