បាត់ដំបង ៖ អនុវត្តតាមយោបល់របស់លោកឧត្តមសេនីយ៍ទោ សាត គឹ មសាន ស្នងការនៃស្នងការដ្ឋាននគរបាល ខេត្តបាត់ដំបង នៅថ្ងៃទី០៥ ខែវិច្ឆិកា ឆ្នាំ២០២១ កម្លាំងអធិការដ្ឋាននគរបាលស្រុកសំពៅលូនដែលមានលោកវរសេនីយ៍ទោ ទឹម វិឆ័យ ជាអធិការ បានដឹកនាំ កម្លាំងសហការជាមួយកម្លាំងវរសេនាតូចនគរបាលការពារព្រំដែនគោកលេខ៨១៧ ដែលមានលោកវរសេនីយ៍ឯក ប្រាក់ សាយ ជាមេបញ្ជាការ បានធ្វើការបង្ក្រាបករណីការនាំយកចេញដោយមិនស្របច្បាប់សម្រាប់នាំឆ្លងដែនទៅប្រទេសថៃ០១ ករណីត្រង់ចំណុច ក្រុមទី០៧ ភូមិត្រពាំងព្រលិត ឃុំសន្តិភាព ស្រុកសំពៅលូន ។

ក្នុងកិច្ចប្រតិបត្តិការនេះសមត្ថកិច្ចបានធ្វើការទប់ស្កាត់ពលករបម្រុងឆ្លងដែនទៅប្រទេសថៃខុសច្បាប់ ចំនួន១២នាក់ (ស្រីចំនួន០៥នាក់ អនីតិជនចំនួន០២នាក់ ) និងឃាត់ខ្លួនជនសង្ស័យជាមេខ្យល់ម្នាក់ឈ្មោះ សុខ សំណាង ហៅកូនង៉ា ភេទប្រុស អាយុ៣៨ឆ្នាំ មានទីលំនៅ ភូមិសាលាឆេះ ឃុំរហាល ស្រុកព្រះនេត្រព្រះ ខេត្តបន្ទាយមានជ័យ ។
នៅចំពោះមុខសមត្ថកិច្ចឈ្មោះ សុខ សំណាង ហៅកូនង៉ា បានសារភាពថាការនាំមនុស្សចេញទៅប្រទេសថៃនេះខ្លួនបានយកប្រាក់ថ្លៃធ្វើដំណើរពីពលករក្នុងម្នាក់ពី៦.៥០០បាត ទៅ១១.៥០០បាត ។
ករណីនេះសមត្ថកិច្ចនគរបាលស្រុកបានកសាងសំណុំរឿងបញ្ជូនទៅការិយាល័យជំនាញដើម្បីអនុវត្តតាមច្បាប់។ រីឯ ប្រជាពលរដ្ឋរងគ្រោះ បានអប់រំណែនាំឱ្យវិលទៅលំនៅឋានវិញ៕