ខេត្តព្រះសីហនុ៖ គិតត្រឹមថ្ងៃទី២៤ ខែសីហា ឆ្នាំ២០២១ ម្សិលមិញនេះ រដ្ឋបាលខេត្តព្រះសីហនុ បានចេញសេចក្តីសម្រេចបើកឱ្យដំណើរការ ផ្សារចំនួន០៣ នៅក្នុងក្រុងព្រះសីហនុ ដែលបានបំពេញគ្រប់លក្ខខណ្ឌ និងបានឆ្លងកាត់ការត្រួតពិនិត្យនិងវាយតម្លៃ ពីអនុគណៈកម្មការទី៦ (អនុគណៈកម្មការរៀបចំ គ្រប់គ្រងផ្សារ ភោជនីយដ្ឋាន អាហារដ្ឋាន និងអាជីវកម្មលក់ដូររបស់ប្រជាពលរដ្ឋ)។ 

ដោយឡែកចំពោះផ្សារនៅក្នុងស្រុកព្រៃនប់ កាលពីថ្ងៃទី១៣ ខែសីហា ឆ្នាំ២០២១ ក្រុមការងារអនុគណៈកម្មការទី៦ បានចុះបានពិនិត្យ និងផ្សព្វផ្សាយដល់អ្នកគ្រប់គ្រងផ្សារចំនួន ០៣ គឺផ្សារវាលរេញ ផ្សារអូរចំណារ និងផ្សារកោះខ្យង អំពីលក្ខខណ្ឌនៅក្នុងការបើកដំណើរការផ្សារឡើងវិញ ជាពិសេសការអនុវត្តតាមវិធានរដ្ឋបាល  និងសុខាភិបាល ក្នុងការចូលរួមទប់ស្កាត់ការឆ្លងរាលដាលជំងឺកូវីដ-១៩។ 
មកដល់ពេលនេះ ក្រុមការងារអនុគណៈកម្មការទី៦ បានទទួលពាក្យស្នើសុំបើកដំណើរការផ្សារឡើងវិញ មានចំនួន០២ផ្សារ គឺផ្សារវាលរេញ និងផ្សារអូរចំណារ។  ក្នុងនោះក្រុមការងារអនុគណៈកម្មការទី៦ នឹងចុះទៅត្រួតពិនិត្យ តាមពាក្យស្នើសុំ នៅព្រឹកថ្ងៃទី២៦ ខែសីហា ឆ្នាំ២០២១ខាងមុខនេះ។ 

ជាមួយគ្នានេះ លោក គួច ចំរើន អភិបាលនៃគណៈអភិបាលខេត្តព្រះសីហនុ បានមានប្រសាសន៍ថា គ្រប់ផ្សារទំាងអស់ដែលបានបិទកន្លងមក គឺត្រូវតែរៀបចំសណ្តាប់ធ្នាប់ អនាម័យឱ្យបានស្អាតត្រឹមត្រូវ ចំពោះបងប្អូនអាជីវករត្រូវយកសំណាកឱ្យបានរួចរាល់ និងអនុវត្តតាមលក្ខខណ្ឌ ដែលរដ្ឋបាលខេត្តបានណែនាំទើបអនុញ្ញាតឱ្យបើកដំណើរការឡើងវិញ។
ទន្ទឹមនឹងនេះ លោកអភិបាលខេត្តក៏បានស្នើឱ្យបងប្អូនអាជីវករទាំងអស់ ត្រូវរួមសហការជាមួយអាជ្ញាធរមានសមត្ថកិច្ច ឱ្យបានល្អប្រសើរ ដោយអនុវត្តឱ្យបានខ្ជាប់ខ្ជួនតាមវិធានការណែនាំ ដើម្បីទប់ស្កាត់ការឆ្លងរាលដាលជំងឺកូវីតដ-១៩ និងធានាបាននូវសុវត្ថិភាពទាំងអស់គ្នា៕

អត្ថបទ និងរូបភាពដោយ កណ្តាប់ដៃដែក