ពួកយោធាដែលគ្រប់គ្រងមីយ៉ាន់ម៉ា មិនបានហាមឃាត់បេសកជនពិសេសអាស៊ានក្នុងការទៅធ្វើទស្សនកិច្ចនៅមីយ៉ាន់ម៉ាទេ ប៉ុន្តែបានហាមឃាត់មិនឲ្យជួបអតីតមេដឹកនាំដែលត្រូវបានគេឃុំឃាំង គឺអ្នកស្រី អូងសានស៊ូជី ពីព្រោះអ្នកស្រីត្រូវបានចោទប្រកាន់ពីបទឧក្រិដ្ឋ អ្នកនាំពាក្យពួកយោធាបាននិយាយ។

ការពន្យារពេលក្នុងការអនុមត្តិយល់ព្រមរបស់អង្គការសហប្រជាជាតិចំពោះ ការតែងតាំងឯកអគ្គរដ្ឋទូតប្រចាំ អ.ស.ប.របស់ពួករដ្ឋាភិបាលយោធា គឺមានហេតុផលនយោបាយនៅពីក្រោយ អ្នកនាំពាក្យ Zaw  Min Tun បានបញ្ជាក់ ព្រមទាំងនិយាយទៀតថា អ.ស.ប.និងប្រទេសដ៏ទៃទៀត ព្រមទាំងអង្គការទាំងឡាយ “គួរតែជៀសវាងនូវការប្រើស្តង់ដារ២ នៅពេលដែលពួកគេមានការពាក់ព័ន្ធទៅនឹងកិច្ចការអន្តរជាតិ”។

ពាក្យសំដីរបស់អ្នកនាំពាក្យនេះ បានបញ្ចេញដោយក្រុមយោធានៅក្នុងការបូកសរុបមួយកាលពីថ្ងៃពុធទី១៣តុលា ដោយសារតែមានសម្ពាធអន្តរជាតិបង្ខំឲ្យពួកយោធាអនុវត្តនូវផែនការសន្តិភាព៥ចំណុច ដែលបានព្រមព្រៀងដោយ ឧត្តមសេនយ៍ មីង អូងលាំង កាលពីខែមេសា ជាមួយនឹងសមាគមអាស៊ាន។

មីយ៉ាន់ម៉ាបានស្ថិតនៅក្នុងស្ថានភាពគាំងស្តូកទាំងនយោបាយនិងសេដ្ឋកិច្ច ចាប់តាំងពីរដ្ឋប្រហារថ្ងៃទី១ខែកុម្ភះ ដែលបានបញ្ឆេះកំហឹងដល់ក្រុមអ្នកតវ៉ាដែលមិនបានថមថយទាល់តែសោះ ជាមួយនឹងការរៀបចំជាក្រុមអ្នកប្រយុទ្ធដោយក្រុមសុីវិលដើម្បីប្រឆាំងនឹងក្រុមយោធាដែលមានអំណាច។

ការដែលមិនមានសកម្មភាពអ្វីទាំងអស់ទៅលើផែនការរបស់អាស៊ាន វាស្មើនឹងការដើរត្រឡប់ថយក្រោយ ដែលធ្វើឲ្យសមាជិកអាស៊ានខ្លះបានធ្វើការពិភាក្សាគ្នាស៊ីជម្រៅ ក្នុងការមិនបញ្ចូលលោក មីង អូងលាំង ទៅក្នុងកិច្ចប្រជុំកំពូលក្នុងខែនេះ លោក Eryvan Yusof បេសកជនពិសេសអាស៊ាន បាននិយាយកាលពីសប្តាហ៍មុន។

លោកបាននិយាយទៀតថា កាលពីដើមអាទិត្យនេះ លោកកំពុងតែពិភាក្សារជាមួយគ្រប់ភាគីទាំងអស់នៅក្នុងមីយ៉ាន់ម៉ា ដោយមិនបានកាន់ជើងខាងណាឡើយ ហើយកំពុងតែរង់ចាំការធ្វើទស្សនកិច្ច។

អ្នកនាំពាក្យពួកយោធាបាននិយាយផងដែរ អំពីប្រព័ន្ធយុត្តិធម៌មីយ៉ាន់ម៉ា ថាត្រឹមត្រូវ មានឯករាជ្យ ហើយនឹងដោះស្រាយរឿងក្តីរបស់អ្នកស្រី អូងសាន ស៊ូជីទៅតាមច្បាប់៕