ភ្នំពេញ ៖ ឯកឧត្តមឃួង ស្រេង អភិបាល នៃគណៈអភិបាល រាជធានីភ្នំពេញ និងឯកឧត្តម ឧត្តមសេនីយ៍ឯកស ថេត អគ្គស្នងការរង នគរបាល ជាតិ និងជា ស្នងការ នគរបាល រាជធានីភ្នំពេញបានដឹកនាំកម្លាំងសមត្ថកិច្ចចុះអន្តរាគមន៍ជួយសង្គ្រោះប្រជាពលរដ្ឋដែលរងការជន់លិចដោយទឹកជំនន់ស្ទឹងព្រែកត្នោត ក្នុងភូមិសាស្ត្រខណ្ឌដង្កោរាជធានីភ្នំពេញខណៈរបាយការណ៍បឋមរបស់ អធិការដ្ឋាននគរបាលខណ្ឌដង្កោឱ្យដឹងថាទឹកជំនន់នេះបានរងការជន់លិចផ្ទះចំនួន ជាង២ពាន់ខ្នងនោះហើយក្នុងនោះមានចំនួន១០សង្កាត់ ។ ទឹកជំនន់ នេះក៏បង្កការជន់លិចសាលារៀនចំនួន ៣៥ ខ្នងផ្លូវចំនួន០៣កន្លែង និងផ្ទៃដីកសិកម្ម ជាង ១៥២ ហិកតាផងដែរ។
ក្នុងប្រតិបត្តិការជួយសង្គ្រោះប្រជាពលរដ្ឋដែលរងគ្រោះដោយទឹកជំនន់នៅ ព្រឹក ថ្ងៃ ទី២៦ ខែតុលា ឆ្នាំ ២០២១ ឯកឧត្តមអភិបាលរាជធានី ភ្នំពេញ និងឯកឧត្តមស្នងការបានធ្វើដំណើរចុះត្រួតពិនិត្យស្ថានភាពជាក់ស្តែងទឹកស្ទឹងព្រែកត្នោតនៅក្នុងសង្កាត់ទៀន និងសង្កាត់ស្ពានថ្មដែលសង្កាត់ ទាំង ២ នេះកំពុង ប្រឈមរងការជន់លិចធ្ងន់ធ្ងរក្នុងចំណោមសង្កាត់នានាក្នុងខណ្ឌដង្កោ ។ ខណៈនោះ ក៏បាននាំយកគ្រឿងចក្រមួយចំនួនកាយដីបិទទប់ទឹកនៅកន្លែងខ្លះដែល កំពុងប្រឈមទឹកហូរបុកបាក់ទំនប់ដែលគ្រឿងចក្របិទទប់កុំឱ្យហូរហៀរទៅលិចផ្ទះ និងផ្ទៃដីកសិកម្មប្រជាពលរដ្ឋនៅផ្នែកខាងក្រោមខណៈដែលទឹកស្ទឹងព្រែក ត្នោតកំពុងហូរបុកយ៉ាងគំហុកនោះ ។
អាជ្ញាធររាជធានីភ្នំពេញបានប្រើប្រាស់វិធានការសរុបមធ្យោបាយសរុបនិងកម្លាំងសរុបក្នុងការជួយសង្គ្រោះប្រជាពលរដ្ឋរងគ្រោះដោយទឹកជំនន់នេះ ។ ទន្ទឹម នឹង នោះដែរអាជ្ញាធរដែនដីនិងមន្ត្រីជំនាញបានប្រាប់ឱ្យដឹងថានៅ ព្រឹក ថ្ងៃ ទី២៦ ខែតុលាស្ថានភាពទឹកស្ទឹងព្រែកត្នោតនៅនឹងមិនមានការកើនឡើង បន្ថែមទៀតនោះទេដោយអាជ្ញាធរមន្ត្រីជំនាញនិងសមត្ថកិច្ចកំពុងតែតាមដានយកចិត្តទុកដាក់អំពីស្ថានភាពទឹកជំនន់នៅស្ទឹងព្រែកត្នោតដោយមានការ ប្រុងប្រយ័ត្នខ្ពស់បំផុតក្នុងការ ត្រៀមរួចជាស្រេចជួយសង្គ្រោះប្រជាពលរដ្ឋកំពុងរងការគំរាមកំហែងដែលបង្កគ្រោះថ្នាក់ជាយថាហេតុណាមួយនោះ ។
សូមបញ្ជាក់ថាទឹកជំនន់ស្ទឹងព្រែកត្នោតបានបង្កការជន់លិចផ្ទះដីកសិកម្មសាលារៀនផ្លូវថ្នល់ក្នុងភូមិសាស្ត្រខណ្ឌដង្កោគឺទឹកហូរធ្លាក់យ៉ាងគំហុកពីខេត្តកំពង់ស្ពឺ ចាប់ផ្តើមជន់លិចរយៈពេល ២ ទៅ ០៣ថ្ងៃចុងក្រោយនេះ ៕
