លោក Jiang បានដឹកនាំនៅក្នុងប្រទេសចិនអស់រយៈពេលជាងមួយទសវត្សរ៍ និងធ្វើអោយសេដ្ឋកិច្ចចិននាពេលនោះមានសន្ទុះយ៉ាងខ្លាំងក្លា…
លោក Jiang Zemin គឺជាមេដឹកនាំកម្មុយនីស្តមួយរូបមានដើមកំណើតមកពីទីក្រុងសៀងហៃ ហើយលោកត្រូវបានជ្រើសរើសធ្វើជាមេដឹកនាំប្រទេសចិនបន្ទាប់ពីមានការធ្វើបាតុកម្មតវ៉ានៅក្នុងប្រទេសនៅឆ្នាំ១៩៨៩បង្ហាញពីការព្រួយបារម្ភរបស់ប្រជាជនចិននៅពេលអតីតមេដឹកនាំបក្សកម្មុយនីស្តមួយរូបគឺលោក Hu Yaobangបានទទួលមរណភាពខណៈពេលដែលសេដ្ឋកិច្ចនិងសង្គមចិននាពេលនោះមានការរីកលូតលាស់យ៉ាងគួរអោយកត់សម្គាល់។ លោក Jiang Zemin បន្តកាន់កាប់អស់រយៈពេលមួយទសវត្សរ៍ធ្វើអោយសេដ្ឋកិច្ចប្រទេសចិនរីកលូតលាស់ឈានទៅមុខយ៉ាងឆាប់រហ័ស និងនៅពេលនេះផងដែរលោកបានទទួលមរណភាពទៅហើយនៅក្នុងថ្ងៃពុធ ក្នុងវ័យ៩៦ឆ្នាំ។
ប្រព័ន្ធផ្សព្វផ្សាយរបស់ប្រទេសចិនបានរាយការណ៍ឡើងផ្អែកទៅលើសេចក្តីប្រកាសរបស់បក្សកម្មុយនីស្តចិនថាលោកបានទទួលមរណភាពនៅទីក្រុងសៀងហៃដោយសារជំងឺមហារីកឈាម(Leukemia) និងបញ្ហាសរីរាង្គខាងក្នុងផ្សេងទៀត។
លោក Jiang គឺជាប្រធានាធិបតីចិនអស់រយៈពេលមួយទសវត្សរ៍ចាប់តាំងពីឆ្នាំ១៩៩៣មក។ នៅក្នុងការមើលឃើញរបស់មេដឹកនាំប្រទេសដទៃទៀតតែងតែយល់ឃើញថាលោក Jiang គឺជាមេដឹកនាំមួយរូបដែលខុសពីការរំពឹងទុកនៃមេដឹកនាំកម្មុយនីស្តផ្សេងទៀតដែលមានទឹកមុខរឹងកំព្រឹង និងកំរបានឃើញស្នាមញញឹម។ ប៉ុន្តែសំរាប់លោក Jiang វិញ លោកគឺជាមេដឹកនាំម្នាក់ដែលធ្លាប់បានអះអាងថាស្រលាញ់នូវភាពយន្តហូលីវូដ និងចូលចិត្តស្តាប់ចំរៀងមួយមានចំណងជើងថា«Love Me Tender»។
ប្រជាជនដែលស្រលាញ់រូបលោកបានដាក់រហ័សនាមលោកថា«Flowerpot»។ នៅក្រោមរូបភាពទន់ភ្លន់របស់លោក ត្រូវបានធ្វើអោយដៃគូបក្សប្រឆាំងរបស់លោកតែងតែមើលស្រាលសមត្ថភាពរបស់លោក និងអស់រយៈពេលជាង១៣ឆ្នាំដែលបានកាន់កាប់បក្សរបស់លោក ទីបំផុតលោកក៏បានផ្តួលរំលំដៃគូសត្រូវផ្សេងទៀតលើឆាកនយោបាយ។
នៅក្រោមការគ្រប់គ្រងរបស់លោក Jiang ប្រទេសចិនបានក្លាយជាប្រទេសសំខាន់មួយដែលផលិតនិងផ្គត់ផ្គង់ថាមពល និងក្លាយជាដៃគូប្រកួតប្រកួតជែងសេដ្ឋកិច្ចដ៏ធំមួយនៅលើសកលលោក។
នៅពេលដែលគ្រាប់បែករបស់សហរដ្ឋអាមេរិកបានធ្វើការវាយប្រហារមកលើស្ថានទូតចិននៅទីក្រុង Belgrade នៅឆ្នាំ១៩៩៩ ហើយបានបណ្តាលអោយអ្នកកាសែត៣នាក់បានបាត់បង់ជីវិតនៅក្នុងកំឡុងពេលនៃការបំបែកប្រទេស Yugoslavia លោក Jiang បានចេញមុខបដិសេធការបកស្រាយរបស់អ្នកស្រី Clinton ថានេះគឺជារឿងឧបទ្ទវហេតុ។ លោក Jiang ក៏បានតែងតែក្លាយជានិម្មិតរូបប្រជាជនចិនស្រទាប់យុវវ័យផងដែរ ដោយពួកគេតែងតែយករូបលោកមក Troll លេងជា Online Hero ដែលហៅថា«Toad» ព្រោះរូបលោកមានរូបរាង និងឥរិយាបថស្រដៀងទៅនឹងសត្វនេះផងដែរ មើលទៅលោក Jiang ពិតជាមានប្រជាប្រិយភាពខ្លាំងមែនទែនមិនថាលើផ្នែកនយោបាយ និងសង្គម។