អាហ្វហ្គានីស្ថានមានធនធានរ៉ែ ដែលមានតម្លៃរាប់ពាន់ពាន់លានដុល្លារ ហើយក៏កំពុងតែត្រូវការនូវការអភិវឌ្ឍន៍ខាងហេដ្ឋារចនាសម្ព័ន្ធក្នុងប្រទេស។
ចិនជាប្រទេសមួយក្នុងចំណោមប្រទេសមួយចំនួន ដែលជាមហាអំណាចសេដ្ឋកិច្ច ដែលបានទទួលស្គាល់រដ្ឋាភិបាលតាលីបង់ ដែលបានធ្វើឲ្យពិភពលោករន្ធត់ញាប់ញ័រជាខ្លាំង ក្រោយពេលដែលតាលីបង់បានចូលកាន់អំណាច។
«រឿងនេះវាបានបញ្ចប់ទៅក្នុងរយៈពេលជាង៣សប្តាហ៍ នូវអំពើអាណាធិបតេយ្យ ដែលវាមានសារៈសំខាន់សំរាប់អាហ្វហ្គានីស្ថានក្នុងការរៀបចំឡើងវិញនូវរបៀបរៀបរយសណ្តាប់ធ្នាប់ និងស្ថាបនាប្រទេសឡើងវិញ» Wang Weibing អ្នកនាំពាក្យក្រសួងការបរទេសចិន បាននិយាយប្រាប់អ្នកសារព័ត៌មានកាលពីថ្ងៃព្រហស្បតិ៍។
ប៉ុន្តែអ្នកជំនាញការជាច្រើននៅក្នុងតំបន់ ដែលបានស្តាប់នូវសេចក្តីថ្លែងការណ៍នេះ មិនជឿថា ចិននឹងប្រថុយប្រថានចូលមកក្នុងអាហ្វហ្គានីស្ថាន ដើម្បីជួយស្ថាបនាប្រទេស ក៏ដូចជារុករកធនធានធម្មជាតិដ៏មហាសាលនេះទេ។
ប្រទេសចិនមិនមានការចុះសម្រុងជាមួយនឹង ពួកអុីស្លាមនិយមជ្រុលនៅផ្នែកខាងលិចរបស់ខ្លួននោះទេ ហើយមានការប្តេជ្ញាចិត្តយ៉ាងមុតមាំថា នឹងមិនធ្លាក់ទៅក្នុងអន្លង់ ឬជាប់ផុង ដូចអតីតសហភាពសូវៀត និងសហរដ្ឋអាមេរិកនៅក្នុងអាហ្វហ្គានីស្ថាននោះដែរ អ្នកវិភាគនិយាយយ៉ាងដូច្នេះ។
អ្នកវីភាគបានបន្ថែមទៀតថា បើសិនជាចិនចង់វិនិយោគ ក៏មិនមែនពេលនេះដែរ ត្រូវការសិក្សាបន្ថែមពីហានិភ័យនៃសុវត្តិភាព និងសន្តិសុខ៕
