ដោយសារសត្វផ្សោតបានស្លាប់ជាបន្តបន្ទាប់ម្តងមួយៗ នៅអន្លង់ឈើទាលនៃរមណីយដ្ឋានទេសចរណ៍សត្វផ្សោតព្រះរំកិល ខេត្តស្ទឹងត្រែង មន្ទីរទេសចរណ៍បាន រៀបចំឲ្យមានបណ្ណាល័យសម្រាប់តម្កល់ទុកឆ្អឹងសត្វផ្សោត ដើម្បីបង្វែរទិសឲ្យភ្ញៀវទេសចរទស្សនាសំណាកឆ្អឹងសត្វផ្សោតជំនួសវិញ។
លោក អ៊ន ប៉ោសឿន ប្រធានមន្ទីរទេសចរណ៍ខេត្តបានលើកឡើងថា បើយើងមិនថែរក្សា និងអភិរក្ស សំណាកឆ្អឹងសត្វផ្សោតនេះទេ រមណីយដ្ឋានទេសចរណ៍មួយនេះ នឹងឈានទៅបាត់បង់នៅថ្ងៃអនាគត។ លោកថា មន្ទីរគ្រោងថវិការបស់មន្ទីរ និងថវិកាដែលទទួលបានពីអង្គការដៃគូ និងសប្បុរសជននានា រៀបចំជាបណ្ណាល័យមួយទុកដាក់ឆ្អឹងសត្វផ្សោតនេះសម្រាប់ គាំទ្រដល់វិស័យទេចរណ៍ ដើម្បីថែរក្សានៅរមណីយដ្ឋានអេកូទេសចរណ៍មួយនេះឲ្យឋិតនៅគង់វង្សក្នុងការបម្រើជីវភាពដល់បងប្អូនប្រជាពលរដ្ឋរស់នៅតំបន់នេះ។
ចំណែកលោក ផយ វណ្ណា សមាជិកសហគមន៍រមណីយដ្ឋានទេសចរណ៍សត្វផ្សោតព្រះរំកិលបានគាំទ្រគំនិតផ្ដួចផ្ដើមនេះ ហើយលោកនឹងប្រឹងប្រែងអនុវត្តតាមការណែនាំ និងអំពាវនាវបន្ថែមទៅដល់បងប្អូនប្រជាពលរដ្ឋ និងប្រជាសហគមន៍នៅក្នុងឃុំនេះ ដើម្បីបរិច្ចាគថវិកាខ្លះៗសម្រាប់យកមកទិញសម្ភារ ដូចជាកញ្ចក់សម្រាប់ដាក់ឆ្អឹងផ្សោតជាដើម។ លោកបន្តថា នេះជាសមិទ្ធផលថ្មី ផ្ដល់ផលប្រយោជន៍រួមទាំងអស់គ្នា នៅពេលដែលយើងរក្សាបាននូវសំណាកឆ្អឹងសត្វផ្សោត វាជាចំណែកមួយជួយទាក់ទាញភ្ញៀវទេសចរឱ្យមកលេងកម្សាន្ត នៅតំបន់នេះបាន ក្នុងពេលដែលសត្វផ្សោតក្នុងទឹកត្រូវស្លាប់បាត់បង់អស់។
អាជីវករ លក់ចំណីអាហារនៅតំបន់រមណីយដ្ឋាន បានទទួលស្គាល់ដែរថា កាលពីដើមឆ្នាំ២០២១ សត្វផ្សោតធំៗ បានស្លាប់ចំនួនពីរក្បាល បច្ចុប្បន្ននៅតែមួយក្បាលប៉ុណ្ណោះ ធ្វើឲ្យប្រជាសហគមន៍ និងអាជ្ញាធរនៅតំបន់នេះ មានការព្រួយបារម្ភខ្លាចសត្វផ្សោតមួយក្បាលនេះស្លាប់បាត់បង់ទៀត ព្រោះនៅតំបន់ខាងលើអន្លង់ផ្សោត មានអ្នកនេសាទឡាវ មកដាក់មងសន្ទូច ជិតអន្លង់អភិរក្សសត្វផ្សោត។ ជាមួយគ្នានោះ ពួកគាត់បានស្នើសុំឲ្យអាជ្ញាធរពាក់ព័ន្ធជួយមានវិធានការចំពោះអ្នកនេសាទផ្សេងៗដែលលួចលាក់ធ្វើនេសាទបង្កផលប៉ះពាល់ការរស់នៅដល់សត្វផ្សោត ជាពិសេសកន្លងមកកូនផ្សោតតូចៗ កើតមករស់មិនបានយូរទេ មានអាយុកាលតែមួយខែឬ២ ខែប៉ុណ្ណោះអាចស្លាប់ទៅវិញ។
សូមបញ្ជាក់ថា តំបន់អេកូទេសចរណ៍ព្រះរំកិលនេះ បានបង្កើតឡើងនៅឆ្នាំ ២០០២ ដោយសហគមន៍មានបម្រើសេវាកម្មទេសចរណ៍ជូនភ្ញៀវជាច្រើន ដូចជាម្ហូបអាហារនិង ជូនភ្ញៀវទស្សនាត្រីផ្សោតជាដើម ក្រោមការជួយឧបត្ថម្ភគាំទ្រពីអង្គការម្លប់បៃតង-អង្គការសេប៉ា-និងអាជ្ញាធរមូលដ្ឋាន ដោយមានការជូយគាំទ្រពីមន្ទីរទេសចរណ៍ខេត្តស្ទឹងត្រែង៕ (មានជ័យ)
