នារសៀលថ្ងៃទី២៣ ខែកញ្ញានេះ មន្ទីរធម្មការនិងសាសនា បានចេញសេចក្តីប្រាសព័ត៌មានបន្ទាន់មួយទាក់ទិននិងការផ្អាកការជួបជុំ និងការជួបជុំថ្វាយបង្គំជាបណ្តោះអាសន្នក្នុងភូមិសាស្ត្រ រាជធានីភ្នំពេញ ដោយរង់ចាំជូនដំណឹងជាថ្មី។
លោក សេង សុមុនី រដ្ឋលេខាធិការ និងជាអ្នកនាំពាក្យក្រសួងធម្មការ និងសាសនា បានប្រាអោយដឹងថាក្រសួងស្ថាប័នពាក់ព័ន្ធ កំពុងពិភាក្សាគ្នា លើករណីផ្ទុះឡើងជំងឺកូវីដ-១៩ នៅតាមទីអារាម ក្នុងអំឡុងពេលនៃការរៀបចំពិធីបុណ្យកាន់បិណ្ឌ-ភ្ជុំបិណ្ឌនេះ។
ការប្រជុំបន្ទាន់នេះ បានធ្វើឡើងបន្ទាប់ពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានណែនាំឲ្យក្រសួងពាក់ព័ន្ធ ធ្វើការពិភាក្សាគ្នា ក្នុងការផ្អាកពិធីបុណ្យកាន់បិណ្ឌ និងភ្ជុំបិណ្ឌ ឬក៏បង្រួមកម្មវិធី ឲ្យមានមនុស្សចូលរួមតិចបំផុត ដើម្បីទប់ស្កាត់ការឆ្លងរីករាលដាល នៃជំងឺកូវីដ-១៩ បន្ទាប់ពីមានការផ្ទុះឡើងករណីឆ្លង ជំងឺកូវីដ-១៩ នៅក្នុងវត្តចំនួន២កន្លែង នៅភូមិសាស្ត្ររាជធានីភ្នំពេញសម្រាប់ថ្ងៃកាន់បិណ្ឌទី២។
សូមជម្រាបថា វត្តចំនួន២ទីតាំង ដែលផ្ទុះឡើងនៃជំងឺកូវីដ-១៩ នៅក្នុងពិធីបុណ្យកាន់បិណ្ឌនាថ្ងៃទី២នេះ មានវត្តនាគវ័ន និងវត្តចំពុះក្អែក៕
