1. ចិន រុស្ស៊ី អ៊ីរ៉ង់ ធ្វើសមយុទ្ធកងទ័ពជើងទឹករួមគ្នា នៅឈូងសមុទ្រអូម៉ង់

យោងតាមសារព័ត៌មាន AP News ចុះផ្សាយថ្ងៃទី១៥ ខែមីនាបានអោយដឹងថា ក្រសួងការពារជាតិចិនបាននិយាយកាលពីថ្ងៃអង្គារថា កងកម្លាំងទ័ពជើងទឹកមកពីប្រទេសចិន អ៊ីរ៉ង់ និងរុស្ស៊ីដែលជាប្រទេសមានជម្លោះជាមួយសហរដ្ឋអាមេរិកបានចាប់ផ្តើមធ្វើសមយុទ្ធរួមគ្នានៅឈូងសមុទ្រអូម៉ង់កាលពីសប្តាហ៍នោះ។

ប្រទេសផ្សេងទៀតក៏កំពុងចូលរួមក្នុងសមយុទ្ធ "Security Bond-2023" ផងដែរ ក្រសួងបាននិយាយដោយមិនបញ្ចេញព័ត៌មានលម្អិត។ ប៉ុន្តែសង្កេតឃើញថាប្រទេសទាំងនោះអាចជាអ៊ីរ៉ង់ ប៉ាគីស្ថាន អូម៉ង់ និងអេមីរ៉ាតអារ៉ាប់រួម ដោយសុទ្ធសឹងតែមានឆ្នេរសមុទ្រតាមបណ្តោយមាត់ឈូងសមុទ្រពែរ្សនោះ។

អ្នកនាំពាក្យក្រុមប្រឹក្សាសន្តិសុខជាតិអាមេរិក លោក John Kirby បាននិយាយកាលពីថ្ងៃពុធថាសេតវិមានមិនមានការព្រួយបារម្ភចំពោះសមយុទ្ធហ្វឹកហ្វឺនរួមគ្នានោះទេ។

លោក Kirby បាននិយាយនៅលើ CNN ថា "យើងនឹងមើលវា យើងនឹងតាមដានវា ជាក់ស្តែង ដើម្បីធ្វើឱ្យប្រាកដថាគ្មានការគំរាមកំហែងដែលកើតចេញពីលំហាត់ហ្វឹកហ្វឺននេះ ដល់ផលប្រយោជន៍សន្តិសុខជាតិរបស់យើង ឬសម្ព័ន្ធមិត្ត និងដៃគូរបស់យើងនៅក្នុងតំបន់ទេ" ។ 

2. BRICS ពង្រីកដល់អារ៉ាប៊ីសាអូឌីត ឥណ្ឌូនេស៊ី និងលើសពីការសន្យា 

យោងតាមសារព័ត៌មាន South China Post ចុះផ្សាយថ្ងៃទី៨ ខែកុម្ភៈបានអោយដឹងថា សមាជិក BRICS ថ្មីដែលមានសក្តានុពលដូចជា អាហ្វហ្គានីស្ថាន អេហ្ស៊ីប ឥណ្ឌូណេស៊ី អារ៉ាប៊ីសាអូឌីត និងតួកគី ក៏ចាប់អារម្មណ៍ចង់ក្លាយជាសមាជិកដែរ។

ប្រឆាំងទៅនឹងរូបភាពនៃការឈ្លានពានរបស់រុស្ស៊ីមកលើអ៊ុយក្រែន និងការប្រកួតប្រជែងជាប្រព័ន្ធរវាងសហរដ្ឋអាមេរិក និងចិន មហាអំណាចធំៗក៏ដូចជាមហាអំណាចមធ្យម និងតូចៗកំពុងស្វែងរកសម្ព័ន្ធភាព និងធានាដល់ផលប្រយោជន៍ជាយុទ្ធសាស្ត្រ។ នៅពេលដែលការពង្រីក BRICS ដ៏មានសក្ដានុពលត្រូវបានលាតត្រដាងឡើង នេះកាន់តែបង្កភាពស្មុគស្មាញដោយការប្រកួតប្រជែងមហាអំណាចធំៗ។ នៅក្នុងបរិបទនេះ ការពង្រីកនៃBRICS បាននាំឱ្យមានសំណួរចោទសួរឡើងពីសក្តានុពលនៃឥទ្ធិពលភូមិសាស្ត្រសេដ្ឋកិច្ច និងភូមិសាស្ត្រយុទ្ធសាស្រ្តរបស់ខ្លួន។

