កាលពីវេលាយប់ប្រមាណម៉ោង៨ជាងថ្ងៃទី៨ខែកញ្ញាមាននារីរូបស្រស់ម្នាក់ កំពុងជិះម៉ូតូពីរនាក់ប្អូនប្រុសសំដៅទៅចូលរួមកម្មវិធីខួបកំណើតគេ ប៉ុន្តែខណៈដល់ចំណុចផ្លូវ២១៥ សង្កាត់វាលវង់ ខណ្ឌ៧មករា ស្រាប់តែជួបគោលដៅត្រួតពិនិត្យច្បាប់ចរាចរណ៍ ក៏បានជិះបកក្រោយ ព្រោះខ្លួនគ្មានមួកការពារសុវត្ថិភាព ស្រាប់តែសមត្ថកិច្ចម្នាក់ បានប្រេីវិទ្យុទាក់ទងវាយទៅលេីសំដៅចំក្បាល បណ្តាលឱ្យបែក និងធ្លាក់ពីលើម៉ូតូរងរបួសធ្ងន់។
ក្រោយពេលកើតហេតុ នារីរងគ្រោះ បានទៅសម្រាកព្យាបាលនៅមន្ទីរពេទ្យមួយកន្លែង ដោយបានធ្វើការសំនូមពរទៅកាន់ថ្នាក់ដឹកនាំជួយរកយុត្តិធម៌ជូននាង ដោយខ្លួនព្រមទទួលកំហុសថា គ្មានមួកការពារ និងបានជិះបកក្រោយពិតមែន តែមិនគួរសមត្ថកិច្ចប្រើហិង្សារបែបនេះមកលើខ្លួននោះទេ។
បច្ចុប្បន្នម៉ូតូរបស់នារីរងគ្រោះ ត្រូវបានសមត្ថកិច្ចយកទៅរក្សាទុក នៅអធិការដ្ឋាននគរបាលខណ្ឌ៧មករា ដើម្បីរង់ចាំជនរងគ្រោះ ចូលខ្លួនទៅដោះស្រាយ តាមនីតិវិធីច្បាប់។ ករណីនេះកំពុងមានការចាប់អារម្មណ៍ពីមហាជនអ្នកលេងបណ្តាញសង្គមហ្វេសបុក ដោយធ្វេីការរិះគន់ទៅលេីសមត្ថកិច្ចដែលជាអ្នកអនុវត្តច្បាប់ថា មិនគួរប្រេីហិង្សាដូចនេះទេ ដែលជាការជះឥទ្ធិពលអាក្រក់ក្នុងសង្គមដែលមានច្បាប់៕