លោកជំទាវ យក់ សម្បត្តិ រដ្ឋលេខាធិការក្រសួងសុខាភិបាលបញ្ជាក់ប្រាប់បានដឹងថានៅព្រឹកថ្ងៃទី ២៨ ខែកញ្ញា ឆ្នាំ ២០២១ស្អែកនេះវ៉ាក់សាំងកូវីដ-១៩ប្រភេទ សុីណូវ៉ាក់ ចំនួន៣លានដូសទៀត នឹងដឹកមកដល់កម្ពុជាដែលជាការបញ្ជាទិញរបស់រាជរដ្ឋាភិបាលហើយវ៉ាក់សាំងទាំងនេះទុកសម្រាប់ចាក់ជូនកុមារអាយុ៦ឆ្នាំ ដល់ក្រោម១២ ឆ្នាំ និងសម្រាប់ចាក់ដូសជំរុញជូនមនុស្សពេញវ័យផងដែរ ។

លោកជំទាវ រដ្ឋលេខាធិការបានបញ្ជាក់ទៀតថារហូតមកដល់ពេលនេះទាំងវ៉ាក់សាំងជំនួយនិងការបញ្ជាទិញរបស់កម្ពុជាយើងមានវ៉ាក់សាំងនៅក្នុងដៃសរុបចំនួន ៣៥លាន ៥សែនដូសហើយ។

លោកជំទាវ យក់ សម្បត្តិ បានបន្តថានៅក្នុងខែតុលាឆ្នាំ ២០២១ ខាងមុខនេះកម្ពុជាយើងក៏នឹងទទួលបានវ៉ាក់សាំងជាជំនួយរបស់មិត្តចិនជូនរាជរដ្ឋាភិបាលកម្ពុជាតាមរយៈឯកឧត្តម វ៉ាង យី រដ្ឋមន្ត្រីការបរទេសចិនចំនួន ៣លានដូសបន្ថែមទៀតផងដែរ។

ជាមួយនឹងការផ្តល់ជំនួយយ៉ាងច្រើនសន្ធឹកសន្ធាប់ដល់ការអភិវឌ្ឍប្រទេសកម្ពុជាចិនបានក្លាយជាប្រទេសបង្អែកក្នុងការផ្គត់ផ្គង់វ៉ាក់សាំងដល់ប្រទេសកម្ពុជា។ មកដល់ពេលនេះប្រទេសកម្ពុជាទទួលបានវ៉ាក់សាំងបង្ការការពារមេរោគកូវីដ-១៩ ពីរដ្ឋាភិបាលនៃសាធារណរដ្ឋប្រជាមានិតចិននិងប្រជាជនចិនចំនួន ២៦លាន ៨សែនដូសហើយ។

គួរបញ្ចាក់ថាចំនួនអត្រាចាក់វ៉ាក់សាំងកូវីដ-១៩ នៅកម្ពុជាគិតត្រឹមថ្ងៃទី២៦ ខែកញ្ញា ឆ្នាំ២០២១ មាន ៩៨,៨០%  ធៀបជាមួយចំនួនប្រជាជនគោលដៅ ១០លាននាក់  និងលើកុមារ-យុវវ័យអាយុពី ១២ឆ្នាំទៅក្រោម ១៨ឆ្នាំ មាន ៨៩,០៨% ធៀបជាមួយចំនួនប្រជាជនគោលដៅ ១,៩៦៦,៩៣១ នាក់ និងលើកុមារអាយុពី ០៦ឆ្នាំ  ដល់ក្រោម ១២ឆ្នាំ មាន  ៧៨,៦៤% ធៀបជាមួយនឹងប្រជាជនគោលដៅ ១,៨៩៧, ៣៨២ នាក់។