លោកម៉ម ពេជ្ជរិទ្ធ អតីតសមាជិកក្រុម Smallband ម្ចាស់បទ«មិនអាចឃាត់ទេ»បានបង្ហេាះវីឌីអូចំរៀងមួយនេះរបស់លោកឡើងវិញបន្ទាប់ពីបទចំរៀងមួយនេះទទួលបានការគាំទ្រយ៉ាងសន្ធឹកសន្ធាប់ពីមហាជនបន្ទាប់ពីបេក្ខជនមួយរូបនៃកម្មវិធីប្រលងចំរៀង Cambodian Idol លោកថុលសុភិទិ បានជ្រើសរើសបទនេះមកច្រៀង និងទទួលបានការគាំទ្រយ៉ាងខ្លាំង។លោកម៉ម ពេជ្ជរិទ្ធបានធ្វើការបកស្រាយបទចំរៀងនេះកាលពីថ្ងៃទី២១ កក្កដាកន្លងទៅនេះនៅលើបណ្តាញសង្គមហ្វេសប៊ុកផេកផ្លូវការរបស់លោកហើយទទួលបានចំនួនអ្នកចុចចូលមើលរហូតដល់ទៅ ១លានដង ជាមួយនឹងមតិគាំទ្រសរសើរលោកជាច្រើនថាច្រៀងបានពិរេាះផ្អែមសក្តិសមជាម្ចាស់បទចំរៀងមែន។ យ៉ាងណាមិញលោកពេជ្ជរិទ្ធក៏បានភ្ជាប់ជាមួយសារនៅខាងលើវីឌីអូថាលោកសូមអរគុណចំពេាះអ្នកទាំងអស់គ្នាដែលស្រលាញ់នូវបទមួយនេះ ហើយលោកក៏សូមអធ្យាស្រ័យផងដែរ ដែលមិនទាន់បានត្រៀមរៀបចំចេញចម្រៀងជាផ្លូវការ តែយ៉ាងណាលោកនឹងព្យាយាមផលិតវាអោយបានក្នុងពេលឆាប់ៗនេះ។

នេះជាដំណឹងល្អមួយដែលធ្វើអោយមហាជនជាច្រើនកំពុងទន្ទឹងរង់ចាំបទ«មិនអាចឃាត់ទេ»ចេញជាផ្លូវការ។ ទន្ទឹមនឹងគ្នានេះដែរ យើងឃើញថាលោកម៉មពេជ្ជរិទ្ធកំពុងមានសកម្មភាពជាច្រើននៅក្នុងវិថីសិល្បៈ ដូចជាការចូលរួមក្នុងរឿងភាគអប់រំ និងបទចំរៀងអប់រំក្នុងរឿង«គ្រួសារសុខសាន្ត» របស់ BBCMedia ក្រៅពីនេះដែរក៏មានការសហការជាមួយអង្គការ USAID ក្នុងយុទ្ធនាការថែរក្សាព្រៃឈើ ការសហការជាមួយ Pleng Smart និង ABA Mobile រួមទាំងការប្រគុំតន្រ្តីនៅតាមមជ្ឈដ្ឋាននានា។គួរអោយចាប់អារម្មណ៍ផងដែរដំណើររបស់លោកនៅលើវិថីសិល្បៈធ្វើអោយលោកបានបន្សល់នូវស្នាដៃបទចំរៀងជាច្រើន ហើយបទពេញនិយមរបស់លោកមួយចំនួនមានដូចជាបងនៅឆ្ងាយ ស្នូរទឹកភ្លៀងធ្លាក់ ចង់ក្បែរ ពុក និង Love Alone ជាដើម។

អត្ថបទដោយ វត្តី