Taiwan-CNN រដ្ឋមន្ត្រីក្រសួងការពារជាតិតៃវ៉ាន់បាននិយាយកាលពីយប់ថ្ងៃសៅរ៍ថា ចិនបានបញ្ជូនយន្តហោះចម្បាំងចំនួន៧៧គ្រឿង ចូលទៅក្នុងតំបន់កំណត់អត្តសញ្ញាណការពារដែនអាកាស (ADIZ) របស់ខ្លួន២ថ្ងៃជាប់គ្នា។ ដែនកោះដែលការពារខ្លួនឯងមួយនេះ បាននិយាយថាយន្តហោះចម្បាំងចិនចំនួន៣៩គ្រឿង បានចូលទៅក្នុងតំបន់ការពារដែនអាកាស (ADIZ) កាលពីថ្ងៃសៅរ៍ ដែលមានចំនួន១គ្រឿងលើសពីថ្ងៃសុក្រ ៣៨គ្រឿង។ ចំនួន៣៨+៣៩គ្រឿង គឺជាចំនួនដ៏ច្រើននៃយន្តហោះដែលបានជ្រៀតចូលក្នុង១ថ្ងៃៗ ចាប់តាំងពីតៃវ៉ាន់បានប្រកាសជាសាធារណៈនូវសកម្មភាពដូចនេះកាលពីឆ្នាំមុន។

ក្រសួងការពារជាតិតៃវ៉ាន់បាននិយាយនៅក្នុងសេចក្តីថ្លែងការណ៍២ថា ការជ្រៀតចូលកាលពីថ្ងៃសៅរ៍ ចែកចេញជា២វេន ២០គ្រឿងក្នុងពេលថ្ងៃ និង១៩គ្រឿងចូលមកក្នុងពេលយប់ មានយន្តហោះ J-16 ២៦គ្រឿង, Su-30 ១០គ្រឿង, Y-8 យន្តហោះប្រឆាំងនឹងនាវាមុជទឹក ២គ្រឿង និង KJ-500 ដែលជាយន្តហោះសង្កេតការណ៍ និងព្រមានចំនួន១គ្រឿង។ ឆ្លើយតបទៅនឹងការជ្រៀតជ្រែកនេះ ក្រសួងការពារជាតិតៃវ៉ាន់បាននិយាយថា កងទ័ពអាកាសតៃវ៉ាន់ បានធ្វើការព្រមានតាមវិទ្យុទាក់ទង ពង្រាយកាំជ្រួចការពារដែនអាកាស និងប្រញ៉ាប់ប្រញាល់ឡើងយន្តហោះប្រយុទ្ធទៅប្រឈមមុខ។

ផែនទីដែលផ្តល់ឲ្យដោយក្រសួងការពារជាតិតៃវ៉ាន់ បានបង្ហាញយន្តហោះទាំងអស់របស់ចិនកាលពីថ្ងៃសៅរ៍នៅក្នុងតំបន់ចុងនិរតីនៃតំបន់ការពារដែនអាកាសតៃវ៉ាន់។ ការជ្រៀតចូលនេះស្ថិតនៅក្នុងចម្ងាយ១២ណូទីកាល់ ម៉ាយ (រង្វាស់សមុទ្ទ ១ម៉ាយ=ស្មើនឹង១៨០០ម៉ែត្រ) ពីដីកោះ។ ការជ្រៀតចូលរបស់ចិនកាលពីថ្ងៃសុក្រ ធ្វើឡើងដើម្បីអបអរសាទរខួប៧២ឆ្នាំ ចាប់តាំងពីការបង្កើតសាធារណរដ្ឋចិនប្រជាមានិតក្នុងឆ្នាំ១៩៤៩។ គួររំលឹកផងដែរថា តៃវ៉ាន់និងចិនបានគ្រប់គ្រងប្រទេសដាច់ដោយឡែកពីគ្នា ចាប់តាំងពីបានបញ្ចប់នូវសង្រ្គាមសុីវិល ជាង៧ទស្សវត្យរ៍កន្លងមក ហើយពួកជាតិនិយមចិនបានភៀសខ្លួនមកនៅកោះតៃបុិ៕