ក្រុមការងារ នៃនាយកដ្ឋានអភិរក្សប្រាសាទ ក្នុងឧទ្យានអង្គរ និងបុរាណវិទ្យាបង្ការ នៃអាជ្ញាធរជាតិអប្សរា បានត្រៀមអនុវត្តគម្រោងជួសជុលពង្រឹងខឿនរួតបាកាណ ដោយរៀបចំពិធីបួងសួងតាមទំនៀមទម្លាប់បុរាណ ដើម្បីធ្វើការជួសជុល ហើយពិធីបួងសួងបានធ្វើឡើងកាលពីថ្ងៃអង្គារ នេះបើយោងតាមរបាយការណ៏ ដែលទើបទទួលបាននៅថ្ងៃទី២៨ ខែសីហា ឆ្នាំ២០២១ នេះ។
លោក ម៉ៅ សុខនី ប្រធានគម្រោងជួសជុល នៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការបានថ្លែងថា គម្រោងនេះ នឹងអនុវត្តរយៈពេល៥ឆ្នាំ ក្នុងបំណងដើម្បីពង្រឹងខឿនរួតបាកាណឱ្យរឹងមាំឡើងវិញ ក្រោយស្ថានភាពថ្មមានការធ្លាក់ និងញែកចេញពីគ្នា។ លោកបញ្ជាក់ថា “យើងកំពុងសិក្សាចែកភិនភាគថ្ម វាមានថ្មដំបូល ថ្មហោជាង ចែកវាឱ្យដាច់ ស្រួលពេលយើងរៀបចំទៅវិញ”។
បើតាមលោក ម៉ៅ សុខនី ស្ថានភាពខឿនរួតបាកាណ នៃប្រាសាទអង្គរវត្តនេះ មានការហែក ខ្លះបម្រុងធ្លាក់ ហើយក្រុមការងារ នឹងរៀបចំរុញថ្មទាំងនោះឱ្យទៅទីតាំងដើមវិញ ក្នុងន័យពង្រឹងខឿនឱ្យមានភាពរឹងមាំ គង់វង្សតទៅមុខទៀត ហើយគម្រោងជួសជុលនេះ មិនប៉ះពាល់ដល់ការទស្សនារបស់ភ្ញៀវទេសចរទេ ពីព្រោះការជួសជុលនឹងបែងចែកជាជ្រុងៗ និងជាដំណាក់កាលៗ។
សូមបញ្ជាក់ថាថ្មីៗនេះ អាជ្ញាធរជាតិអប្សរា ទើបបានបញ្ចប់ការងារជួសជុលជ្រុងនិរតីនៃខឿនរួតទី៣ប្រាសាទបាយ័ន ដើម្បីលើកតម្លៃសំណង់បុរាណ និងពង្រឹងភាព រឹងមាំឡើងវិញ នៃរចនាសម្ព័ន្ធប្រាសាទ ដែលការជួសជុលនេះ បានធ្វើឡើងតាំងពីដើមឆ្នាំ២០២១មក ហើយក្នុងដំណើការជួសជុលនេះ ក្រុមការងារបានផ្តោតសំខាន់ទៅលើការពង្រឹងជញ្ជាំងខឿន និងកន្លែងថ្មបាយក្រៀម ដែលក្រៀកចេញពីគ្នា រៀបចំផ្គុំថ្មឡើងវិញតាមលក្ខណៈដើម និងពង្រឹងលើគុណភាពដីរបស់គ្រឹះបុរាណ។ ក្នុងកិច្ចការនេះ ក្រុមការងារក៏បានប្រើប្រាស់ថ្មថ្មីខ្លះៗដើម្បីជំនួសថ្មចាស់ ដែលបានខូចខាតផងដែរ៕
អត្ថបទ និងរូបភាពដោយ មានជ័យ