មួយរយៈចុងក្រោយនេះក្រុមហ៊ុនផលិតចម្រៀង La Cima Cartel ប្រចាំប្រទេសកម្ពុជាបានបញ្ចេញចម្រៀងជាច្រើនបទបន្តបន្ទាប់គ្នាសំរាប់សិល្បករដ៏ពេញនិយមរបស់ពួកគេ ដោយមានដូចជាបទ 5Gរបស់លោក Meezy24k បទAwesome របស់លោក YCN Tomie និងបទចុងក្រោយនេះគឺ 007 របស់លោក YCN Rakhie តែម្តងបន្ទាប់ពីការចេញបទចម្រៀងរួមគ្នារបស់ពួកគេនូវបទ«ស្ទាវ៦សាស្រ្ត» ដែលបានចេញផ្សាយកាលពី២ខែកន្លងទៅ។ សំរាប់បទចម្រៀងដែលបានចេញផ្សាយថ្មីៗនេះ គឺបទ«០០៧» ត្រូវបានចេញផ្សាយនៅក្នុងថ្ងៃទី០៩ ខែកញ្ញា និងមានការចូលរូមសម្តែងពិសេសពីសិល្បករកំប្លែកជើងចាស់មួយរូបគឺលោកពូក្រឹមផងដែរ។

ដោយយើងមើលឃើញថាតាំងពីបើកក្បាលបទចំរៀងភ្លាមពិតជាមានភាពទាក់ទាញមែនទែន​​​ ដោយលោកពូក្រឹមបានចូលរួមបង្ហើរសំនៀងច្រៀងផងដែរ នូវប្រយោគថា «តាំងព្រះនាមខ្លួនឯងនៀក James bond»​​​​​​ ជាមួយនឹងពាក្យពេចន៍ច្រៀង និងសកម្មភាពឆ្លងឆ្លើយគ្នារវាងលោក និងលោកYCN Rakhie ដែលធ្វើអោយមួយបទនេះកាន់តែស៊ីចង្វាក់គ្នា និងមានភាពឡូយអស់ទាស់មែនទែន។ នៅក្នុងមួយបទនេះលោក YCN Rakhie បានច្រៀងរ៉េបរៀបរាប់ពីច្រើនពីដណើរជីវិតពីមុនដែលចង់ឡូយ ចង់Gangដូចគេ មិនខុសពីចង់ប្រាថ្នាខ្លួនឯងជាតួអង្គ James bond មួយរូបនៅក្នុងស៊េរីរឿង 007។ ​​​ប៉ុន្តែលោក YCN Rakhie ចង់ប្រាប់ថាទោះជាយ៉ាងនេះក្តីក៏មិនអាចព្រមអោយនរណាទាញរូបលោកដើរថយក្រោយ រឺមិនអោយដើរទៅមុខបានទេ លោកនឹងបន្តដើរទៅមុខទៀតជាមួយនឹងការយល់ពីតំលៃខ្លួនឯង និងអ្វីដែលខ្លួនឯងអាចធ្វើបាន អ្នកផ្សេងទៀតមិនអាចធ្វើបាន។ 

យ៉ាងណាមិញផងដែរមហាជនជាច្រើនក៏ចាប់អារម្មណ៍ការបង្ហាញខ្លួនរបស់កំពូលតារាកំប្លែកលោកពូក្រឹមមែនទែន ដោយមួយបទនេះពួកគេទាំងពីរសហការគ្នាបានយ៉ាងល្អឥតខ្ចោះ និងបានកោតសរសើរស្នាដៃផលិតរបស់ក្រុមហ៊ុនចម្រៀង La Cima Cartel ខ្លាំងមែនទែន ព្រោះទាំងបទចម្រៀងសុទ្ធតែមានគុណភាព រីឯសិល្បករម្នាក់ៗផងដែរសុទ្ធតែខ្លាំងពូកែនិងមានទេពកោសល្យរៀងៗខ្លួនទាំងអស់។ ចំនែកឯនៅលើហ្វេសប៊ុកផេកផ្លូវការរបស់ក្រុមហ៊ុន La Cima Cartel វិញនោះក៏ទើបតែបង្ហោះវីឌីអូខ្លីមួយរបស់លោក YCN Rakhie និងលោកពូក្រឹមរាំច្រៀងលេងតាមចម្រៀងមួយនោះរបស់ពួកគេយ៉ាងសប្បាយរីករាយ។