កោះកុង៖ កម្លាំងអធិការដ្ឋាននគរបាលស្រុកកោះកុង ឃាត់ខ្លួនមនុស្សចំនួន ២នាក់ និងរថយន្តមួយគ្រឿងពាក់ព័ន្ធករណី បានលួចកាប់ឈើកាស្យា របស់ក្រុមហ៊ុន ដោយមិនមានការអនុញ្ញាត។

មន្ត្រីនគរបាលខេត្តកោះកុង បានឲ្យដឹងថា កាលពីថ្ងៃទី១៣ ខែកញ្ញា ឆ្នាំ២០២១ វេលាម៉ោង ១៥និង០០នាទីរសៀល ក្រោយពីទទួលបានសេចក្ដីរាយការណ៍ពីប៉ុស្តិ៍រដ្ឋបាលជ្រោយប្រស់ ថាមានរថយន្តប្រភេទ វ៉េអង ម៉ាកហ៉ាន់ដាយ ពណ៌ស-លាយខៀវ ពាក់ផ្លាកលេខ ភ្នំពេញ 3E-6746 សណ្ដោងរ៉ឺម៉ក ពាក់ផ្លាកលេខ ព្រះសីហនុ 4A-5666 បានដឹកឈើកាស្យាពេញរថយន្ត ចេញពីចំណុចថ្មពាង ស្ថិតក្នុងភូមិជ្រោយប្រស់ ឃុំជ្រោយប្រស់ គោលបំណងឆ្ពោះទៅភ្នំពេញ ភ្លាមនោះកម្លាំងជំនាញអធិការដ្ឋាននគរបាលស្រុកកោះកុង និងកម្លាំងប៉ុស្តិ៍ បានឃាត់សួរនាំដើម្បីរកម្ចាស់ (អ្នកទិញ និងអ្នកលក់) ហើយបានចុះដល់កន្លែងកើតហេតុ និងទទួលបានសេចក្តីរាយការណ៍ តាមរយៈទូរស័ព្ទពីលោក ស ជឿន តំណាងក្រុមហ៊ុន ហ្គ្រិនរិច គ្រុប ថាម្ចាស់រថយន្ត និងបក្ខពួកបានលួចកាប់ឈើកាស្យារបស់ក្រុមហ៊ុន ដោយមិនមានការអនុញ្ញាតពីក្រុមហ៊ុន ក្រោយទទួលបានសេចក្ដីរាយការណ៍រួច កម្លាំងជំនាញអធិការដ្ឋាន បាននាំរថយន្តមកអធិការដ្ឋាននគរបាលស្រុកកោះកុង ឃាត់ខ្លួនមនុស្សចំនួន ២នាក់ នៅក្នុងរថយន្ត នៅវេលាម៉ោង២១និង៣០នាទី។

បច្ចុប្បន្ន កម្លាំងយើងបានកសាងសំណុំរឿងបញ្ជូនជនសង្ស័យមកស្នងការដ្ឋានចាត់ការបន្ត៕