បារាំងកាលពីថ្ងៃសៅរ៍បានចោទប្រកាន់អាមេរិកនិងអូស្រ្តាលីថាបានភូតភរ ក្នុងការបែកធ្លាយរឿងបញ្ចប់កិច្ចសន្យារបស់អូស្រ្តាលី ដែលថានឹងទិញនាវាមុជទឹកពីបារាំង ព្រមទាំងបានព្រមានថាវិបត្តិដ៏ធ្ងន់ធ្ងរនឹងកើតមានដោយខានពុំបាននៅក្នុងសម្ព័ន្ធមិត្តដ៏យូរលង់មួយនេៈ ។
ការសម្រេចចិត្តរបស់អូស្ត្រាលីក្នុងការលុបចោលកិច្ចសន្យាទិញនាវាមុជទឹកបារាំង ហើយងាកទៅរកអាមេរិកវិញនោះ បានធ្វើឲ្យទីក្រុងប៉ារីសមានកំហឹងក្រេវក្រោធយ៉ាងខ្លាំង ដែលជាហេតុនាំឲ្យលោកប្រធានាធិបតី Emanuel Macron ធ្វើការកោះហៅឯកអគ្គរដ្ឋទូតប្រចាំទីក្រុង កង់បេរ៉ានិងវ៉ាស៊ីនតោនឲ្យត្រឡប់មកកាន់មាតុប្រទេសវិញដែលជាទង្វើមួយពុំធ្លាប់មានពីមុនមក។
ជម្លោះនេះបានរាលដាលរហូតដល់ធ្វើឲ្យមានការប្រេះឆារវាងសម្ព័ន្ធមិត្តដ៏យូរលង់ និងសេចក្តីសង្ឃឹមដែលបានបាត់បង់ក្នុងសករាជលោកប្រធានាធីបតីTrump ហើយដែលវាបានត្រឡប់មកវិញនៅក្នុងអាណ្ណត្តិថ្មីរបស់លោកប្រធានាធិបតី Joe-Biden ដែលនាំមកនូវភាពប្រសើរឡើងវិិញរវាងទីក្រុងប៉ារីសនិងវ៉ាស៊ិនតោន។
ថ្លែងទៅកាន់ទូរទស្សន៍បារាំង 2 លោករដ្ឋមន្ត្រីក្រសួងការបរទេស Jean- Yves Le Drian មិនបានចង្អុលបង្ហាញថាបារាំងបានប្រុងប្រៀបនឹងធ្វើឲ្យវិបត្តិនេះស្ងប់ស្ងាត់ទៅវិញទេ ដោយលោកប្រើពាក្យពេចន៍ចំៗដែលមិនមែនជាភាសារទូតទៅកាន់អូស្រ្តាលី សហរដ្ឋអាមេរិកនិងអង់គ្លេស ដែលជាអ្នកចូលរួមក្នុងរឿងកិច្ចព្រមព្រៀងសន្តិសុខត្រីភាគីនោះផងដែរ។"វាមានរឿងភូតភរ វៀចវេរ បោកបញ្ឆោត ដែលជាការក្បត់នឹងទំនុកចិត្ត និងជាការប្រមាថផងដែរ"Le Drian បាននិយាយ "រឿងនេះមិនអាចធ្វើទៅបានទេ"។លោកបានពិពណ៌នាទៀតថាការដកត្រឡប់មកវិញនូវឯកអគ្គរដ្ឋទូតពីប្រទេសទាំង២ វាជាលើកទី១ក្នុងប្រវត្តិសាស្រ្តរវាងប្រទេសទាំងនោះ វាក៏ជានិមិត្តរូបផងដែរ
នៃសកម្មភាពរបស់យើងដែលចង់បង្ហាញថា យើងមិនសប្បាយចិត្តនិងវាក៏បញ្ជាក់ពីវិបត្តិដ៏ធ្ងន់ធ្ងររវាងប្រទេសនឹងប្រទេសដែលពិបាកនឹងរកអ្វីមកជូសជុលបាន។ប៉ុន្តែអូស្រ្តាលីបានឆ្លើយតបទៅនឹងការចោទប្រកាន់របស់បារាំង ថាជាទង្វើរក្បត់របស់ខ្លួនជាមួយនឹងទីក្រុងប៉ារីស តាមរយៈលោករដ្ឋមន្រ្តីក្រសួងការពារជាតិ Peter Dutton វិញថា ទីក្រុងកង់បេរ៉ា មានភាពស្មោះត្រង់ បើកចំហរ និងមិនវៀចវេរ ជាមួយនឹងទីក្រុងប៉ារីស ដែលកំពុងមានការខ្វាយខ្វល់នៅលើរឿងនេះទេ ។ កាលពីថ្ងៃអាទិត្យ លោករដ្ឋមន្ត្រីក្រសួងហិរញ្ញវត្ថុ Simon Birmingham បាននិយាយថា ប្រទេសរបស់លោកបានជូនព័ត៌មានទៅរដ្ឋាភិបាលបារាំង ឲ្យបានដឺងមុនគេបង្អស់ មុននឹងរឿងនេះបែកធ្លាយជាសាធារណៈ ។លោកបាននិយាយប្រាប់វិទ្យុ ABC ថា វាជាសេចក្តីសម្រេចដ៏លំបាកជាទីបំផុត ដើម្បីបញ្ចប់កិច្ចសន្យាជាមួយបារាំង។
