ខេត្តត្បូងឃ្មុំ៖ បន្ទាប់ពីក្រុមហ៊ុនបរទេសចំនួនពីរបានចាកចេញពីទីតាំងរ៉ែងរ៉ែមាសនោះ ប្រជាពលរដ្ឋមួយចំនួននៅឃុំជាំតាម៉ៅ ស្រុកមេមត់ ខេត្តត្បូងឃ្មុំ បាននាំគ្នាទៅរុករករ៉ែមាស ក្នុងតំបន់សំពៅលូន ដើម្បីរកប្រាក់ចំណូលទ្រទ្រង់ជីវភាពគ្រួសារ ខណៈដែលជំងឺកូវីដ-១៩មិនទាន់ទៅណាឆ្ងាយពួកគាត់។
ប្រជាពលរដ្ឋរស់នៅឃុំជាំតាម៉ៅ បានរៀបរាប់ប្រាប់ក្រុមការងារ BeeTube News អោយដឹងថា កន្លងមកមានក្រុមហ៊ុនបរទេសចំនួន ២មកហើយ ដែលបានមកទៅជីករុករករ៉ែមាសនៅទីតាំងខាងលើគឺទី១ក្រុមហ៊ុនចិន និងទី២ជាក្រុមហ៊ុនកូរ៉េ តែមិនដឹងថាបាន ឬមិនបាននោះទេ តែក្រោយក្រុមហ៊ុនទាំង២បានចប់អាណត្តិកក៏ចាកចេញទៅ។ ក្រោយមកក៏មានប្រជាពលរដ្ឋដែលរស់នៅតំបន់នោះ ក៏ចូលទៅរុករករ៉ែមាសនៅទីតាំងនោះជាលក្ខណៈគ្រួសារ។ តែ ការជីកយកសំណល់ចាស់ៗពីក្រុមហ៊ុនទាំង២បានបន្សល់ទុកនោះ អ្នកខ្លះបាន ខ្លះទៀតក៏មិនបាន និងពេលខ្លះក៏ខាតដើមខាតចុងទៀតផង ដោយសារតែការទិញឧបករណ៍យកទៅជីករ៉ែទាំងនោះ។
ពាក់ព័ន្ធនិងទីតាំងរ៉ែមាសនេះ លោកអភិបាលស្រុកមេមត់ បានប្រាប់ក្រុមការងារ BeeTube News អោយដឹងថា ពិតជាមានប្រជាពលរដ្ឋចូលទៅរុករករ៉ែមាសក្នុងតំបន់សំពៅលូន ដែលស្ថិតនៅឃុំជាំតាម៉ៅប្រាកដមែន តែពួកគាត់រកជាលក្ខណៈគ្រួសារតែប៉ុណ្ណោះ។ តែសួរថា មានច្បាប់អនុញ្ញាត ឬយ៉ាងណានោះ? ទាល់តែទាក់ទងទៅមន្ទីររ៉ែ និងថាមពល ទើបដឹងច្បាស់។ បន្ទាប់មកក្រុមការងារ BeeTube News បានសាកសួរទៅ លោក ប៉ុន ប៊ុនធឿន ប្រធានមន្ទីររ៉ែ និងថាមពល ខេត្តត្បូងឃ្មុំ បានឱ្យដឹងថា៖ កន្លងមកលោក និងមន្ត្រីជំនាញក៏ធ្លាប់ចុះទៅពិនិត្យមើលជុំវិញការរុករករ៉ែមាសក្នុងតំបន់ខាងលើនេះដែរ តែពេលចុះទៅ ប្រជាពលរដ្ឋបានរើចេញអស់ហើយ តែពេលក្រុមការងាររបស់លោកត្រឡប់មកវិញ ពួកគាត់ក៏ចូលទៅជីកបន្ត។ សកម្មភាពរបស់ប្រជាពលរដ្ឋខាងលើនេះគឺ មិនមានច្បាប់អនុញ្ញាតនោះទេ កន្លងមកពួកគាត់បានបង្កើតជាសហគមន៍ ហើយបានស្នើមកមន្ទីរ និងក្រសួងដែរ តែមកដល់ពេលនេះក្រសួងមិនទាន់មានការអនុញ្ញាតនៅឡើយ។
ក្រុមការងារ BeeTube News បានសាកសួរទៅពលរដ្ឋនៅតំបន់នោះបានអោយដឹងថាដោយសារតែបញ្ហារាតត្បាតជំងឺកូវីដ-១៩ នៅមិនទាំន់ធូរស្រាលហើយពួកគាត់ មិនចង់ធ្វើ ការចំណាកស្រុក ពួកគាត់ក៏បានបង្កើតជាសហគមន៍ ស្នើទៅអាជ្ញារសុំចូលទៅរ៉ែងរកមាសក្នុងតំបន់ខាងលើជាលក្ខណៈគ្រួសារ ពោលគឺ គាស់កាយ ដីដែលក្រុមហ៊ុនធ្វើកន្លងមកយកមករ៉ែងតែប៉ុណ្ណោះ មិនប៉ះពាល់ដល់ធនធានជាតិនោះទេ គ្រាន់តែទៅរ៉ែងអាចម៌ដី សំណល់ពីក្រុមហ៊ុនបរទេសដែលបានបន្សល់ទុកតែប៉ុណ្ណោះ។
ប្រជាពលរដ្ឋបានបញ្ជាក់ទៀតថា ជុំវិញសកម្មភាពខាងលើរបស់ពួកគាត់ដែលចូលទៅរ៉ែងរ៉ែមាសក្នុងតំបន់សំពៅលូន ឃុំជាំតាម៉ៅ ស្រុកមេមត់ ខេត្តត្បូងឃ្មុំ ក៏បានសំណូមពរដល់អាជ្ញាធរពាក់ព័ន្ធមេត្តាយោគយល់ដល់ពួកគាត់ផង ពីព្រោះពួកគាត់ធ្វើគឺដើម្បី បានប្រាក់ចំណូលខ្លះសម្រាប់ដោះស្រាយជីភាពគ្រួសារ៕
អត្ថបទ និង រូបភាពដោយ កណ្តាប់ដៃដែក