វ៉ៃចេញ៤ថ្ងៃសោះ បទរបស់លោក GMENGZ “PEM PEM” ហក់ឡើងដល់ចំណាត់ថ្នាក់ទី៥នៅលើតារាងយូធូបកម្ពុជា! ពិតជាមានប្រជាប្រិយភាពភាពយ៉ាងខ្លាំង ជាពិសេសអាចសង្កេតឃើញឡើងចាប់តាំងពីបទនេះបានបង្ហើបឡើងជាច្រើនសប្តាហ៍កន្លងមកម្ល៉េះ។
តាមរយៈបទនេះ លោក GMENGZ ព្រមជាមួយនឹង Coach របស់លោក លោក Norith បានធ្វើអោយ M/V បទនេះមានភាពទាក់ទាញខ្លាំងមែនទែន ដោយអ្នកទាំងពីរបានបង្ហាញឡើងជាមួយនឹងភាពក្រមិចក្រមើមយ៉ាងខិលតែម្តង ធ្វើអោយទស្សនិកជនជាច្រើនបានសរសើរនឹងរសជាតិថ្មីនេះ និងលាន់មាត់ថាឡូយគ្រប់ៗគ្នា! គួររំលឹកផងដែរថា កាលពីពេលមុនចេញផ្សាយ M/V ផ្លូវការនេះ កាលពីដើមខែមីនា បទ“PEM PEM” របស់លោកត្រូវបានលើកទៅសម្តែងជាលើកដំបូងបំផុតជាមួយនឹង Coach របស់លោកនៅឯក្លឹបកំសាន្តមួយ និងធ្វើអោយផ្ទុះការចាប់អារម្មណ៍ជាច្រើន។
យ៉ាងណាមិញសូមក្រឡេកមើលមកលោក Norith បន្តិច សង្កេតឃើញថាមួយរយៈចុងក្រោយនេះ លោកបានចាប់ដៃគូសហការបទចំរៀងជាមួយនឹងសិល្បករលេចធ្លោជាច្រើននាក់ ដែលក្នុងនោះរួមមានដូចជា លោក Mann VannDa នូវបទ«ក្រមុំស្រុកណា» លោក Vito នូវបទ«Still Zin 2» លោក Yuuhai នូវបទ«១ណា» លោក Homie នូវបទ«ចម្លើយស្នេហ៍» និងជាមួយលោកវណ្ណថាន នូវបទ«Call ក៏បាន Chat ក៏បាន»។ ចុះទស្សនិកជនយល់ឃើញយ៉ាងណាដែរចំពោះការ Collab ថ្មីនេះរបស់ពួកគេ?
