ពួកតាលីបង់នៅក្នុងអាហ្វហ្គានីស្ថានបានប្រកាសហាមឃាត់មិនឲ្យប្រើរូបីយប័ណ្ណបរទេសកាលពីថ្ងៃអង្គារ៍ ដែលជាទង្វើរមួយគួរឲ្យស្លុតចិត្ត ដែលជាការគំរាមកំហែងនិងអង្រួននូវសេដ្ឋកិច្ចដែលកពុងខ្វះខាតនូវថវិកានិងកំពុងជិតដួលរលំ។ ក្រុមនេះបាននិយាយនៅក្នុងសេចក្តីថ្លែងការណ៍ថា វាមានតម្រូវការឲ្យពលរដ្ឋអាហ្វហ្គានីស្ថានប្រើប្រាស់រូបីយប័ណ្ណក្នុងស្រុក (afghani) ក្នុងការផ្ទេរផ្ទូរសាច់ប្រាក់ និងថាអ្នកដែលរំលោភទៅនឹងបទបញ្ញត្តិនេះនឹងត្រូវផ្តន្ទាទោស។

ប្រាក់ដុល្លារត្រូវបានធ្វើចរាចរទូទាំងអាហ្វហ្គានីស្ថាន ទាំងផ្លូវការនិងមិនផ្លូវការនៃមុខជំនួញ ប៉ុន្តែការចូលមកកាន់អំណាចដ៏គួរឲ្យភ្ញាក់ផ្អើលរបស់ពួកតាលីបង់កាលពីខែសីហា ជំរុញឲ្យធនាគារនិងមូលនិធិបរទេសត្រូវបានកាត់ផ្តាច់នូវប្រាក់បរទេស។ “ការប្រើប្រាស់នូវរូបីយប័ណ្ណបរទេសវានឹងបណ្តាលឲ្យមានផលប៉ះពាល់អវិជ្ជមានដល់សេដ្ឋកិច្ចប្រទេស” ពួកតាលីបង់បាននិយាយ ព្រមទាំងបន្ថែមទៀតថា “គ្រប់សញ្ជាតិ អ្នកលក់ដូរ ពាណិជ្ជករ ធុរជន និងមហាជនជាទូទៅ គួរតែធ្វើជំនួញដោយប្រើប្រាស់ afghani ”។

លុយរបស់អាហ្វហ្គានីស្ថានបានធ្លាក់ចុះទៅក្នុងអត្រាទាបបំផុត ចាប់តាំងពីពួកតាលីបង់បានចូលកាន់អំណាច ប្រព័ន្ធហិរញ្ញវត្ថុអន្តរជាតិបានរារាំងមិនឲ្យពួកតាលីបង់ប៉ះពាល់ទុនបម្រុងរាប់ពាន់លានដុល្លារ ដែលរក្សារទុកដោយធនាគារកណ្តាលដែលនៅឯបរទេស ដែលចាប់តាំងពីពេលនោះមក ពាណិជ្ជកម្មបានធ្លាក់ចុះ តម្លៃនៃម្ហូបអាហារបានឡើងថ្លៃយ៉ាងខ្លាំង គ្មានប្រាក់បៀវត្សរ៍សំរាប់បើកឲ្យបុគ្គលិក។

៥០%នៃចំនួនប្រជាពលរដ្ឋ៤០លាននាក់ ពេលនេះកំពុងប្រឈមទៅនឹងគ្រោះទុរភឹក្ស, កម្មវិធីស្បៀងអាហារពិភពលោកបាននិយាយកាលពីសប្តាហ៍មុន,ហើយអង្គការផ្តល់ជំនួយផ្សេងៗបានធ្វើការព្រមានថានឹងមានវិបត្តិមនុស្សធម៌នៅពេលដែលរដូវក្តៅចូលមកដល់។ សេតិវិមានបានប្រកាសកាលពីថ្ងៃអាទិត្យថា គេនឹងផ្តល់ជំនួយថ្មីដែលគិតជាទឹកប្រាក់ចំនួនជិត១៤៤លានដុល្លារអាមេរិក ចំពោះអ្នកណាដែលរងផលប៉ះពាល់ដោយសារវិបត្តិអាហ្វហ្គានីស្ថាននេះ៕