អេហ្ស៊ីបគំរាមកេណ្ឌមនុស្សរាប់លាននាក់ដើម្បីការពារឧបទ្វីបស៊ីណៃ។ នៅច្រកឆ្លងកាត់ព្រំដែន Rafah អេហ្ស៊ីបបានទទួលជោគជ័យក្នុងកានាំចូលរថយន្តចំនួន 100 គ្រឿងជារៀងរាល់ថ្ងៃទៅកាន់តំបន់ Gaza Strip ដើម្បីលើកការឡោមព័ទ្ធរបស់អ៊ីស្រាអែល។

1. អ៊ីស្រាអែលយល់ព្រមឱ្យរថយន្តជំនួយដល់ទៅ 100 គ្រឿងចូលហ្គាហ្សារាល់ថ្ងៃ

យោងតាមសារព័ត៌មាន The Times Of Israel ចុះផ្សាយថ្ងៃទី៣១ ខែតុលាបានអោយដឹងថា អ៊ីស្រាអែលបានយល់ព្រមអនុញ្ញាតឱ្យរថយន្តដឹកទំនិញចំនួន 100 គ្រឿងនៃជំនួយមនុស្សធម៌ចូលទៅកាន់តំបន់ហ្គាហ្សាជារៀងរាល់ថ្ងៃបន្ទាប់ពីមានការចូលរួមការទូតយ៉ាងខ្លាំងក្លាដោយរដ្ឋបាលលោក Biden នេះបើតាមមន្ត្រីអាមេរិកម្នាក់បានប្រាប់កាសែត The Times of Israel កាលពីថ្ងៃចន្ទ។

កិច្ចព្រមព្រៀងនេះបានកើតឡើងនៅប៉ុន្មានម៉ោងបន្ទាប់ពីទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន (UNRWA) បានព្រមានថាចំនួនមានកំណត់នៃរថយន្តជំនួយដែលចូលទៅតំបន់ហ្គាហ្សាគឺមិនគ្រប់គ្រាន់ដើម្បីបំពេញ"តម្រូវការមនុស្សធម៌"នៅក្នុងទឹកដីនេះទេ។

មានតែឡានដឹកទំនិញចំនួន171គ្រឿងប៉ុណ្ណោះដែលបានចូលទៅក្នុងតំបន់ហ្គាហ្សាចាប់តាំងពីអេហ្ស៊ីបបានចាប់ផ្តើមបើកច្រកព្រំដែន Rafah របស់ខ្លួនកាលពី 10 ថ្ងៃមុននេះបើយោងតាមទំនាក់ទំនងយោធារបស់អ៊ីស្រាអែលជាមួយអង្គភាព COGAT របស់អ៊ីស្រាអែល។

2. អេហ្ស៊ីបគំរាមកេណ្ឌមនុស្សរាប់លាននាក់ដើម្បីការពារឧបទ្វីបស៊ីណៃ

យោងតាមសារព័ត៌មាន The Wall Street Journal ចុះផ្សាយថ្ងៃទី០១ ខែវិច្ឆិកាបានអោយដឹងថា នៅខណៈពេលមានការកើនឡើងសម្ពាធមកលើអេហ្ស៊ីបដើម្បីទទួលយកជនភៀសខ្លួនប៉ាឡេស្ទីន នាយករដ្ឋមន្ត្រីនៃប្រទេសអេហ្ស៊ីប លោក Mostafa Madbouly បាននិយាយថា ខ្លួននៅតែប្តេជ្ញាការពារទឹកដី និងអធិបតេយ្យភាពរបស់ខ្លួនដោយវិធីគ្រប់យ៉ាងទាំងអស់។

លោកនាយករដ្ឋមន្ត្រីបាននិយាយថា អេហ្ស៊ីបនឹងមិនអនុញ្ញាតឱ្យមានស្ថានភាពដាក់កំហិតណាមួយ ឬការដោះស្រាយបញ្ហាក្នុងតំបន់ដោយការចំណាយបាត់បង់របស់ខ្លួនឯងឡើយ។ មន្ត្រីជាន់ខ្ពស់នៅក្នុងប្រទេសអេហ្ស៊ីបបាននិយាយថា ទោះបីជាយ៉ាងណាក៏ដោយ ប្រទេសនេះនឹងចាប់ផ្តើមទទួលយកជនជាតិប៉ាឡេស្ទីនដែលរងរបួសយ៉ាងធ្ងន់ធ្ងរពីហ្គាហ្សានៅថ្ងៃពុធ ដើម្បីទទួលការព្យាបាលនៅមន្ទីរពេទ្យនៅភាគខាងជើងនៃឧបទ្វីបស៊ីណៃ។

3. តើនឹងមានចំនុចផ្លាស់ប្តូរនៅក្នុងឧបសគ្គនៃការប្រឆាំងរបស់មីយ៉ាន់ម៉ា?

យោងតាមសារព័ត៌មាន The Diplomat ចុះផ្សាយថ្ងៃទី៣០ ខែតុលាបានអោយដឹងថា​​​ អស់រយៈពេលពីរឆ្នាំកន្លងមកនេះ ព្រឹត្តិការណ៍សកលសំខាន់ៗជាច្រើន រួមមានការដណ្តើមមកវិញនូវប្រទេសអាហ្វហ្គានីស្ថានរបស់តាលីបង់ សង្គ្រាមរុស្ស៊ី-អ៊ុយក្រែន និងជម្លោះអ៊ីស្រាអែល និងក្រុមហាម៉ាស់ ទាំងនេះបានបង្វែរការចាប់អារម្មណ៍របស់អន្តរជាតិពីភាពចលាចលរបស់មីយ៉ាន់ម៉ា និងការតស៊ូរបស់ប្រជាជនមីយ៉ាន់ម៉ាដើម្បីលទ្ធិប្រជាធិបតេយ្យ។ ទោះបីជាមិនមានការយកចិត្តទុកដាក់យ៉ាងណាក៏ដោយ កិច្ចខិតខំប្រឹងប្រែងស្វ័យការពាររបស់ប្រជាជនមីយ៉ាន់ម៉ាបានគូសបញ្ជាក់ពីភាពអសមត្ថភាពទាំងស្រុងរបស់យោធាក្នុងការបង្រួបបង្រួមរដ្ឋប្រហារដែលខ្លួនបានចាប់ផ្តើមនៅក្នុងខែកុម្ភៈ ឆ្នាំ 2021។

នៅខែកុម្ភៈ ឆ្នាំ2023 រដ្ឋបាលយោធាបានទទួលស្គាល់ថា ខ្លួនខ្វះសិទ្ធិអំណាចលើយ៉ាងហោចណាស់132នៃសង្កាត់ចំនួន330របស់ប្រទេស ដែលបណ្តាលឱ្យមានការដាក់ច្បាប់អាជ្ញាសឹកយ៉ាងហោចណាស់ 44 សង្កាត់នៅទូទាំង 9 រដ្ឋ និងតំបន់។ ប្រការនេះបាននាំឱ្យអ្នកវិភាគនយោបាយដែលមានមូលដ្ឋាននៅសហរដ្ឋអាមេរិកម្នាក់បានអោយយោបល់ថាយោធាមីយ៉ាន់ម៉ាទំនងជាមិនអាចទទួលបានជ័យជំនះនៅក្នុងជម្លោះដែលកំពុងបន្តនេះទេ។ ប៉ុន្តែទោះជាយ៉ាងណាក៏ដោយ បក្សប្រឆាំងនឹងត្រូវតែទាមទារការគាំទ្រពីអន្តរជាតិដើម្បីផ្តួលរំលំរបបយោធាអោយបានសម្រេច។