ហ្សាកាតា៖ ប្រធានាធិបតីប្រទសឥណ្ឌូនេស៊ីលោក Joko Widodo បានលើកឡើងថាប្រទេសឥណ្ឌូនេស៊ី អាចនឹងក្លាយជាប្រទេសមានសេដ្ឋកិច្ចធំទី៧ របស់ពិភពលោកនៅឆ្នាំ ២០៣០ ក្នុងករណីមានការរីកចម្រើនយ៉ាងឆាប់រហ័សក្នុងវិស័យឌីជីថលនៅក្នុងសេដ្ឋកិច្ចនិងហិរញ្ញវត្ថុ។ 

លោកបានថ្លែងថា ប្រសិនបើយើងអាចគ្រប់គ្រងវាឱ្យបានលឿននិងត្រឹមត្រូវឥណ្ឌូនេស៊ីមានសក្តានុពលធំក្នុងការក្លាយជាទីផ្សារយក្សឌីជីថលបន្ទាប់ពីប្រទេសចិននិងឥណ្ឌានិងជាប្រទេសមានសេដ្ឋកិច្ចធំទី៧នៅលើពិភពលោកក្នុងឆ្នាំ ២០៣០។

បច្ចុប្បន្ននេះឌីជីថលកំពុងរីកចម្រើនយ៉ាងឆាប់រហ័សចំពេលមានការរីករាលដាលនៃជំងឺកូវីដ១៩។ ធនាគារឌីជីថល, ក្រុមហ៊ុនធានារ៉ាប់រងឌីជីថល, ក្រុមហ៊ុនទូទាត់ប្រាក់តាមអេឡិចត្រូនិកនិងសេវាកម្មហិរញ្ញវត្ថុដែលពឹងផ្អែកលើបច្ចេកវិទ្យាកំពុងដំណើរការនិងកាន់តែមានភាពងាយស្រួលដល់សាធារណជន។ ទោះយ៉ាងណាក៏ដោយការក្លែងបន្លំផ្សេងៗនិងឧក្រិដ្ឋកម្មហិរញ្ញវត្ថុផ្សេងទៀតបានលេចឡើងចំពេលមានឌីជីថលនីយកម្មយ៉ាងឆាប់រហ័ស។

លោកប្រធានាធិបតី Joko Widodo បានបញ្ជាក់ថាសន្ទុះនេះត្រូវតែបន្តជាមួយនឹងកិច្ចខិតខំប្រឹងប្រែងដើម្បីបង្កើតប្រព័ន្ធអេកូឡូស៊ីហិរញ្ញវត្ថុឌីជីថលដ៏រឹងមាំនិងនិរន្តរភាពក៏ដូចជាប្រព័ន្ធអេកូឡូស៊ីប្រកបដោយការទទួលខុសត្រូវ។

ប្រធានាធិបតីក៏បានអំពាវនាវឱ្យប្រព័ន្ធអេកូឡូស៊ីសេដ្ឋកិច្ចនិងហិរញ្ញវត្ថុឌីជីថលមានគោលនយោបាយដើម្បីកាត់បន្ថយហានិភ័យនៃបញ្ហាច្បាប់និងសង្គមដែលនឹងបង្កើតបញ្ហាដល់សហគមន៍។ ជាងនេះទៅទៀតប្រព័ន្ធអេកូឡូស៊ីឌីជីថលត្រូវតែផ្តល់ការការពារដល់សហគមន៍៕