ជម្លោះដែលកំពុងបន្តនៅអ៊ុយក្រែនបានធ្វើអោយទាំងរុស្ស៊ី និងអ៊ុយក្រែននៅតែបន្តប្រើប្រាស់បច្ចេកវិទ្យាយោធារបស់ពួកគេដើម្បីរក្សាទីតាំងជំហររៀងខ្លួន។ ខណៈពេលដែលអ៊ុយក្រែនទទួលបានជំនួយយោធាពីសម្ព័ន្ធមិត្តរបស់ខ្លួន រុស្ស៊ីបើទោះបីជាប្រឈមមុខនឹងលោកខាងលិចយ៉ាងខ្លាំងក៏ដោយលើការដាក់ទណ្ឌកម្មវិស័យយោធា-ឧស្សាហកម្មរបស់ខ្លួន ក៏នៅតែអាចបន្តគ្រប់គ្រងការផលិតអាវុធរបស់ខ្លួនយ៉ាងមានប្រសិទ្ធភាព។ នៅឆ្នាំ ២០២៣ យោធារុស្ស៊ីបានជួបប្រទះការបង្កើនឃ្លាំងអាវុធរបស់ខ្លួនយ៉ាងខ្លាំងដោយទទួលបានរថក្រោះជាង 1,500 គ្រឿង មីស៊ីល និងយានកាំភ្លើងធំជាង1,400គ្រឿង និងដ្រូនច្រើនជាង 22,00 គ្រឿងថែមទៀត។
តើរុស្សីគ្រប់គ្រងដោយរបៀបណាដើម្បីទ្រទ្រង់កម្រិតផលិតកម្មយោធាទាំងនេះបើទោះបីជាមានការប្រឈមនឹងទណ្ឌកម្មលោកខាងលិចយ៉ាងខ្លាំង? ដូចដែលដឹងរួចមកហើយ ក្រោមការដឹកនាំរបស់សហរដ្ឋអាមេរិក និងសម្ព័ន្ធមិត្តរបស់ខ្លួន លោកខាងលិចបានដាក់ទណ្ឌកម្មសេដ្ឋកិច្ចលើវិស័យឧស្សាហកម្មយោធាស្មុគស្មាញរបស់រុស្ស៊ី ឬហៅថា MIC ជាការឆ្លើយតបទៅនឹងការជ្រៀតជ្រែកយោធារបស់ខ្លួននៅអ៊ុយក្រែនកាលពីខែកុម្ភៈ ឆ្នាំ2022។ ផលប៉ះពាល់
លើ MIC របស់រុស្ស៊ីនេះត្រូវបានបង្ហាញឡើងថាជាបញ្ហាប្រឈមក្នុងការជំនួសសម្ភារៈដែលខ្វះខាត រឺកង្វះខាតនៅក្នុងធាតុអេឡិចត្រូនិចកម្រិតខ្ពស់ដែលត្រូវបានប្រើប្រាស់សម្រាប់ផលិតអាវុធទាំងនេះ។
ដោយកត្តានេះបានធ្វើអោយផលិតកម្មនៃប្រព័ន្ធអាវុធជាក់លាក់របស់រុស្ស៊ីណាមួយអន់ថយល្បឿន។ ភាពខ្វះខាតនៃសម្ភារៈកម្រិតខ្ពស់របស់បរទេសបានបង្ខំអោយទីក្រុងម៉ូស្គូងាកទៅរកជម្រើសសម្ភារៈអន់ថយជាងនេះ ដែលបណ្តាលអោយប៉ះពាល់យ៉ាងធ្ងន់ធ្ងរដល់គុណភាពអាវុធរបស់រុស្ស៊ី និងបច្ចេកវិទ្យា។ ប៉ុន្តែរុស្ស៊ីមិនប្លែកទេចំពោះការដាក់ទណ្ឌកម្មសេដ្ឋកិច្ចពីលោកខាងលិចបែបនេះ ដោយក៏ធ្លាប់ប្រឈមនឹងវិធានការបែបនេះពីមុនមកដែរ។ នោះគឺទណ្ឌកម្មក្នុងឆ្នាំ ២០១៤ ដែលត្រូវបានអនុវត្តឡើងដើម្បីឆ្លើយតបទៅនឹងការបញ្ចូលតំបន់គ្រីមៀរបស់រុស្ស៊ី។ ខណៈនៅក្នុងបរិបទនៃការដាក់ទណ្ឌកម្មសេដ្ឋកិច្ចរុស្ស៊ីបន្ទាប់ពីឆ្នាំ២០២២នេះវិញ រុស្ស៊ីបានស្វែងរកមធ្យោបាយជំនះការខ្វះខាតនេះដោយរំពឹងលើប្រទេសដែលមិនបានចូលរួមនៅក្នុងទណ្ឌកម្ម។
ក្នុងនោះមានដូចជា ចិន កាហ្សាក់ស្ថាន និងតួកគី។ រុស្ស៊ីក៏មានយុទ្ធសាស្រ្តបញ្ជូនបន្តការនាំចូលសំខាន់ៗតាមរយៈប្រទេសទីបីដូចជាអ៊ីរ៉ង់ អាស៊ីកណ្តាល និងប្រទេសនៃឧបទ្វីបបាល់កង់ផងដែរ។ លើសពីនេះទៅទៀតដោយការរៀបចំក្លែងព័ត៌មាន និងប្រើប្រាស់អង្គភាពស៊ីវិលដើម្បីបង្វែរសម្ភារៈ និងអាវុធទៅអង្គភាពយោធា ទើបរុស្ស៊ីអាចមានសមត្ថភាពទ្រទ្រង់ការផលិតយោធារបស់ខ្លួន។ គួរឱ្យកត់សម្គាល់ថា និរន្តរភាពនៃផលិតកម្មយោធារបស់រុស្ស៊ី មិនមែនពឹងផ្អែកទាំងស្រុងលើការគាំទ្រពីសម្ព័ន្ធមិត្ត ឬការកេងប្រវ័ញ្ចលើដែនកំណត់នៃការគ្រប់គ្រងទណ្ឌកម្មរបស់បណ្តាប្រទេសលោកខាងលិចនោះទេ។ ផ្ទុយទៅវិញ ការឆ្លើយតបដោយភាពបត់បែនរបស់រុស្សីទៅលើស្ថានភាពនេះ ទើបង្ហាញថា រុស្ស៊ីអាចសំរបខ្លួនបានយ៉ាងឆាប់រហ័ស ដែលអាចកែសំរួលខ្សែសង្វាក់ផ្គត់ផ្គង់នៃសព្វាវុធ និងកំណត់បានប្រភពសម្រាប់ប្រើប្រាស់ជំនួសសមាសធាតុសំខាន់ៗដូចជា ប្រព័ន្ធអុបទិក គ្រឿងម៉ាស៊ីន និងមីក្រូឈីបជាដើម។
