ភ្នំពេញ៖ រាជរដ្ឋាភិបាលកម្ពុជា បានបន្តឧបត្ថម្ភសាច់ប្រាក់ជូនដល់គ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ-១៩ សម្រាប់ជុំទី៨ រយៈពេល៣ខែបន្ថែមទៀត ខណៈការបើកប្រាក់ នឹងធ្វើឡើងនៅក្នុងសប្តាហ៍ទី៤ នៃខែនីមួយ។ នេះបើយោងតាមសេចក្តីសម្រេចរបស់ក្រសួងសេដ្ឋកិច្ច និងហិរញ្ញវត្ថុ។
លោកឧបនាយករដ្ឋមន្រ្តី អូន ព័ន្ឋមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា ការអនុវត្តសម្រាប់ជុំទី៨ គឺមានរយៈពេល៣ខែ គិតចាប់ពីខែមករា ដល់ខែមិនា ឆ្នាំ២០២២។ លោកលើកឡើងថា រយៈពេលអនុវត្តបន្ត នឹងត្រូវកំណត់ដោយឡែក ផ្អែកតាមសភាពការណ៍វិវត្តន៍ជាក់ស្តែង។
សូមរម្លឹកថា នាពេលថ្មីៗកន្លងទៅនេះ សម្ដេចតេជោ ហ៊ុន សែន នាយករដ្ឋមន្រ្តីកម្ពុជា ធ្លាប់មានប្រសាសន៍លើកឡើងថា ការឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ-១៩ ធ្វើឡើងក្នុងគោលដៅជួយដល់ស្រទាប់ប្រជាពលរដ្ឋក្រីក្រ និង ងាយរងគ្រោះ ដែលរងផលប៉ះពាល់ធ្ងន់ធ្ងរ។
ការផ្តល់ជូននេះ នឹងត្រូវបញ្ឈប់ នៅពេលស្ថានភាពជំងឺកូវីដ-១៩ បានធូរស្បើយ ដោយបង្វែរ កម្មវិធីជំនួយសង្គមមួយនេះ ទៅវិនិយោគលើកិច្ចការចាំបាច់នានា ដើម្បីស្តារ និងជំរុញកំណើនសេដ្ឋកិច្ច និងលើកកម្ពស់ជីវភាពប្រជាជនរួមវិញ៕
អត្ថបទ៖លាង ឡា