ភ្នំពេញ៖ ការឃាត់ខ្លួនបុគ្គលិក និងភ្ញៀវនេះ ក្នុងគោលបំណងយកសំណាកធ្វើតេស្តរកជំងឺកូវីដ១៩ ព្រោះបទល្មើសនិងវិធានការរដ្ឋបាល ។ ដូច្នេះហើយហាងឬស្សីផ្អែមត្រូវបានអាជ្ញាធរខណ្ឌពោធិ៍សែនជ័យ បើកប្រតិបត្តិការចុះឃាត់បុគ្គលិក និងភ្ញៀវជាង១០០នាក់ យកសំណាកធ្វើតេស្តរកជំងឺកូវីដ ១៩ ខណ:ល្មើសវិធានការរដ្ឋបាលរាជធានីភ្នំពេញ និងវិធានក្រសួងសុខាភិបាល ដើម្បីទប់ស្កាត់ការឆ្លងជំងឺកូវីដ១៩ ។
ប្រតិបត្តិការនេះបានធ្វើឡើង នារសៀលថ្ងៃទី ២៣ ខែសីហា ឆ្នាំ២០២១ ដោយឃាត់ខ្លួនមនុស្សប្រុសស្រីជាច្រើននាក់ ដែលបានប្រមូលផ្តុំគ្នាមកផឹកស៊ី ដោយមិនបានគោរពទៅនឹងវិធានការរបស់រដ្ឋបាលរាជធានីភ្នំពេញ វិធានសុខាភិបាល និងមិនខ្លាចអំពីការឆ្លងជំងឺកូវីដ-១៩។បច្ចុប្បន្នអាជ្ញាធរនិងសមត្ថកិច្ចកំពុងឲ្យមន្ត្រីសុខាភិបាលចុះយកសំណាករកមេរោគកូវីដ។
សូមបញ្ជាក់ផងដែរថា ដោយយោងតាមសេចក្ដីជូនដំណឹងរបស់ក្រសួងសុខាភិបាល គិតត្រឹមព្រឹក ថ្ងៃទី២៣ ខែសីហា ឆ្នាំ២០២១អ្នកឆ្លងសរុបមានចំនួន៨៩,៦៤១ នាក់ អ្នកជាសះស្បើយ៨៥,៦១៨នាក់អ្នកស្លាប់១,៨០៨នាក់។
ក្រសួងសុខាភិបាលក៏បានបញ្ជាក់ផងដែរថា កំណេីនអត្រាចាក់វ៉ាក់សាំងកូវីដ-១៩ នៅកម្ពុជា គិតត្រឹមថ្ងៃទី២២ ខែសីហា ឆ្នាំ២០២១ មាន ៨៧,២៦% ធៀបជាមួយចំនួនប្រជាជនគោលដៅ ១០លាននាក់ និងលើកុមារ-យុវវ័យអាយុពី ១២ឆ្នាំ ទៅក្រោម ១៨ឆ្នាំ មាន ៥០,៣៩% ធៀបជាមួយនឹងប្រជាជនគោលដៅ ១,៩៦៦,៩៣១ នាក់៕
អត្ថបទ និងរូបភាពដោយ កណ្តាប់ដៃដែក