ប៉ូលីសនៅរដ្ឋ Maharashtra ភាគខាងលិចប្រទេសឥណ្ឌាបានចាប់ខ្លួនក្មេងជំទង់ម្នាក់ដែលសង្ស័យថា បានកាត់ក្បាលបងស្រីដែលមានផ្ទៃពោះរបស់គាត់។ មន្ត្រីប៉ូលីសក្នុងតំបន់បាននិយាយថា ស្ត្រីអាយុ 19 ឆ្នាំបានរៀបការជាមួយបុរសម្នាក់ ដោយគ្មានការយល់ព្រមពីគ្រួសាររបស់នាង។
នាងកំពុងតែធ្វើតែឲ្យបងប្រុស និងម្ដាយរបស់នាង ពេលដែលនាងត្រូវបានគេវាយដោយកណ្ដៀវ។ បន្ទាប់មកយុវជននោះ និងម្តាយបានប្រគល់ខ្លួនឱ្យប៉ូលិស ប៉ូលិសសង្ស័យថា ពួកគេក៏បានថតសែលហ្វីជាមួយក្បាលស្ត្រីនោះផងដែរ។
យុវជននោះត្រូវបានបញ្ជូនទៅឃុំនៅផ្ទះអនីតិជន បន្ទាប់ពីមេធាវីរបស់គាត់បាននិយាយថា គាត់មានអាយុតិចជាង ១៨ឆ្នាំ។ ទោះបីជាយ៉ាងណាក៏ដោយ មន្ត្រីប៉ូលិសម្នាក់បាននិយាយថា "ពួកគេនឹងជំទាស់នឹងការទាមទារនេះនៅក្នុងតុលាការ ខណៈដែលពួកគេបានរកឃើញវិញ្ញាបនបត្រដែលបង្ហាញថា គាត់ជាមនុស្សពេញវ័យ។" ចំនែកម្តាយរបស់ពួកគេត្រូវបានបញ្ជូនទៅកាន់មន្ទីរឃុំឃាំងរបស់ប៉ូលិស។ BBC Marathi បានរាយការណ៍ថា ឧបទ្ទវហេតុនេះបានកើតឡើងនៅក្នុងស្រុក Aurangabad ។
ជនរងគ្រោះបានពង្រត់គ្នាជាគូស្នេហ៍កាលពីខែមិថុនា ហើយបានរៀបការជាមួយគ្នា បន្ទាប់ពីគ្រួសាររបស់នាងជំទាស់នឹងទំនាក់ទំនងរបស់ពួកគេ។ ទោះបីជាអ្នកទាំងពីរស្ថិតក្នុងវណ្ណៈដូចគ្នាក៏ដោយ ក៏គ្រួសាររបស់នាងមិនយល់ព្រមចំពោះគាត់ដែរ ដោយសារគ្រួសាររបស់គាត់ក្រីក្រជាងពួកគេ។
នារីវ័យក្មេងរូបនេះ មិនបានទាក់ទងគ្រួសាររបស់នាងច្រើនទេ បន្ទាប់ពីនាងរៀបការ ប៉ុន្តែម្តាយរបស់នាងបានមកលេងនាងមួយសប្តាហ៍មុនពេលកើតឃាតកម្មនេះ។ ប៉ូលីសបាននិយាយថា នាងដឹងថាកូនស្រីរបស់នាងមានផ្ទៃពោះ។ អ្នកធ្វើយុទ្ធនាការនិយាយថា មនុស្សរាប់រយនាក់ត្រូវបានសម្លាប់ជារៀងរាល់ឆ្នាំនៅក្នុងប្រទេសឥណ្ឌា សម្រាប់ការធ្លាក់ក្នុងអន្លង់ស្នេហ៍ ឬរៀបការប្រឆាំងនឹងការចង់បានរបស់ក្រុមគ្រួសារពួកគេ។
ឃាតកម្មទាំងនេះច្រើនតែត្រូវបានគេហៅថា "ការសម្លាប់ដោយកិត្តិយស" ដោយសំដៅទៅលើសញ្ញាណនៃប្រពៃណី និងកិត្តិយសគ្រួសារដែលនៅមានដក់ជាប់យ៉ាងជ្រៅនៅក្នុងផ្នែកជាច្រើននៃសង្គមឥណ្ឌា។ កាលពីខែមីនា ប៉ូលីសនៅភាគខាងជើងរដ្ឋ Uttar Pradesh បានចាប់ខ្លួនបុរសម្នាក់ ពីបទកាត់ក្បាលកូនស្រីរបស់គាត់។ គាត់ត្រូវបានគេឮនិយាយថា នៅក្នុងវីដេអូដែលថតដោយប៉ូលីសថា គាត់បានសម្លាប់នាង ដោយសារតែនាងមានទំនាក់ទំនងដែលគាត់មិនយល់ព្រម៕
អត្ថបទដកស្រង់ពី BBC