លោក គង់ ពុទ្ធិការ អគ្គនាយក នៃអាជ្ញាធរជាតិព្រះវិហារ បានឲ្យដឹងនារសៀលថ្ងៃទី៣០ ខែសីហា នេះថា អាជ្ញាធរកំពុងរៀបចំផែនការ ដើម្បីដោះមីននៅតំបន់ប្រសាទកោះកែរ និងប្រាសាទព្រះវិហារ ដោយសាតែតំបន់ទាំងនេះ មានសល់គ្រាប់មីន ក៏ដូចជាគ្រាប់មិនទាន់ផ្ទុះមួយចំនួន ដែលត្រូវតែឆែកឡើងវិញ ដើម្បីចៀសវាងមានផលប៉ះពាល់ដល់ភ្ញៀវទេសចរណ៏ ក៏ដូចជាប្រជាពលរដ្ឋ។
លោក គង់ ពុទ្ធិការ អះអាងថា នៅតំបន់ប្រាសាទកោះកេរ ដោះមិនទាន់អស់តែ មាននៅសល់តិចតួចនៅក្នុងតំបន់ប្រាសាទកោះកេរនេះ ហើយតំបន់នេះអង្គការស៊ីម៉ាក់ (CMAC) ធ្លាប់ដោះច្រើនដងហើយ ប៉ុន្តែមិនទាន់អស់។ តាមផែនទីរបស់ស៊ីម៉ាក់ គឺនៅសល់ផ្ទៃដីមួយចំនួនតូច ដែលត្រូវធ្វើការដោះមីនបន្ថែមទៀត ដើម្បីបង្ហើយ។
ចំណែកនៅប្រាសាទព្រះវិហារ ក៏បានដោះច្រើនលើកដែរ ប៉ុន្តែមានបញ្ហាជម្លោះប្រដាប់អាវុធជាមួយថៃ កាលពីឆ្នាំ២០០៨ ដែលចាំបាច់ត្រូវតែឆែកឡើងវិញ ដើម្បីកុំឲ្យមានបញ្ហាគ្រោះថ្នាក់ណាមួយដល់ប្រជាពលរដ្ឋ ក៏ដូចជាភ្ញៀវទេសចរ និងអ្នកគ្រប់គ្រងនៅទីនោះ ដូច្នេះត្រូវតែរៀបចំផែនការនេះ។
សូមបញ្ជាក់ថា តំបន់ប្រាសាទកោះកេរមានទីតាំងស្ថិតនៅក្នុងភូមិស្រយ៉ង់ជើង ឃុំស្រយ៉ង់ ស្រុកគូលេន ខេត្តព្រះវិហារ មានចម្ងាយប្រមាណ៤៩ គីឡូម៉ែត្រ ពីទីរួមខេត្តព្រះវិហារ កាលពីឆ្នាំ២០១៨ ត្រូវបានស្ថាប័នជំនាញចុះសិក្សាស្រាវជ្រាវ ដើម្បីស្នើសុំចុះក្នុងបញ្ជីសម្បត្តិបេតិកភណ្ឌពិភពលោក ហើយកាលពីថ្ងៃទី២៤ ខែសីហា ឆ្នាំ២០២១ លោកស្រីបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ក៏បានជួបប្រជុំពិភាក្សា ជាមួយលោកស្រីបណ្ឌិត Mechtild ROSSLER នាយិកា នៃមជ្ឈមណ្ឌលបេតិកភណ្ឌពិភពលោក និងលោកបណ្ឌិត Jing Feng ប្រធានការិយាល័យ តំបន់អាស៊ី និងប៉ាស៊ីហ្វិក នៅទីស្នាក់ការកណ្តាលអង្គការយូណេស្កូ នាទីក្រុងប៉ារីស ដើម្បីត្រៀមចុះតំបន់ប្រាសាទកោះកេរ ទៅក្នុងបញ្ជីបេតិកភណ្ឌពិភពលោក នៅឆ្នាំ២០២២ខាងមុខ៕
អត្ថបទ និងរូបភាពដោយ មានជ័យ