ភ្នំពេញ៖ ប្រទេសកម្ពុជា បានរួចផុតពីឋានៈជាក្រុមប្រទេសអភិវឌ្ឍន៍តិចតួចហើយបន្ទាប់ពីមានការវាយតម្លៃចុងក្រោយរបស់អង្គការសហប្រជាតិនៅឆ្នាំ ២០២១នេះ។ នេះបើយោងតាមសារលិខិត សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាក្នុងឱកាសនៃទិវាសន្តិភាពអន្តរជាតិថ្ងៃទី២១ ខែកញ្ញា ឆ្នាំ២០២១។

សម្តេចតេជោ ហ៊ុន សែន បានលើកឡើងថា៖ «តាមការវាយតម្លៃចុងក្រោយរបស់អង្គការសហប្រជាជាតិដែលធ្វើឡើងនៅរៀងរាល់៣ឆ្នាំម្តង ទិន្នន័យក្នុងឆ្នាំ២០២១ បង្ហាញថាជាលើកដំបូងក្នុងប្រវត្តិសាស្ត្ររបស់កម្ពុជា កម្ពុជាមានលទ្ធភាពអាចបំពេញតាមលក្ខខណ្ឌដែលអាចចាត់ទុកថារួចផុតពីឋានៈជាក្រុមប្រទេសមានការអភិវឌ្ឍតិចតួច»។

ជាមួយគ្នានេះសម្តេចតេជោនាយករដ្ឋមន្ត្រីបានបញ្ជាក់ថា៖ «តាមរយៈសន្តិភាពដ៏វិសេសវិសាលថ្លៃថ្លា បានផ្ដល់ឱកាសដល់រាជរដ្ឋាភិបាលនិងប្រជាជនកម្ពុជាខិតខំប្រឹងប្រែងស្តារនិងកសាងប្រទេសជាតិឡើងវិញព្រមទាំងបោះជំហានយ៉ាងរឹងមាំនៅលើមាគ៌ាអភិវឌ្ឍន៍និងទទួលបានការរីកចម្រើនលើគ្រប់វិស័យគួរជាទីមោទនៈសមស្របតាមពាក្យស្លោកមានសន្តិភាពមានការអភិវឌ្ឍ»។

សម្តេចតេជោ ហ៊ុន សែន បានបន្ថែមថាអស់រយៈពេលជាងពីរទសវត្សរ៍កន្លងមកនេះកំណើនសេដ្ឋកិច្ចកម្ពុជាបានកើនឡើងជាមធ្យមប្រមាណ៧% ជារៀងរាល់ឆ្នាំហើយសន្ទុះនៃការរីកចម្រើននេះបានត្រួសត្រាយផ្លូវសម្រាប់កម្ពុជាទទួលបានឋានៈជាប្រទេសមានចំណូលមធ្យមកម្រិតទាបក្នុងឆ្នាំ២០១៥ហើយអាចនឹងឈានទៅសម្រេចបានឋានៈជាប្រទេសមានចំណូលមធ្យមកម្រិតខ្ពស់ត្រឹមឆ្នាំ២០៣០និងជាប្រទេសមានចំណូលកម្រិតខ្ពស់នៅឆ្នាំ២០៥០ ៕