តុលាការយោធាមីយ៉ាន់ម៉ាកាលពីថ្ងៃសុក្រ បានកាត់ទោសអ្នកកាសែតអាមេរិកឲ្យជាប់ពន្ធនាគារ១១ឆ្នាំ ដោយចោទប្រកាន់ពីបទថាបានប្រមូលផ្តុំនិងជួបជុំគ្នាខុសច្បាប់, ញុះញង់ឲ្យប្រឆាំងនឹងយោធា ព្រមទាំងរំលោភទៅលើបញ្ញត្តិទិដ្ឋាការ, មេធាវីរបស់លោកបាននិយាយ។ 

ពួកយោធាបានកៀបអ្នកកាសែតចាប់តាំងពីពួកគេបានឡើងកាន់អំណាចតាមរយៈរដ្ឋប្រហារមួយកាលពីខែកុម្ភះ ចាប់ខ្លួនអ្នកកាសែតជាច្រើនដែលបានរិះគន់ពួកគេពីការបង្រ្កាបទៅលើអ្នកប្រឆាំង ព្រមទាំងបានសម្លាប់មនុស្សជាង១,២០០នាក់ បើយោលទៅតាមក្រុមអ្នកត្រួតពិនិត្យនៅក្នុងស្រុក។ Danny Fenster ដែលបានធ្វើការឲ្យកាសែតក្នុងស្រុកឈ្មោះFrontier Myanmar ប្រហែលជា១ឆ្នាំ ត្រូវបានចាប់ខ្លួនកាលពីខែឧសភា ខណៈដែលលោកបានចាកចេញពីប្រទេសទៅលេងគ្រួសារ។

Frontier Myanmar មានការអស់សង្ឃឹមយ៉ាងខ្លាំងចំពោះការសំរេចចិត្តថ្ងៃនេះក្នុងការកាត់ទោសនិពន្ធនាយករបស់គេ, Danny Fenster, ក្នុងការចោទប្រកាន់ចំនួន៣ករណី ព្រមទាំងដាក់ទោសឲ្យជាប់ពន្ធនាគារ១១ឆ្នាំ, កាសែតនេះបាននិយាយនៅក្នុងសេចក្តីថ្លែងការណ៍។ Fenster ដែលត្រូវបានឃុំខ្លួននៅក្នុងពន្ធនាគារ Insein នាទីក្រុង Yangon ចាប់តាំងពីពេលចាប់ខ្លួន ក៏ត្រូវបានប្រឈមមុខទៅនឹងការចោទប្រកាន់ពីបទបំបះបំបោរ និងបទភេវរកម្មផងដែរ ដែលនឹងអាចឲ្យគាត់ជាប់ពន្ធនាគារអស់មួយជីវិត។

“ អ្នកផងទាំងឡាយនៅ Frontier អស់សង្ឃឹមយ៉ាងខ្លាំង និងស្រងាកចិត្តចំពោះសេចក្តីសំរេចនេះ “ Frontier Myanmar បាននិយាយ “ យើងប្រាកដជាចង់ឃើញ Fenster ត្រូវបានដោះលែងយ៉ាងឆាប់រហ័សដែលអាចធ្វើទៅបាន ដូច្នេះគាត់នឹងអាចទៅជួបជុំគ្រួសារគាត់”។ ទីប្រឹក្សារជាន់ខ្ពស់នៃក្រុម Myanmar Crisis  លោក Richard Horsey បានពិពណ៌នាថាការកាត់ក្តីនេះមានភាពយង់ឃ្នងណាស់។

Shawn Crispin តំណាងប្រចាំនៅអាស៊ីអគ្នេយ៍នៃគណៈកម្មាធិការការពារអ្នកសារព័ត៌មានដែលមានមូលដ្ឋាននៅទីក្រុង New York បានអំពាវនាវឲ្យមានការដោះលែង Fenster ជាប្រញ៉ាប់និងគ្មានលក្ខ័ណ។ ” Myanmar ត្រូវតែបញ្ឍប់ដាក់ពន្ធនាគារអ្នកសារព័ត៌មានដែលគ្រាន់តែបំពេញការងាររបស់គេក្នុងការផ្តល់ព័ត៌មាន” លោកបាននិយាយ។