ការប្រីអំពើហឹង្សាទៅលើអ្នកកាសែតអាហ្វហ្គានីស្ថានដោយពួកតាលីបង់ ធ្វើឲ្យមានការព្រួយបារម្ភពីសេរីភាពនៃប្រព័ន្ធផ្សព្វផ្សាយក្នុងប្រទេសមួយនេះ ដែលនាំឲ្យអ្នកសារព័ត៌មានជើងចាស់ម្នាក់ប្រកាសថា «សេរីភាពរបស់សារព័ត៌មានត្រូវបានបញ្ចប់»។ ខណៈដែលរូបភាពដែលជាសាក្ខីភាព នៃទាណកម្មបានបោះពុម្ភផ្សាយនៅលើទំព័រនៃកាសែតធំៗលើពិភពលោក បានចុះផ្សាយពីការចាប់ខ្លួន និងវាយធ្វើបាបទៅលើអ្នកកាសែត២រូប ដែលបានចូលទៅយកព័ត៌មាន ពីការធ្វើការតវ៉ារបស់ក្រុមស្រ្តីនៅក្នុងទីក្រុងកាប៊ុល បានធ្វើឲ្យក្រុមអ្នកតាមឃ្លាំមើលសិទ្ធមនុស្ស និងអង្គការការពារសិទ្ធសេរីភាពសារព័ត៌មានមានកង្វល់ និងបារម្ភថា វានឹងអាចកើតមានឡើងជាបន្តបន្ទាប់។

គ្រាន់តែក្នុងរយៈពេល២សប្តាហ៍ ពួកតាលីបង់បានចាប់ខ្លួនអ្នកកាសែតចំនួន ១៤នាក់ ហើយក្រោយមកបានដោះលែងវិញ ដែលនៅក្នុងនោះ អ្នកកាសែត៦រូបបានរងទារុណកម្ម ដោយការវាយទាត់ធាក់ ក្នុងអំឡុងពេលចាប់ខ្លួន និងឃុំឃាំង គណកម្មការការពារសិទ្ធអ្នកសារព័ត៌មានបានរាយការណ៍។ អ្នកសាព័ត៌មានដ៏ទៃទៀត មានអ្នកដែលធ្វើការឲ្យ BBC ក៏ត្រូវបានហាមឃាត់មិនឲ្យថតរូបការតវ៉ាប្រឆាំងរបស់ក្រុមស្រ្តី ដែលមិនពេញចិត្តចំពោះការដឹកនាំរបស់ពួកតាលីបង់ កាលពីថ្ងៃពុធ។

ការគំរាមកំហែងជាថ្មីមកលើអ្នកសារព័ត៌មាននេះ បានកើតឡើងចំពេលជាមួយគ្នា ដែលមានសេចក្តីប្រកាសមួយ ចេញដោយរដ្ឋមន្រ្តីក្រសួងមហាផ្ទៃថ្មី ថានឹងមិនឲ្យមានការធ្វើបាតុកម្ម ដោយគ្មានការអនុញ្ញាតិនោះទេ។ ពួកតាលីបង់ បាននិយាយថា គេនឹងអនុញ្ញាតិឲ្យអ្នកកាសែតធ្វើការងាររបស់ខ្លួន ដោយរលូន បើសិនជាពួកគេគោរពច្បាប់សាសនា៕