ហាណូយ៖ វៀតណាមនឹងមិនតម្រូវឲ្យធ្វើតេស្តកូវីដ១៩លើអ្នកដំណើរដែលបានចាក់វ៉ាក់សាំងពេញលេញរួចរាល ឬចាក់វ៉ាក់សាំដូសទី១ ក្នុងរយៈពេល៣សប្តាហ៍ដំបូងនិងអ្នកជាសះស្បើយពីជំងឺកូវីដ១៩ក្នុងរយៈពេល៦ខែ ដែលធ្វើដំណើរតាមផ្លូវអាកាស, រថភ្លើងនិងផ្លូវទឹកនោះទេ។ នេះបើយោងតាមការចេញផ្សាយរបស់ទីភ្នាក់ងារព័ត៌មានវៀតណាម។

ក្រសួងសុខាភិបាលវៀតណាមបញ្ជាក់ថា អាជីវកម្មដែលកំពុងដំណើរការសេវាកម្មដឹកជញ្ជូនអ្នកដំណើរត្រូវបានស្នើសុំឱ្យមានផែនការសម្រាប់ការការពារនិងការត្រួតពិនិត្យជំងឺកូវីដ១៩ក៏ដូចជាការដោះស្រាយករណីឆ្លងមេរោគតាមបទប្បញ្ញត្តិ។ ពួកគេគួរតែមានបុគ្គលិកពេទ្យ ឬអង្គភាពវេជ្ជសាស្ត្រ ដើម្បីសម្របសម្រួលជាមួយអាជ្ញាធរសុខាភិបាលក្នុងតំបន់ដើម្បីដោះស្រាយករណីឆ្លងនៅកន្លែងធ្វើការ។

ក្រសួងសុខាភិបាល ក៏បានស្នើឱ្យបន្តការដឹកជញ្ជូនសាធារណៈតាមផ្លូវថ្នល់, រថភ្លើង, ផ្លូវទឹក និងផ្លូវសមុទ្រ ក្នុងតំបន់និងតំបន់ដែលមានហានិភ័យទាបនិងមធ្យម។

ចំណែកយានជំនិះដឹកជញ្ជូនសាធារណៈត្រូវមានបំពាក់នូវទឹកលាងដៃនិងម៉ាសការពារនិងត្រូវសម្លាប់មេរោគជាញឹកញាប់ដោយក្នុងនោះអ្នកបើកបរនិងបុគ្គលិករបស់ពួកគេអនុវត្តតាមគោលការណ៍ ៥K និងធ្វើតេស្តកូវីដ១៩ភ្លាមៗបន្ទាប់ពីមានរោគសញ្ញាសង្ស័យ។

បន្ថែមលើនេះក្រសួងសុខាភិបាលវៀតណាមបានណែនាំឲ្យអ្នកដែលបម្រើការងារនៅតំបន់ដែលមានហានិភ័យមធ្យមនិងខ្ពស់ត្រូវតែធ្វើតេស្តរៀងរាល់ ៧ថ្ងៃម្តង។ ទន្ទឹមនឹងនេះអ្នកបើកបរនៅទីតាំងដែលមានហានិភ័យខ្ពស់ត្រូវទទួលការចាក់វ៉ាក់សាំងឱ្យបានពេញលេញ ឬជាសះស្បើយពីជំងឺកូវីដ១៩ក្នុងរយៈពេល ៦ខែ និងមានលទ្ធផលតេស្តអវិជ្ជមានក្នុងរយៈពេល ៧២ម៉ោង៕