សម្រាប់សមាជិក BRICS ថ្មីដែលមានសក្តានុពល ការចូលរួមក្នុងប្លុកនេះអាចផ្តល់ឱកាសដើម្បីគាំទ្រដល់ការកើនឡើងនៃពហុប៉ូល និងប្លុកសេដ្ឋកិច្ចដែលអាចបម្រើផលប្រយោជន៍របស់ពួកគេបានប្រសើរជាងមុន ខណៈដែលការប្រកួតប្រជែងជាប្រព័ន្ធរវាងសហរដ្ឋអាមេរិក និងចិននៅតែជារូបភាពនៃផ្ទៃខាងក្រោយ។ វាក៏អាចធ្វើឱ្យប្រទេសទាំងនេះទទួលបានផលប្រយោជន៍ផ្ទាល់ខ្លួនរបស់ពួកគេតាមរយៈការធ្វើឱ្យមានតុល្យភាព ឬសូម្បីតែការប្រើភាពមានប្រៀបជាងដោយការដាក់លោកខាងលិច និងBRICS អោយស្ថិតក្នុងទីតាំងជំលោះជាមួយគ្នា រួចពួកគេទាញផលប្រយោជន៍ពីក្នុងនោះ។

3. កូរ៉េខាងជើងបង្ហោះផ្កាយរណបចារកម្មដំបូងរបស់ខ្លួនដើម្បីត្រួតពិនិត្យសកម្មភាពយោធាអាមេរិក

យោងតាមសារព័ត៌មាន AP News ចុះផ្សាយថ្ងៃទី៣០ ខែឧសភាបានអោយដឹងថា កូរ៉េខាងជើងបាននិយាយកាលពីថ្ងៃអង្គារថាខ្លួននឹងបាញ់បង្ហោះផ្កាយរណបចារកម្មយោធាលើកដំបូងរបស់ខ្លួននៅក្នុងខែមិថុនា ហើយបានពណ៌នាពីវិធីឈ្លបយកការណ៍សំងាត់តាមរយៈមូលដ្ឋានអវកាសនេះថាពិតជាមានសារៈសំខាន់សម្រាប់ត្រួតពិនិត្យសមយុទ្ធយោធា "ដែលគ្រោះថ្នាក់" របស់សហរដ្ឋអាមេរិករួមគ្នាជាមួយនឹងកូរ៉េខាងត្បូង។

សេចក្តីថ្លែងការណ៍នេះបានធ្វើឡើងនៅរយៈពេលមួយថ្ងៃបន្ទាប់ពីកូរ៉េខាងជើងបានជូនដំណឹងដល់ឆ្មាំឆ្នេរសមុទ្ររបស់ប្រទេសជប៉ុនថា ការបាញ់បង្ហោះនេះនឹងស្ថិតនៅចន្លោះថ្ងៃទី 31 ឧសភា ដល់ថ្ងៃទី 11 ខែមិថុនា និងអាចប៉ះពាល់ដល់ដែនទឹកក្នុងសមុទ្រលឿង សមុទ្រចិនខាងកើត និងភាគខាងកើតនៃកោះ Luzon របស់ប្រទេសហ្វីលីពីនផងដែរ។ 

រដ្ឋមន្ត្រីការពារជាតិជប៉ុនបានព្រមានកងកម្លាំងរបស់ខ្លួនឱ្យបាញ់ទម្លាក់ផ្កាយរណប ឬកំទេចកំទីណាមួយ ប្រសិនបើវត្ថុទាំងនេះបានចូលមកក្នុងទឹកដីជប៉ុន។ 

ខណៈដែលគូប្រជែងកូរ៉េខាងជើងបានថ្កោលទោសការបាញ់បង្ហោះគ្រោងទុកនេះឡើងថាជាការសាកល្បងបច្ចេកវិទ្យាមីស៊ីលផ្លោងដែលត្រូវតែហាមឃាត់ វាក៏នៅមិនច្បាស់លាស់ទេថា តើផ្កាយរណបរបស់ពួកគេនោះពិតជាមានភាពជឿនលឿនដល់កំរិតគ្រប់គ្រាន់រឺនៅដើម្បីគាំទ្រដល់ការសំរេចបានក្នុងការតាមដាន និងឃ្លាំមើលសកម្មភាពយោធារបស់អាមេរិក និងកូរ៉េខាងត្បូងក្នុងពេលវេលាជាក់ស្តែងដែរឬទេ។