កាលពីថ្ងៃអាទិត្យ ទី១២ ខែវិច្ឆិកានេះ មហោស្រពតន្រ្តីដ៏ធំប្រចាំឆ្នាំ Sting Musicverse Festival បានធ្វើការ Live បន្តផ្ទាល់ពីទីធ្លា OCIC យ៉ាងគគ្រឹកគគ្រេងនៅលើបណ្តាញសង្គមហ្វេសប៊ុកពីទំព័រហ្វេសប៊ុកផ្លូវការរបស់តារាកិត្តិយសអញ្ជើញចូលរួមជាច្រើននាក់ ដែលក្នុងនោះមានដូចជាលោកថេណា លោកជីដេវីត និងកញ្ញាវីឌីណែតជាដើម។
នៅក្នុងកម្មវិធីការប្រគំតន្រ្តី Sting Musicverse Festival នេះត្រូវបានបើកកម្មវិធីសម្តែងឡើងដោយលោក Zento និងតាមពីក្រោយដោយលោក Redking លោក Jah Deth លោក Griezii លោក Step កញ្ញាវីឌីណែត លោក Suly Pheng លោកថេណា និងតារាកិត្តិយសជាច្រើននាក់ទៀត ដែលបញ្ចប់ចុងក្រោយដោយលោកជីដេវីតនេះផ្ទាល់។
ជាពិសេសក៏មានតារាកិត្តិយសក្រៅប្រទេសផងដែរ ដូចជា DJ Soda និងលោក UrBoyTJ ដែលមកពីផលិតកម្ម Kamikaze។ បន្ទាប់ពីបញ្ចប់ការសម្តែងរបស់លោកជីដេវីត លោកបានធ្វើការបង្ហោះនូវសារមួយឡើងថា«ខ្ញុំសុំទោស» ដែលបានធ្វើអោយបណ្តាអ្នកគាំទ្ររំជើបរំជួលចិត្តជាខ្លាំងដោយរំលឹកទៅដល់ពេលសម្តែងរបស់លោកនៅលើឆាក។
ថ្វីបើលោកជីដេវីតមានបញ្ហាសុខភាព លោកនៅតែខិតខំសម្តែងរហូតដល់ទីបញ្ចប់ ដែលមានរហូតទៅដល់២១បទឯណោះ ហើយនៅចុងបញ្ចប់នៃការច្រៀងរបស់លោកថែមទៀតនោះ លោកជីដេវីតរំជើបរំជួលចិត្តរហូតដល់ស្រក់ទឹកភ្នែក។ ដូចនេះហើយការបង្ហោះសាររបស់លោកជីដេវីតហាក់ដូចជាការសុំទោសដែលលោកយល់ថាខ្លួនលោកធ្វើមិនបានល្អ ប៉ុន្តែទោះជាយ៉ាងណាអ្នកគាំទ្ររបស់លោកនៅតែចូលរួមផ្តល់កំលាំងចិត្ត និងសម្តែងការគាំទ្រថាលោកធ្វើបានល្អហើយ។ តើទស្សនិកជនយល់ឃើញយ៉ាងណាដែរចំពោះមហោស្រពតន្រ្តី Sting Musicverse Festival កាលពីម្សិលមិញនេះ?