នាព្រឹកថ្ងៃទី១១ ខែកញ្ញានេះ សាលាដំបូងរាជធានីភ្នំពេញ បានសម្រេចប្រគល់មន្ត្រីនគរបាលឈ្មោះ ម៉ាត់ ពិសី ឱ្យទៅអង្គភាពវិញដោយមិនមានការដាក់ទោស ទណ្ឌ ឬឃុំខ្លួនដាក់ពន្ធគារនោះទេ ក្រោយបើកការស៊ើបសួរអស់រយៈពេលមួយ២ ថ្ងៃរួចមក។ 

តាមការបញ្ចាក់ពីសមត្ថកិច្ចបានដឹងថា មន្ត្រីនគរបាលរូបនោះ ត្រូវរងការពិន័យកងកម្លាំងចំនួនមួយខែនៅក្នុងអង្គភាព ដោយមិនអនុញ្ញាតឱ្យចេញទៅណាមកណា បើគ្មានបទបញ្ជា។

គួរបញ្ចាក់ថាមន្ត្រីនគរបាលឈ្មោះ ម៉ាត់ ពិសី ភេទប្រុស អាយុ៣០ឆ្នាំ មានឋាននន្ទរស័ក្តអនុសេនីយ៍ទោ បម្រើការងារនៅផ្នែកអន្តរាគមន៍ នៃអធិការដ្ឋាននគរបាលខណ្ឌ៧មករា រាជធានីភ្នំពេញ បានជាប់ពាក់ព័ន្ធនឹងការយកវិទ្យុទាក់ទង (អាយឌី) វាយក្បាលនារីម្នាក់ដែលជិះម៉ូតូមិនពាក់មួកសុវត្តិភាព ដោយបើកបរបញ្ច្រាស់ទិសមិនគោរពច្បាប់ចរាចរណ៍ ហេតុការណ៍នេះកើតឡើងនៅវេលាម៉ោង ជិត ៨ និង២០នាទីយប់ ថ្ងៃទី ៨ ខែកញ្ញា ឆ្នាំ ២០២១ នៅ គោលដៅត្រួតពិនិត្យ ច្បាប់ចរាចរណ៍ ក្នុងភូមិសាស្ត្រខណ្ឌ ៧មក រាជធានីភ្នំពេញ ចំណុចម្ដុំអាងទឹកពហុកីឡដ្ឋានជាតិអូឡាំពិក។

ក្រោយហេតុការណ៍ភ្លាមលោក ម៉ាត់ ពិសី ត្រូវបានអង្គភាពឃាត់ខ្លួន ដើម្បីរង់ចាំការដោះស្រាយជាមួយភាគីរងរបួស។ ប៉ុន្តែដំណោះស្រាយមិនអាចដោះបាន ដោយភាគីនារីរងគ្រោះបានទាមទារប្រាក់សំណងដល់ទៅ ១០,០០០ដុល្លារអាមេរិក ភាគីលោក ម៉ាត់ ពិសី គ្មានលទ្ធភាពនឹងសង ព្រោះដោយសារខ្លួនក៍មានបញ្ហាជីវភាពផងដែរ សព្វថ្ងៃខ្លួនជួលផ្ទះគេស្នាក់នៅ ជាមួយម្តាយដែលប្រកបមុខរបរលក់បាយកញ្ចប់។

ករណីនេះមានតែតុលារប៉ុណ្ណោះដើម្បីបន្តនីតិវិធីច្បាប់ និងស្វែងរកភាពស្អាតស្អំ និងយុត្តិធម៌ជូនភាគីទាំងពីរ៕