ហាណូយ៖ ក្រុមហ៊ុនសាមសុងអេឡិចត្រូនិកនឹងចាប់ផ្តើមពង្រីកសមត្ថភាពផលិតឧបករណ៍ស្មាតហ្វូនដែលអាចបត់បាននៅឯរោងចក្ររបស់ខ្លួននៅខេត្តបាក់និញភាគខាងជើងប្រទេសវៀតណាមក្នុងឆមាសទី ២ឆ្នាំនេះ។ នេះបើតាមការចុះផ្សាយដោយ The Korea Economics Daily។
ក្រុមហ៊ុនផលិតអេក្រង់របស់សាមសុងនឹងបង្កើនសមត្ថភាពផលិតប្រចាំឆ្នាំរបស់ខ្លួនសម្រាប់ឧបករណ៍ដែលអាចបត់បានដល់ ៤៧ភាគរយពីចំនួន ១៧លាន នាពេលបច្ចុប្បន្នដល់ ២៥លាន។ គម្រោងនេះកំណត់ទិសដៅប្រតិបត្តិការពេញលេញនៅចុងឆ្នាំនេះឬដើមឆ្នាំក្រោយ។
អ្នកជំនាញនិយាយថានៅពេលដែល Samsung បញ្ចប់ការពង្រីកក្រុមហ៊ុននឹងអាចផលិតម៉ូដែល Z Fold ចំនួន ១០លានគ្រឿង និងម៉ូដែល Z Flip ចំនួន ១៥លានគ្រឿងក្នុងមួយឆ្នាំ។
ការសម្រេចចិត្តរបស់សាមសុងក្នុងការបង្កើនសមត្ថភាពត្រូវបានជំរុញជាចម្បងដោយតម្រូវការទីផ្សារកើនឡើង។ ម៉ូដែលដែលអាចបត់បានជំនាន់ទី៣ របស់ខ្លួនបានកត់ត្រាការបញ្ជាទិញទុកមុនចំនួន ៩២ម៉ឺនគ្រឿង នៅក្នុងប្រទេសកូរ៉េពោលគឺខ្ពស់ជាងស្មាតហ្វូន Galaxy S21 ចំនួន ១,៨ដង។ អត្រានៃការបញ្ជាទិញជាមុនសម្រាប់ទូរស័ព្ទដែលអាចបត់បានថ្មីនេះគឺខ្ពស់ជាងនៅក្នុងប្រទេសចិនដែលមានជាង ១លានគ្រឿង។
នៅប្រទេសវៀតណាមក្រុមហ៊ុនសាមសុងកំពុងដំណើរការរោងចក្រចំនួន៦និងកំពុងសាងសង់មជ្ឈមណ្ឌលស្រាវជ្រាវនិងអភិវឌ្ឍន៍។ រហូតមកដល់ពេលនេះក្រុមហ៊ុនបានវិនិយោគជាង ១៧,៧ពាន់លានដុល្លារ នៅក្នុងប្រទេសនេះនិងកំពុងជួលបុគ្គលិកចំនួន ១១ម៉ឺននាក់។
ក្រុមហ៊ុនបានបង្កើតតម្លៃនាំចេញប្រចាំឆ្នាំជាង ៥៦ពាន់លានដុល្លារកាលពីឆ្នាំមុន។ ចំណែកក្នុងរយៈពេល៧ខែដំបូងឆ្នាំ ២០២១នេះ ក្រុមហ៊ុនសាមសុងវៀតណាមនៅតែកើនឡើង ១០ភាគរយ បើប្រៀបធៀបនឹងរយៈពេលដូចគ្នាទៅនឹងឆ្នាំ២០២០ទោះបីមានកូវីដ១៩ ក៏ដោយ៕
អត្ថបទ ថូ សេរីវឌ្ឃន៍