បន្ទាប់ពីប្រទេសថៃ មានចំនួនអ្នកឆ្លងកូវីដ-១៩ រយ:ពេលជាងមួយសប្តាហ៍មកនេះ មានការថយចុះជាបន្តបន្ទាប់ ខាងអាកាសចរណ៍ស៊ីវិលរបស់ថៃបានបង្ហើបអោយដឹងថា÷ រដ្ឋាភិបាលរបស់ថៃបានសម្រេចចិត្ត បើកអោយមានការធ្វើដំណើរតាមផ្លូវអាកាសឡើងវិញ ដោយការបើកអោយប្រើប្រាស់ការធ្វើដំណើរតាមយន្តហោះនេះ គឺចាប់ផ្តើមពីថ្ងៃទី០១ ខែកញ្ញាខាងមុខនេះ បន្ទាប់ពីរដ្ឋាភិបាលថៃ យល់ឃើញថា ការធ្វើដូច្នេះ គឺជាចំណែកមួយ ក្នុងការស្តារសេដ្ឋកិច្ចប្រទេសឡើងវិញក្រោយពីរងផលប៉ះពាល់ដោយសារវិបត្តិកូវីដ-១៩។

ការប្រកាសនេះបានធ្វើឡើងបន្ទាប់ពីមានការបន្ធូរបន្ថយវិធានការរឹតបន្តឹងនៅក្នុងខេត្តចំនួន២៩ ដែលមានហានិភ័យឆ្លងខ្ពស់នៃជំងឺកូវីដ-១៩ ចាប់ពីខែក្រោយដោយរួមទាំងការអនុញ្ញាតឲ្យធ្វើដំណើរឆ្លងខេត្តនិងបើកផ្សារទំនើបឡើងវិញ។

អាជ្ញាធរអាកាសចរណ៍ស៊ីវិលថៃ បានសេចក្តីថ្លែងការណ៍ថា ជើងហោះហើរក្នុងស្រុកអាចផ្ទុកអ្នកដំណើរបានរហូតដល់៧៥% ហើយអ្នកដំណើរនឹងចាំបាច់ត្រូវធ្វើតាមលក្ខខណ្ឌនៃការធ្វើដំណើរនៅពេលទៅដល់គោលដៅដូចជា បង្ហាញប័ណ្ណចាក់វ៉ាក់សាំង និងលទ្ធផលតេស្តិ៍ជំងឺកូវីដ-១៩ជាដើម។

អាជ្ញាធរអាកាសចរណ៍ស៊ីវិលថៃបានបន្តថា ជើងហោះហើរទៅតំបន់ដែលស្ថិតក្រោមផែនការបើកទទួលភ្ញៀវទេសចរណ៍ឡើងវិញក៏នឹងត្រូវបានអនុញ្ញាតផងដែរ។

សូមបញ្ជាក់ផងដែរថា÷ យោងតាមក្រសួងសុខាភិបាលថៃបានអោយដឹងថា នៅថ្ងៃទី៣១ សីហា ២០២១នេះ ប្រទេសថៃមានអ្នកឆ្លងត្រឹមតែ ១៤,៦៦៦នាក់ប៉ុណ្ណោះ និងអ្នកបាត់បង់ជីវិតចំនួន ១៩០នាក់ សរុបអ្នកឆ្លងទាំងអស់ចំនួន ១,២០៤,៧២៩នាក់ និងអ្នកស្លាប់សរុបចំនួន  ១១,៥៨៩នាក់៕

អត្ថបទ និងរូបភាពដោយ កណ្តាប់ដៃដែក