ភ្នំពេញ ៖ ក្រសួងកិច្ចការនារី ធ្វើតេស្តរកមេរោគកូវីដ១៩ ជូនថ្នាក់ដឹកនាំ និងមន្ត្រីរាជការ ប្រមាណ៣០០នាក់ នៅថ្ងៃទី២៣ ខែសីហា ឆ្នាំ២០២១នេះ។ ការធ្វើតេស្តរហ័សនេះ គឺធ្វើជូនដល់ថ្នាក់ដឹកនាំ និងមន្រ្តីរាជការរបស់ក្រសួង ប្រមាណ៣០០នាក់ នៅទីស្តីការក្រសួងផ្ទាល់។ 

យោងតាមមន្រ្តីរបស់ក្រសួងកិច្ចការនារី បានបញ្ជាក់ដល់ក្រុមការងារ Beetube News ថា÷ នេះគឺជាលើកទីពីរហើយ ដែលក្រសួងបានរៀបចំធ្វើតេស្តរហ័ស ជូនដល់ថ្នាក់ដឹកនាំ និងមន្ត្រីរបស់ខ្លួន។ ព្រឹត្តិការណ៍នេះ រៀបចំដោយនាយកដ្ឋានរដ្ឋបាលបុគ្គលិក សហការជាមួយនាយកដ្ឋានស្រ្តី និងសុខភាព ដឹកនាំដោយ លោក ម៉ី ហ៊ុល អនុរដ្ឋលេខាធិការ និងជាប្រធានគណៈកម្មាធិការប្រយុទ្ធប្រឆាំង និងទប់ស្កាត់វីរុសកូវីដ-១៩ របស់ក្រសួងកិច្ចការនារី។

នៅអំឡុងពេលធ្វើតេស្ត មន្រ្តីគ្រប់រូប បានគោរពតាមគោលការណ៍ ៣កុំ (កុំជួបជុំគ្នា កុំចូលកន្លែងបិទជិត កុំនៅជិតគា្ន ឬចាប់ដៃគ្នា) ៣ការពារ (ពាក់ម៉ាស់ អនាម័យនឹងអាកុល រក្សាគម្លាត) បានយ៉ាងខ្ជាប់ខ្ជូន៕
អត្ថបទ និង រូបភាពដោយ កណ្តាប់ដៃដែក