យោធាអាមេរិកបាននិយាយថានាវាចម្បាំងរបស់ខ្លួន Arleigh Burkei -class guide មីស៊ីល ឆ្លងកាត់ច្រកតៃវ៉ាន់ជាមួយនិងនាវាកាណាដា HMCS Winnipeg កាលពីថ្ងៃព្រហស្បត៍និងថ្ងៃសុក្រ។ នាវាទាំង២បានឆ្លងកាត់ច្រកតៃវ៉ាន់ដើម្បីបង្ហាញនូវការប្តេជ្ញាចិត្តរបស់សហរដ្ឋអាមេរិកនិងសម្ព័ន្ធមិត្តព្រមទាំងដៃគូរដើម្បីធ្វើឲ្យមានសេរីភាពនិងការបើកចំហរនៅក្នុងឥណ្ឌូ-ប៉ាស៊ីហ្វីក។
បញ្ជាការកងទ័ពរំដោះប្រជាជនចិនប្រចាំភាគខាងកើត បាននិយាយថាកងកំលាំងរបស់ខ្លួនបានត្រួតពិនិត្យនិងតាមដានមើលការឆ្លងកាត់របស់នាវាទាំង២នេះ ព្រមទាំងបន្ថែមទៀតថា សហរដ្ឋអាមេរិកនិងកាណាដាបានបង្ករហេតុនិងកកូរកកាយបញ្ហា ដែលជាគ្រោះថ្នាក់ដ៏ធ្ងន់ធ្ងរដល់សន្តិភាពនិងស្ថិរភាពនៅច្រកតៃវ៉ាន់។
“តៃវ៉ាន់ជាផ្នែកមួយនៃទឹកដីរបស់ចិន កងកំលាំងដែលឈរជើងជានិច្ចជាកាលតែងតែការពារនិងប្រកាសរាល់ភាពអាសន្នព្រមទាំងប្រឈមទៅនឹងការគំរាមកំហែងនិងការបង្ករហេតុ”។
កងនាវាសហរដ្ឋអាមេរិកតែងតែឆ្លងកាត់ច្រកតៃវ៉ាន់នេះជារាងរាល់ខែ ដែលធ្វើឲ្យចិនមានការខឹងសម្បារព្រមទាំងបានចោទប្រកាន់អាមេរិកថាធ្វើឲ្យមានភាពតានតឹងនៅក្នុងតំបន់។ម្តងម្កាលសម្ព័ន្ធមិត្តអាមេរិកក៏បានបញ្ជូនផងដែរនូវនាវាចម្បាំងរបស់ខ្លួនឆ្លងកាត់ច្រកតៃវ៉ាន់ ដូចជាអង់គ្លេសកាលពីខែមុន។ទោះបីជាភាពតានតឹងនៅក្នុងច្រកសមុទ្ទតៃវ៉ាន់មានការកើនឡើង ប៉ុន្តែមិនមានការបាញ់ប្រហារគ្នានោះទេ ហើយយន្តហោះចម្បាំងរបស់ចិនក៏មិនបានចូលទៅក្នុងដែនអាកាសរបស់តៃវ៉ាន់នោះដែរ គ្រាន់តែហោះចូលបញ្ចេញសកម្មភាពនៅប៉ែកខាងត្បូងដែលតៃវ៉ាន់ហៅថា ដែនកំណត់អត្តសញ្ញាណការពារដែនអាកាសរបស់ខ្លួនតែប៉ុណ្ណោះ(AIDZ)។
ក្រសួងការពារជាតិតៃវ៉ាន់ បាននិយាយកាលពីថ្ងៃអាទិត្យថាយន្តហោះចម្បាំងចិនចំនួន៣គ្រឿង J-16 ២គ្រឿង និងយន្តហោះប្រឆាំងនាវាមុជទឹក១គ្រឿង បានហោះចូល AIDZ ទៀត។
