ថៃ : ប្រាក់ដុល្លាក្លែងក្លាយប្រមាណជិត៤លានដុល្លារ រួមជាមួយម៉ាសុីនផលិតចំនួន៣គ្រឿងត្រូវបានកម្លាំងសន្តិសុខផ្ទៃក្នុងក្រសួងមហាផ្ទៃថៃចុះបង្ក្រាប ខណៈដែលក្រុមជនសង្ស័យទាំងនេះកំពុងធ្វើការឡាយបង្ហោះលក់តាមរយៈអនឡាញ។
កិច្ចប្រតិបត្តិការនៃការចរចារទិញលុយដុល្លារតាមរយៈអនឡាញ រហូតឈានដល់ការបង្ក្រាបនេះ បានធ្វើឡើងកាលពីថ្ងៃទី៣ ខែវិច្ឆិកា ឆ្នាំ២០២១ នៅក្នុងផ្ទះជួលមួយកន្លែង ស្ថិតក្នុងខេត្តណាខនប៉ាធុំ។
ក្នុងប្រតិបត្តិការនេះ សមត្ថកិច្ចបានរឹបអូស ម៉ាសុីនព្រីននិងផលិតប្រាក់ដុល្លាក្លែងក្លាយចំនួន៣គ្រឿងរួមជាមួយ នឹងលុយដុល្លារជាច្រើនដុំដែលកំពុងហាលសម្ងួតជាប្រភេទក្រដាសប្រាក់ ១០០ដុល្លារទាំងអស់។
តាមការសាកសួរ ពួកគេមានគ្នាចំនួន៤នាក់ សុទ្ធសឹងជានារីទាំងអស់ដោយជនសង្ស័យបានសារភាពថា ការផលិតដំបូងនេះបានចំនួន ៥០,០០០សន្លឹក ដោយបានបញ្ចេញធ្វើចរាចរទៅលើទីផ្សារអស់ចំនួន ១១,០០០សន្លឹកហើយ ជាក់ស្តែងនៅកន្លែងបង្ក្រាបមានចំនួនតែ ៣៩,០០០សន្លឹកតែប៉ុណ្ណោះ ដូច្នេះមានន័យថា លុយដុល្លារក្លែងក្លាយបានធ្វើចរាចរអស់ចំនួន ១,១០០,០០០ដុល្លារហើយ។
ជុំវិញបញ្ហានេះ សមត្ថកិច្ចថៃបានបញ្ជាក់ថា ក្រដាសប្រាក់ប្រភេទ ១០០ ដុល្លារនេះកម្លាំងជំនាញបានយកឱ្យខាងធនាគារពិនិត្យគឺ មានលក្ខណៈដូចទៅនិងក្រដាសប្រាក់ពិត៩៥% ដែលយើងមើលនឹងភ្នែកអាចមានការភ័ន្តច្រឡំដោយសមត្ថកិច្ចសន្និដ្ឋានថា ប្រាកដជាមានអ្នកជំនាញនៅពីក្រោយខ្នងក្នុងការផលិតប្រាក់ដុល្លារក្លែងក្លាយនេះ៕
