បាត់ដំបង ៖ កាលពីថ្ងៃទី៣០ ខែកញ្ញា ឆ្នាំ២០២១ វេលាម៉ោង១៧និង៣០នាទី នៅចំណុចភូមិបឹងព្រីង ឃុំព្រៃតូច ស្រុកមោងឫស្សី ខេត្តបាត់ដំបង មានករណីហិង្សាដោយចេតនាមានស្ថានទម្ងន់ទោសមួយ បានកើតឡើងក្នុងពេលដែលមនុស្សមួយក្រុមប្រមូលផ្តុំគ្នា អ្នកផឹកស៊ី និងផ្តើមព្រោកប្រាជ្ញរហូតគងពាក្យសំដីគ្នា បង្កជាជម្លោះកើតអំពើហិង្សាតែម្តង។ ជនរងគ្រោះឈ្មោះ សុខ សុជាតិ ភេទប្រុស អាយុ៣៦ឆ្នាំ រស់នៅក្នុងមូលដ្ឋានខាងលើ បណ្តាលឱ្យរងរបួសលើក្បាលចំនួន ០២កន្លែង (របួសមធ្យម) ត្រូវបាននាំទៅព្យាបាលរបួសភ្លាមៗ។
ដោយអនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាល ខេត្តបាត់ដំបង រួមនឹងយោបល់របស់លោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌនៅព្រឹកថ្ងៃទី០១ ខែតុលា ឆ្នាំ២០២១ លោកវរសេនីយ៍ឯក ស គឹមឡុង អធិការនគរបាលស្រុកមោងឫស្សី បានដឹកនាំកម្លាំងធ្វើការឃាត់ខ្លួនជនដៃដល់ និងជាជនសង្ស័យចំនួន ០២នាក់ មកកាន់អធិការដ្ឋាននគរបាលស្រុកធ្វើការស្រាវជ្រាវនោះគឺ ៖
១. ឈ្មោះ ស៊ិន សៀក ហៅអិត ភេទប្រុស អាយុ៣៤ឆ្នាំ រស់នៅភូមិបឹងព្រីង ឃុំព្រៃតូច ស្រុកមោងឫស្សី និង
២. ឈ្មោះ ស៊ិន ធារិទ្ធ ហៅពៅ ភេទប្រុស អាយុ៣០ឆ្នាំ ទាំង០២នាក់រស់នៅភូមិបឹងព្រីង ឃុំព្រៃតូច ស្រុកមោងឫស្សី។
ក្នុងនោះវត្ថុតាងដកហូតមានកំណាត់ឈើនិងដុំឥដ្ឋ។ ករណីនេះកម្លាំងនគរបាលស្រុកបានរៀបចំសំណុំរឿងបញ្ជូនទាំងជនសង្ស័យ និងវត្ថុតាងទៅការិយាល័យជំនាញអនុវត្តតាមផ្លូវច្បាប់៕
