គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី០៦ ខែមិថុនា ឆ្នាំ២០២៣នេះ បានប្រកាសថា នឹងចាត់ចិធានការចំពោះក្រុមជនដែលធ្វើសកម្មភាពឃោសនាឱ្យប្រជាពលរដ្ឋគូសបំផ្លាញសន្លឹកឆ្នោតចោល ឬមិនឱ្យទៅបោះឆ្នោតជាដើម និងបានអំពាវនាវឱ្យក្រុមជនទាំងនោះ បញ្ឈប់ជាបន្ទាន់នូវសកម្មភាពដែលផ្ទុយពីច្បាប់។
ការប្រកាសនេះ បានធ្វើឡើងបន្ទាប់ពីគណៈកម្មាធិការជាតិរៀបចំការបោះឆ្នោតទទួលបានព័ត៌មានថា ប៉ុន្មានថ្ងៃនេះ មានបុគ្គលមួយចំនួនបានធ្វើយុទ្ធនាការតាមរយៈខិត្តបណ្ណ និងរូបភាពផ្សេងៗតាមបណ្តាញព័ត៌មានសង្គម ដោយអំពាវនាវឱ្យប្រជាពលរដ្ឋគូសសន្លឹកឆ្នោតចោល និងកុំទៅបោះឆ្នោតជាដើម ដោយសាតែគណបក្សភ្លើងទៀន មិនបានចូលរួមបោះឆ្នោត។
គណៈកម្មាធិការជាតិរៀបចំការបោះឆ្នោតពន្យល់ថា ការដែល គ.ជ.ប បដិសេធការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះរបស់គណបក្សភ្លើងទៀន ក៏ដូចជាគណបក្សមហាសាមគ្គីជាតិខ្មែរ គឺជាការអនុវត្តច្បាប់។ គ.ជ.ប គឺជាស្ថាប័នបច្ចេកទេស និងអនុវត្តច្បាប់ ដោយ គ.ជ.ប បានអនុវត្តដោយស្មើភាព និងគ្មានការរើសអើងចំពោះគ្រប់គណបក្សនយោបាយណានោះទេ។
គ.ជ.ប បញ្ជាក់ថា យុទ្ធនាការខាងលើនេះ គឺជាការរំលោភបំពានលើមាត្រា១៤២ នៃច្បាប់ស្ដីពីការបោះឆ្នោតជ្រើសតាំងតំណាងរាស្ត្រ ដែលចែងថា ត្រូវផាកពិន័យជាប្រាក់ពី៥.០០០.០០០ (ប្រាំលាន) រៀលទៅ២០.០០០.០០០ (ម្ភៃលាន) រៀល ដោយពុំទាន់គិត ដល់ទោសព្រហ្មទណ្ឌផ្សេងទៀត ចំពោះជនណាដែលតាមគ្រប់មធ្យោបាយទុច្ចរិត៖ រារាំងប្រជាពលរដ្ឋដែលមានសិទ្ធិបោះឆ្នោតមិនឱ្យទៅបោះឆ្នោត, ធ្វើឱ្យមានការភាន់ច្រឡំនាំឱ្យបាត់ទំនុកចិត្តលើការបោះឆ្នោត, បង្កការរំខានមិនឱ្យដំណើរការបោះឆ្នោតបាន។
ជាងនេះទៀត យុទ្ធនាការខាងលើនេះ គឺជាសកម្មភាពដែលប្រាសចាកទៅនឹងព្រះរាជសារអំពាវនាវឱ្យទៅបោះឆ្នោតរបស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ចុះថ្ងៃទី៨ ខែកុម្ភៈ ឆ្នាំ២០២៣ ក្នុងខ្លឹមសារ “ខ្ញុំសូមជនរួមជាតិទាំងអស់ មេត្តាប្រើសិទ្ធិសេរីភាពបោះឆ្នោតទៅតាមសតិសម្បជញ្ញៈរបស់ខ្លួនម្នាក់ៗ ដែលមានទំនុកចិត្តទៅលើបេក្ខជនណាម្នាក់ គណបក្សនយោបាយណាមួយដោយសេរី”។
ដោយឡែក ចំណុចទី១ មាត្រា៤២ នៃច្បាប់ស្តីពីការរៀបចំ និងការប្រព្រឹត្តទៅនៃ គ.ជ.ប បានបញ្ជាក់ថា គ.ជ.ប មានសិទ្ធិចាត់វិធានការគ្រប់រូបភាព ដើម្បីធានាឱ្យការបោះឆ្នោតប្រព្រឹត្តទៅដោយសេរី ត្រឹមត្រូវ យុត្តិធម៌ និងតាមវិធីជ្រើសរើសឆ្នោតដោយសម្ងាត់ “។
ទន្ទឹមនឹងនេះ គ.ជ.ប បានអំពាវនាវ ឲ្យដល់បុគ្គលទាំងឡាយដែលមានចេតនាទុច្ចរិត ត្រូវបញ្ឈប់ជាបន្ទាន់នូវសកម្មភាព ដែលផ្ទុយពីខ្លឹមសារនៃច្បាប់ ហើយ ប្រជាពលរដ្ឋកម្ពុជាគ្រប់រូបដែលមានឈ្មោះក្នុងបញ្ជីបោះឆ្នោតផ្លូវការ ត្រូវអញ្ជើញទៅចូលរួមបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ ដើម្បីជ្រើសរើសថ្នាក់ដឹកនាំតាមការពេញចិត្តរបស់ខ្លួន៕